തൃശൂര് : വൈകിയെങ്കിലും കോണ്ഗ്രസിന്റെ സ്ഥാനാര്ത്ഥി കൂടി എത്തിയതോടെ തൃശ്ശൂരില് ശക്തമായ ത്രികോണ മത്സരത്തിന് കളമൊരുങ്ങി. ദിവസങ്ങള് നീണ്ടുനിന്ന തര്ക്കങ്ങള്ക്കവസാനം രാജന് പല്ലന്റെ പേര് ഔദ്യോഗികമായി കോണ്ഗ്രസ് നേതൃത്വം പ്രഖ്യാപിച്ചു. ബിജെപി സ്ഥാനാര്ത്ഥി പത്മജ വേണുഗോപാലും സിപിഐ സ്ഥാനാര്ത്ഥി ആലങ്കോട് ലീലാകൃഷ്ണനും നേരത്തെ തന്നെ പ്രചാരണം തുടങ്ങിക്കഴിഞ്ഞു.
വൈകിയെത്തിയ രാജന് പല്ലന് ഒന്നാം ലാപ്പില് ഇവരുടെ ഒപ്പം എത്താനുള്ള ഓട്ടത്തിലാണ്. നഗരത്തിലെങ്ങും മൂന്ന് സ്ഥാനാര്ത്ഥികളുടെയും ചിത്രങ്ങളും പോസ്റ്ററുകളും നിറഞ്ഞുകഴിഞ്ഞു. മൂന്ന് സ്ഥാനാര്ത്ഥികളും നഗരത്തില് റോഡ് ഷോ നടത്തി. വോട്ടര്മാരെ നേരില് കാണാനുള്ള ഓട്ടപ്പാച്ചിലിലാണ് സ്ഥാനാര്ത്ഥികള്. സ്ഥാപനങ്ങള് കയറിയും സമുദായ സംഘടനകളുടെ നേതാക്കളെ സമീപിച്ചും വോട്ട് തേടിക്കൊണ്ടിരിക്കുന്നു.
കഴിഞ്ഞ 2021ലെ നിയമസഭാ തിരഞ്ഞെടുപ്പില് മൂന്ന് മുന്നണികളും ശക്തമായ മത്സരമാണ് തൃശ്ശൂരില് കാഴ്ചവച്ചത്. ആയിരം വോട്ടില് താഴെയുള്ള ഭൂരിപക്ഷത്തിനാണ് സിപിഐയിലെ പി. ബാലചന്ദ്രന് വിജയിയായത്. അന്ന് കോണ്ഗ്രസ് ടിക്കറ്റില് മത്സരിച്ച പത്മജ വേണുഗോപാല് ഇക്കുറി ബിജെപി സ്ഥാനാര്ത്ഥിയായാണ് ജനവിധി തേടുന്നത്. എന്ഡിഎക്ക് വേണ്ടി 2021ലെ നിയമസഭ തെരഞ്ഞെടുപ്പില് മത്സര രംഗത്തുണ്ടായിരുന്നത് സുരേഷ് ഗോപിയായിരുന്നു. പിന്നീട് ലോക്സഭാ തിരഞ്ഞെടുപ്പില് വിജയിച്ച സുരേഷ് ഗോപി ഇക്കുറി പത്മജയ്ക്കുവേണ്ടി രംഗത്തിറങ്ങുന്നു എന്ന സവിശേഷതയും ഉണ്ട്.
ലോക്സഭ തെരഞ്ഞടുപ്പില് സുരേഷ്ഗോപിക്ക് പതിനയ്യായിരത്തിലേറെ വോട്ടുകളുടെ ലീഡ് തൃശൂര് നിയമസഭാ മണ്ഡലത്തില് ലഭിച്ചിരുന്നു. ഇതാണ് എന്ഡിഎ ക്യാമ്പുകളില് പ്രതീക്ഷ ഉണര്ത്തുന്നത്. മണ്ഡലത്തില് സുപരിചിതയായ പത്മജയുടെ സ്ഥാനാര്ത്ഥിത്വവും എന്ഡിഎക്ക് കരുത്താകും.
