കൊടുങ്ങല്ലൂര്: കാളി ദാരിക യുദ്ധത്തിന്റെ പെരുമ്പറ മുഴക്കി ശ്രീകുരുംബക്കാവില് കോഴിക്കല്ല് മൂടി. വേണാടന് കൊടികളുയര്ത്തിയതോടെ ഭരണിയുത്സവത്തിന്റെ ആരവമുയര്ന്നു. മുളംതണ്ടില് താളമിട്ട് ദേവീസ്തോത്രങ്ങളും അമ്മേശരണം വിളികളുമുയര്ന്നു. ഇനി ഭരണി ദിവസമായ ഞായറാഴ്ചവരെ ശ്രീകുരുംബക്കാവില് ആചാരാനുഷ്ഠാനങ്ങളുടെ തിരക്കാവും. മീനമാസത്തിലെ തിരുവോണനാ
ളായ ഇന്നലെ രാവിലെ 11 മണിയോടെയാണ് ഭരണിയുടെ പ്രധാന ചടങ്ങുകളിലൊന്നായ കോഴിക്കല്ല് മൂടല് നടന്നത്.
വടക്കേ നടപ്പന്തലിനോട് ചേര്ന്ന് വൃത്തത്തിലുള്ള രണ്ട് കോഴിക്കല്ലുകളും അവകാശികളായ ഭഗവതിവീട്ടിലെ പ്രതിനിധികള് കുഴിയുണ്ടാക്കി മൂടി മണല്ത്തിട്ടയുണ്ടാക്കി ചെമ്പട്ട് വിരിച്ച് തച്ചോളിവീട്ടിലെ കോഴികള് ഹാജരുണ്ടോ എന്ന് മൂന്ന് തവണ വിളിച്ച് ചോദിച്ചു. ഈ സമയം ഹാജരുണ്ട് എന്ന് ഏറ്റുചൊല്ലി തച്ചോളിവീട്ടില് നിന്നുമുള്ള പ്രതിനിധികള് നേര്ച്ചക്കോഴികളുമായി മൂന്ന് തവണ പ്രദക്ഷിണം നടത്തി ചെമ്പട്ടില് കോഴികളെ സമര്പ്പിച്ച് ചടങ്ങ് പൂര്ത്തിയാക്കി. ഇതോടെ ക്ഷേത്രം അധികൃതരും ഭക്തജനങ്ങളും ചെമ്പട്ടുകളും കോഴികളും മറ്റ് വഴിപാടുകളും കോഴിക്കല്ലില് സമര്പ്പിച്ചു.
ചടങ്ങുകള് പൂര്ത്തിയായതോടെ ക്ഷേത്രത്തിന്റെ തെക്ക് കിഴക്കേ കോണില് വേണാടന് കൊടികള് ഉയര്ത്തി. പുലര്ച്ചെ വലിയ തമ്പുരാന് കുഞ്ഞുണ്ണിരാജ ക്ഷേത്രത്തിലെത്തി ആദ്യദര്ശനം നടത്തി കാണിക്ക സമര്പ്പിച്ചാണ് ഭരണി ആചാരങ്ങള്ക്ക് തുടക്കം കുറിച്ചത്. ഇന്നലെ ആയിരങ്ങളാണ് ശ്രീകുരുംബക്കാവില് എത്തിച്ചേര്ന്നത്. 21ന് തൃച്ചന്ദനച്ചാര്ത്ത് പൂജയും അശ്വതികാവുതീണ്ടലും നടക്കും. ഇതോടെ കോമരക്കൂട്ടങ്ങള് മടക്കയാത്ര ആരംഭിക്കും.
ഞായറാഴ്ചയാണ് ഭരണി. ഭരണിനാളില് ഭഗവതിക്ക് വരിയരിപ്പായസം നിവേദിച്ച് പള്ളിമാടത്തില് സങ്കല്പിച്ചിരുത്തും. പടിഞ്ഞാറെ നടയില് കൂശ്മാണ്ഡബലിക്ക് ശേഷം വടക്കേ നടയില് വെന്നിക്കൊടികള് ഉയര്ത്തുന്നതോടെ ഭരണിയുത്സവത്തിന് സമാപനമാകും.
കൊച്ചിന് ദേവസ്വം ബോര്ഡ് പ്രസിഡന്റ് കെ. രവീന്ദ്രന്, മെമ്പര്മാരായ കെ.പി. അജയന്, കെ.കെ. സുരേഷ് ബാബു ദേവസ്വം കമ്മിഷണര് എസ്.ആര്. ഉദയകുമാര്, സെക്രട്ടറി പി. ബിന്ദു, ഡെപ്യൂട്ടി കമ്മിഷണര് സുനില് കര്ത്ത, തിരുവഞ്ചിക്കുളം ഗ്രൂപ്പ് അസി. കമ്മിഷണര് എം.ആര്. മിനി, ദേവസ്വം മാനേജര് കെ. വിനോദ്, ക്ഷേത്ര ഉപദേശക സമിതി പ്രസിഡന്റ് കെ.കെ. ഭരതന് സെക്രട്ടറി വി. സന്തോഷ് എന്നിവര് കോഴിക്കല്ല് മൂടല് ചടങ്ങുകള്ക്ക് നേതൃത്വം നല്കി.
