കോട്ടയം: നസ്രാണികള് ഒന്നിച്ചു നില്ക്കേണ്ടത് കാലഘട്ടത്തിന്റെ ആവശ്യമാണെന്ന് മലങ്കര ഓര്ത്തഡോകസ് സുറിയാനി സഭ പരമാധ്യക്ഷന് ബസേലിയോസ് മാര്ത്തോമ്മാ മാത്യൂസ് തൃതീയന് കതോലിക്കാ ബാവാ. മത പരിവര്ത്തന നിയമങ്ങള് ഭരണഘടനാ വിരുദ്ധമല്ല എന്നുറപ്പാക്കേണ്ട ഉത്തരവാദിത്തം നമുക്കുണ്ടെന്നും അദ്ദേഹം പറഞ്ഞു. മാര്ത്തോമ്മാ നസ്രാണി സമുദായ വൈദീക – അല്മായ പ്രതിനിധികളുടെ യോഗം പാലാ ബിഷപ്സ് ഹൗസില് ഉദ്ഘാടനം ചെയ്യുകയായിരുന്നു അദ്ദേഹം. യോഗത്തില് പാലാ രൂപത മെത്രാന് മാര് ജോസഫ് കല്ലറങ്ങാട്ട് അധ്യക്ഷത വഹിച്ചു. കര്ദിനാള് ബസേലിയോസ് മാര് ക്ലീമിസ് കാതോലിക്കാ ബാവാ മുഖ്യ പ്രഭാഷണം നടത്തി. ക്രൈസ്തവര് ഈശോയുടെ നാമത്തില് ചെയ്യുന്ന സാമൂഹിക സേവനങ്ങളെ സംശയിക്കുന്നവര് കൂടി വരുന്നു. നസ്രാണികളുടെ കൂടിവരവ് ഒരിക്കലും വര്ഗ്ഗീയമല്ല, രാജ്യത്തിനു മുഴുവന് ബലം പകരാനാണ്. യോഗത്തില് ഏഴു നസ്രാണി സഭകളില് നിന്നായി മെത്രാന്മാരുടെ 11 പ്രതിനിധികള് പങ്കെടുത്തു. സാമുദായികമായി സംഘടിക്കുക എന്നത് സഭകളുടെ ഐക്യത്തേക്കാള് എളുപ്പവും അവശ്യവുമാണെന്ന് മാര് ജോസഫ് കല്ലറങ്ങാട്ട് അധ്യക്ഷ പ്രസംഗത്തില് പറഞ്ഞു. യൂഹാനോന് മാര് ദിയസ്കോറോസ് മെത്രാപ്പോലീത്താ , യൂഹാനോന് മാര് തെയോഡോഷ്യസ് മെത്രാപ്പോലീത്ത, മലങ്കര യാക്കോബായ സുറിയാനി സഭയില്നിന്നും കുര്യാക്കോസ് മാര് തിയോഫിലോസ് മെത്രാപ്പോലീത്ത, മാത്യൂസ് മാര് അന്തിമോസ് മെത്രാപ്പോലിത്ത, മലങ്കര മാര്ത്തോമ്മാ സുറിയാനി സഭയില്നിന്നും സഫ്രഗന് മെത്രാപ്പോലീത്താ ജോസഫ് മാര് ബര്ണബാസ് , പൗരസ്ത്യ കല്ദായ സുറിയാനി സഭാധ്യക്ഷന് മാര് ഔഗിന് കുര്യാക്കോസ് മെത്രാപ്പോലീത്ത, സീറോ മലബാര് കത്തോലിക്കാ സഭയില്നിന്നും മാര് ജോസഫ് പെരുന്തോട്ടം മെത്രാപ്പോലീത്താ, കാഞ്ഞിരപ്പള്ളി രൂപത അധ്യക്ഷന് മാര് ജോസ് പുളിക്കല് എന്നിവര് പ്രഭാഷണം നടത്തി.
