തിരുവനന്തപുരം: ഭാരതത്തില് സമ്പൂര്ണ ഗോവധ നിരോധനം നടപ്പാക്കണമെന്ന് തിരുവനന്തപുരത്ത് കോട്ടയ്ക്കകം തെക്കേത്തെരുവ് ശൃംഗേരി ശങ്കമഠത്തില് കൂടിയ ഗോമഹിമാ സത്സംഗം ആവശ്യപ്പെട്ടു. നന്ദിബാബയുടെ അധ്യക്ഷതയില് സംന്യാസിസംഘം നടത്തിവരുന്ന ഗോ സമ്മാന് ആഹ്വാന അഭിയാന്റെ ഭാഗമായാണ് ഗോമഹിമാ സത്സംഗം സംഘടിപ്പിച്ചത്. ഗോക്കളുടെ വംശവര്ധനവും ഗവേഷണവും ഗ്രാന്റുകളും ലഭ്യമാക്കുക, ഗോവധ നിരോധനത്തിനുവേണ്ടി ശക്തമായ കേന്ദ്രനിയമം പാസാക്കുക, ഗോമാതാവിന് മൗലീകാവകാശങ്ങളോടെ രാഷ്ട്രമാതാവ്, ദേശീയ ദേവതാ, ദേശീയ പൈതൃകം മുതലായ ശ്രേഷ്ഠ പദവി പ്രഖ്യാപിക്കുക എന്നീ ആവശ്യങ്ങളും സത്സംഗം ഉന്നയിച്ചു.
സത്സംഗത്തില് കേരള ബ്രാഹ്മണസഭ സംസ്ഥാന അധ്യക്ഷന് എച്ച്. ഗണേഷ് അധ്യക്ഷനായി. പശുക്കളില് ദൈവികമായ ചൈതന്യമുണ്ട്. പശുക്കളെ സംരക്ഷിക്കേണ്ടത് അനിവാര്യമാണെന്നും ഗോവധം നടത്തുന്നവര്ക്ക് കഠിനമായ ശിക്ഷ നല്കുന്ന നിയമമുണ്ടാകണമെന്നും അദ്ദേഹം പറഞ്ഞു.
ഭാരതത്തിലെ പ്രമുഖ സംന്യാസിവര്യന്മാരായ ഗ്വാള് സന്ത്ശ്രീ, ഗോപേഷ് കൃഷ്ണദാസ്ജി മഹാരാജ്, രപ്രകാശ്ദാസ് മഹാരാജ്, രാം തീര്ത്ത ദാസ് മഹാരാജ്, ഭായി കമലാനന്ദ്, മാതൃമഠം മഠാധിപതി സ്വാമി ഋഷി തുടങ്ങിയവര് സത്സംഗത്തില് മാര്ഗനിര്ദേശം നല്കി. ഗോസംരക്ഷകയായ സംഗീത എസ്. അയ്യരെ ആദരിച്ചു. ഹിന്ദുഐക്യവേദി സംസ്ഥാന സെക്രട്ടറി സന്ദീപ് തമ്പാനൂര്, കേരള ബ്രാഹ്മണസഭ ജില്ലാ അധ്യക്ഷന് റ്റി.എസ്. മണി, ഗോ സമ്മാന് അഭിയാന് സംസ്ഥാന കോ ഓര്ഡിനേറ്റര് എം. ശ്രീധരന് നമ്പൂതിരി, പൂര്വസൈനിക് പരിഷത്ത് ദേശീയ സെക്രട്ടറി ക്യാപ്റ്റന് ഗോപകുമാര്, ശബരിമല മുന് മേല്ശാന്തി ഗോശാല വിഷ്ണുവാസുദേവന് നമ്പൂതിരി, മുന് കൗണ്സിലര് എസ്. സുരേഷ് തുടങ്ങിയവര് സംസാരിച്ചു.
രാജസ്ഥാനില് നിന്ന് ആരംഭിച്ച ഗോ സമ്മാന് ആഹ്വാന അഭിയാന്റെ ഭാഗമായുള്ള ഭാരത് യാത്ര 11 സംസ്ഥാനങ്ങള് പിന്നിട്ട് ബുധനാഴ്ച വൈകിട്ടോടെ നെട്ടയം ശ്രീരാമകൃഷ്ണാശ്രമത്തിലെത്തി. ഇന്നലെ രാവിലെ ഗോപൂജക്കുശേഷമായിരുന്നു ഗോമഹിമാ സത്സംഗം ആരംഭിച്ചത്.
ഭാരതത്തിലെ പ്രമുഖ സംന്യാസിമാരുടെ നേതൃത്വത്തിലാണ് സത്സംഗം നടന്നത്. ഗോ മഹിമ പ്രചരിപ്പിക്കുക മാത്രമാണ് സത്സംഗ ലക്ഷ്യം. ഇന്ന് എറണാകുളത്ത് കലൂര് പാവക്കുളം ശിവക്ഷേത്രത്തിലും നാളെ കണ്ണൂര് തളാപ്പിലെ സുന്ദരേശ്വര ക്ഷേത്രത്തിലെ നവതി ഹാളിലും സത്സംഗം നടക്കും. തുടര്ന്ന് യാത്ര മൈസൂരിലേക്ക് കടക്കും. ഏപ്രില് 27ന് ഗോ സമ്മാന് ദിനമായി ആഘോഷിക്കും. അന്ന് ഭാരതത്തിലെ എല്ലാ പൗരന്മാരെയും വിദ്യാര്ത്ഥികളേയും കൊണ്ട് സംഘടിതമായി പ്രധാനമന്ത്രിക്ക് ട്വീറ്റ് ചെയ്യും. രാവിലെ 10 മുതല് രണ്ടുമണിക്കൂര് സംന്യാസിമാര്, ഗോഭക്തര്, പ്രമുഖര് അതത് പ്രദേശത്തെ റവന്യൂവകുപ്പ് ഓഫീസുകളില് പോയി രാഷ്ട്രപതി, പ്രധാനമന്ത്രി, ഗവര്ണര്, മുഖ്യമന്ത്രി എന്നിവരുടെ പേരില് ഗോസേവനം, ഗോ സംരക്ഷണം, ഗോ ബഹുമാനം
എന്നിവയ്ക്കായി അപേക്ഷകള് നല്കും.
ജൂലൈ 27ന് അതത് ജില്ലാ കേന്ദ്രങ്ങളിലും ഒക്ടോബര് 17ന് സംസ്ഥാന തലസ്ഥാനങ്ങളിലും അപേക്ഷ സമര്പ്പിക്കും. 2027 ഫെബ്രുവരി 27ന് ദല്ഹിയിലെത്തി സങ്കീര്ത്തനം പാടി ആവശ്യങ്ങള് ആവര്ത്തിക്കും. ആഗസ്ത് 15 മുതല് ആയിരക്കണക്കിന് ദേശഭക്തരും സംന്യാസിമാരും ചേര്ന്ന് തപസ്യ ആരംഭിക്കും.
