തിരുവനന്തപുരം: എ കെ ശശീന്ദ്രന്റെ സ്ഥാനാര്ഥിത്വത്തെ ചൊല്ലി എന്സിപിയില് ഭിന്നത രൂക്ഷം. തിരുവനന്തപുരത്ത് ചേര്ന്ന തെരഞ്ഞെടുപ്പ് കമ്മിറ്റി യോഗത്തില് നിന്ന് ശശീന്ദ്രന് വിഭാഗം ഇറങ്ങിപ്പോയി.
എലത്തൂരില് മുക്കം മുഹമ്മദിനെ കൂടി പരിഗണിക്കണമെന്ന് നിര്ദേശം ഉണ്ടായതിന് പിന്നാലെയാണ് മന്ത്രി എ കെ ശശീന്ദ്രനും അനുകൂലികളും ഇറങ്ങിപ്പോയത്.തിങ്കളാഴ്ച വൈകിട്ട് നാലോടെ തൈക്കാട് ഗസ്റ്റ് ഹൗസിലാണ് യോഗം ചേര്ന്നത്.
ഈ യോഗത്തില് 10 തിരഞ്ഞെടുക്കപ്പെട്ടവരും ഒരു പാര്ലമെന്ററി പാര്ട്ടി നേതാവും എന്സിപിയുടെ സംസ്ഥാന പ്രസിഡന്റും ഉള്പ്പെടെ 12 പേരാണ് പങ്കെടുക്കേണ്ടത്.എന്നാല് എകെ ശശീന്ദ്രന് യോഗത്തില് പിസി ചാക്കോ പങ്കെടുക്കുന്നതിനെ ചോദ്യം ചെയ്ത് ഇറങ്ങിപ്പോവുകയായിരുന്നു. പി സി ചാക്കോ നേരത്തെ സൂചിപ്പിച്ച ഒരു പദവിയിലുമുള്ളയാളല്ലെന്നും അതുകൊണ്ട് പങ്കെടുക്കാന് കഴിയില്ല എന്നും പറഞ്ഞാണ് ശശീന്ദ്രനും അദ്ദേഹത്തെ അനുകൂലിക്കുന്നവും ഇറങ്ങിപ്പോയത്.
എന്നാല്, കഴിഞ്ഞ പാര്ലമെന്ററി പാര്ട്ടി യോഗത്തിലും പിസി ചാക്കോ പങ്കെടുത്തിരുന്നു. അപ്പോള് എ കെ ശശീന്ദ്രന് എതിര്പ്പ് പ്രകടിപ്പിച്ചില്ല. ഏലത്തൂര് സീറ്റിലേക്ക് മുക്കം മുഹമ്മദിന്റെ പേരും ഉയര്ന്നു വന്നത് മുന്കൂട്ടിക്കണ്ടുകൊണ്ടാണ് ഇത്തരമൊരു നടപടിയെന്നാണ് പുറത്ത് വരുന്ന വിവരം.
