ടെഹ്റാന്: ഇറാനിലെ നിരവധി എണ്ണപ്പാടങ്ങളില് ബോംബിട്ട് ഇസ്രയേല്. ടെഹ്റാനിലെ അഞ്ച് എണ്ണ ശേഖരിച്ച ഡിപ്പോകളിലാണ് ബോംബിട്ടത്. ഓറഞ്ച് നിറത്തില് കത്തുന്ന എണ്ണപ്പാടങ്ങളും അതില് നിന്നും ഉയരുന്ന കറുത്ത പുകയും ഇസ്രയേല് ആക്രമണത്തിന്റെ രൂക്ഷത വെളിപ്പെടുത്തുന്നു. ബോംബിങ്ങിന്റെ ശക്തിയില് തൊട്ടടുത്ത കെട്ടിടങ്ങളിലെ ജനാലകള് അടര്ന്ന് തെറിച്ചുവീഴുന്നത് കാണാമായിരുന്നു.
ടെഹ്റാന് നഗരത്തിലെ എണ്ണവിതരണം സ്തംഭിച്ചിരുന്നു. എണ്ണസംഭരണ ശാലകള് കത്തിയതിനെ തുടര്ന്ന് അന്തരീക്ഷത്തില് ഹൈഡ്രോകാര്ബണും സള്ഫറും നൈട്രജന് ഓക്സൈഡും നിറഞ്ഞത് ജനങ്ങളില് ശ്വാസംമുട്ടലുണ്ടാക്കി. കറുത്ത പുകപടലങ്ങള് അന്തരീക്ഷത്തിലും റോഡിലും നിറഞ്ഞതിനാല് പകല്പോലും ഹെഡ് ലൈറ്റിട്ട് മാത്രമേ വാഹനങ്ങള്ക്ക് പോകാന് കഴിഞ്ഞുള്ളൂ.
ശനിയാഴ്ച രാത്രിയില് കുറത്തു പുക കുമിഞ്ഞുകൂടിയതിനെ തുടര്ന്ന് അന്തരീക്ഷസമ്മര്ദ്ദത്തില് വന്ന മാറ്റം കാരണം ആകാശത്ത് നിന്നും ഇറ്റു വീണ വെള്ളത്തുള്ളികളുടെ നിറം കറുത്തതായിരുന്നുവെന്നും പറയുന്നു. ഇതാദ്യമായാണ് ഇസ്രയേല് ഇറാന്റെ എണ്ണസംഭരണശാലകളെ ലക്ഷ്യം വെച്ച് ആക്രമണം നടത്തിയത്. ഇറാന് ഭരണകൂടത്തെ ഭയപ്പെടുത്തുകയാണ് ഉദ്ദേശ്യമെന്ന് കരുതുന്നു.
ഇറാനിലെ വ്യോമപാത മുഴുവനായി ഇസ്രയേലിന്റെയും അമേരിക്കയുടെയും യുദ്ധവിമാനങ്ങള് കയ്യടക്കിയിരിക്കുകയാണ്. ചൈനയുടെ കയ്യില് നിന്നും വാങ്ങിയ വ്യോമപ്രതിരോധസംവിധാനങ്ങള് കാര്യക്ഷമതയോടെ പ്രവര്ത്തിക്കാത്തതിനാല് അമേരിക്കയുടെയോ ഇസ്രയേലിന്റെയോ വിമാനങ്ങള് കാര്യമായി വീഴ്ത്താനും ഇറാന് കഴിഞ്ഞിട്ടില്ല.
പലയിടങ്ങളിലും ഇസ്രയേല് ശക്തമായ കാര്പെറ്റ് ബോംബിങ്ങും നടത്തി. ശത്രുവിനെ ഭയപ്പെടുത്താന് കൃത്യമായ ഒരു ലക്ഷ്യത്തില് മാത്രം ബോംബിടാതെ പരക്കെ ബോംബിടുന്ന രീതിയാണ് കാര്പെറ്റ് ബോംബിങ്ങ്.
ബഹ്റൈനിലെ കടല്വെള്ളം ശുദ്ധീകരിക്കുന്ന കൂറ്റന് പ്ലാന്റ് തകര്ത്ത് ഇറാന്
ഇതിന് ബദലായി ഇറാന് വിവിധ ഗള്ഫ് രാജ്യങ്ങളിലെ അമേരിക്കയുടെയും ഇസ്രയേലിന്റെയും കേന്ദ്രങ്ങളില് ആക്രമണം നടത്തി. ബഹ്റൈനിലെ കടല്വെള്ളം ശുദ്ധീകരിക്കുന്ന കൂറ്റന് പ്ലാന്റ് ഇറാന് മിസൈല് ആക്രമണത്തില് തകര്ന്നു.
