വയനാട് :ടൗണ്ഷിപ് സന്ദര്ശന വിവാദത്തില് സിപിഎം വയനാട് ജില്ലാ സെക്രട്ടറി കെ റഫീഖിനെ ഫോണില് വിളിച്ച് മമ്മൂട്ടി. അപമാനിച്ചതായി കണക്കാക്കേണ്ടെന്ന് പറഞ്ഞ മമ്മൂട്ടി താങ്കളോട് മാത്രമായി പറഞ്ഞതാണെന്നും അതെങ്ങനെ പുറത്തുവന്നെന്ന് അറിയില്ലെന്നും പറഞ്ഞുവെന്ന് റഫീഖ് അറിയിച്ചു. അത് സ്വകാര്യസംഭാഷണമായി മാത്രം കണക്കാക്കിയാല് മതിയെന്നും മമ്മൂട്ടി പറഞ്ഞു. രണ്ട് തവണ മമ്മൂട്ടി റഫീഖിനെ വിളിച്ചു.വീഡിയോ കോളും ചെയ്തു.
മുണ്ടക്കൈ-ചൂരല്മല ടൗണ്ഷിപ്പ് സന്ദര്ശിച്ചപ്പോള് ഒപ്പം നടന്ന സിപിഎം ജില്ലാ സെക്രട്ടറിയോട് മമ്മൂട്ടി നീരസം പ്രകടിപ്പിച്ചതിന്റെ ദൃശ്യങ്ങള് പ്രചരിച്ചിരുന്നു. ഇതോടെ മമ്മൂട്ടിക്കെതിരെ സൈബര് ആക്രമണം രൂക്ഷമായി. അനുകൂലിച്ചും പ്രതികൂലിച്ചും നിരവധി പേര് രംഗത്തെത്തി.
സര്ക്കാര് നിര്മ്മിച്ച മുണ്ടക്കൈ-ചൂരല്മല ടൗണ്ഷിപ്പ് സന്ദര്ശിക്കാനായി കഴിഞ്ഞ ദിവസമാണ് മമ്മൂട്ടി എത്തിയത്. സിപിഎം ജനറല് സെക്രട്ടറി എംഎ ബേബിസ്ഥലം സന്ദര്ശിച്ച് മടങ്ങിപ്പോയതിന് തൊട്ടുപിന്നാലെയായിരുന്നു മമ്മൂട്ടിയുടെ സന്ദര്ശനം.ഈ സമയം, ആളുകളെ നിയന്ത്രിക്കാനായി സിപിഎം ജില്ലാ സെക്രട്ടറി കെ റഫീഖ് മമ്മൂട്ടിക്കൊപ്പം കൂടി.റഫീഖ് പിന്നാലെ കൂടിയതോടെ മമ്മൂട്ടി മാറി നില്ക്കാന് പറഞ്ഞു. നിങ്ങള്ക്ക് വേണ്ടിയാണ് താന് വന്നതെന്ന് ആള്ക്കാര് കരുതുമെന്നുമായിരുന്നു മമ്മൂട്ടിയുടെ പ്രതികരണം. സ്വകാര്യ സന്ദര്ശനത്തില് രാഷ്ട്രീയനിറം കലര്ത്തേണ്ട എന്ന നിലപാടിലായിരുന്നു മമ്മൂട്ടിയുടെ പ്രതികരണം. വീഡിയോ വൈറലായതിന് പിന്നാലെ, മമ്മൂട്ടിക്കെതിരെ സൈബര് ആക്രമണം രൂക്ഷമായി ഇടത് സഹയാത്രികനായ മമ്മൂട്ടി, ജില്ലാ സെക്രട്ടറിയോട് ഇങ്ങനെ പെരുമാറാന് പാടില്ലായിരുന്നു എന്നാണ് വിമര്ശനം.
