ന്യൂദല്ഹി: വലിയൊരു മാറ്റത്തിന് ഇന്ത്യയുടെ നാവിക സേന സാക്ഷ്യം വഹിക്കുകയാണ്. 54 വര്ഷത്തോളം കോണ്ഗ്രസ് ഇന്ത്യ ഭരിച്ചെങ്കിലും പ്രതിരോധ രംഗത്ത് പുറം രാജ്യങ്ങളില് നിന്നും ആയുധങ്ങളും സാങ്കേതിക വിദ്യയും പണം കൊടുത്ത് വാങ്ങുക എന്നതിനപ്പുറം ചിന്തിച്ചിരുന്നില്ല. ഇന്ത്യയുടെ നാവികസേനയും അതിന്റെ ഭാഗമായിരുന്നു.
അങ്ങിനെ ഇന്ത്യ വാങ്ങുന്നവരുടെ നാവികസേനയായായിരുന്നു ഇതുവരെ. ആയുധക്കച്ചവടക്കാര് കോണ്ഗ്രസ് ഭരണത്തില് ദല്ഹിയില് കറങ്ങിനടന്നു. കോണ്ഗ്രസ് മന്ത്രിമാരെ പിടിച്ച് വന്തുക കൈക്കൂലി വാഗ്ദാനം ചെയ്ത് ആയുധങ്ങള് ഒറിജിനല് വിലയുടെ പല ഇരട്ടിതുകയ്ക്ക് വിറ്റു. കോണ്ഗ്രസ് ഭരണകാലത്തെ ബോഫോഴ്സ് തോക്ക് വിവാദം ഇതിന് ഉദാഹരണമാണ്. ക്വത്റോച്ചി എന്ന ആയുധക്കച്ചവടക്കാരനെ രാജീവ് ഗാന്ധിയുടെ അടുത്തെത്തിച്ചത് സോണിയാഗാന്ധിയായിരുന്നുവെന്ന് വരെ ആരോപണമുണ്ട്.
പക്ഷെ മോദി സര്ക്കാര് 2014 ല് വന്നതിന് ശേഷം കാര്യങ്ങള് മാറുകയാണ്. നാവികസേനയെ കഴിഞ്ഞ 10 വർഷമായി സമുദ്ര പ്രതിരോധത്തിലും അനുബന്ധ മേഖലകളിലും വൻ വളർച്ചയാണ് ഉണ്ടായത്. നാവികസേനയ്ക്ക് വേണ്ട യുദ്ധക്കപ്പലുകള് പൂര്ണ്ണമായും ഇന്ത്യയില് നിര്മ്മിക്കുന്ന രീതിയില് ഇന്ത്യ ആത്മനിര്ഭര് നാവികസേനയാക്കി മാറ്റാനുള്ള ശ്രമത്തിലാണ് ഇന്ത്യ. സ്പെയര്പാര്ട്സുകള് വരെ ഇന്ത്യയില് തന്നെ നിര്മ്മിക്കുന്ന സമ്പൂര്ണ്ണ ആത്മനിര്ഭരത. കോണ്ഗ്രസ് ഇന്ത്യയെ വാങ്ങുന്നവരുടെ നാവികസേനയാക്കി മാറ്റിയെങ്കില്, മോദി സര്ക്കാര് അതിനെ “ഇന്ത്യയിൽ നിർമ്മിക്കുന്ന ബിൽഡർമാരുടെ നാവികസേനയാക്കി മാറ്റിക്കൊണ്ടിരിക്കുകയാണ്. 2047ഓടെ നാവികസേനയ്ക്ക് വേണ്ടി ഒന്നും വിദേശത്ത് നിന്നും ഇറക്കുമതി ചെയ്യേണ്ടാത്ത സ്ഥിതിയിലേക്ക് മാറ്റുകയാണ് ലക്ഷ്യം. പൂര്ണ്ണമായും തദ്ദേശീയമായ നാവിക സാങ്കേതികവിദ്യ, മുങ്ങിക്കപ്പലായാലും യുദ്ധക്കപ്പലായാലും തദ്ദേശീയമായ ഉല്പാദനപ്ലാറ്റ് ഫോം വികസിപ്പിക്കുക എന്നിവയാണ് ലക്ഷ്യം. ഈ ആത്മനിര്ഭര് നാവികസേന സൃഷ്ടിക്കുന്നതിന്റെ ചില ഉദാഹരണങ്ങളാണ് തദ്ദേശീയ വിമാനവാഹിനിക്കപ്പലായ ഐഎന്എസ് വിക്രാന്തിന്റെ നിർമ്മാണം, മുങ്ങിക്കപ്പലുകളെ തകര്ക്കാനുള്ള യുദ്ധക്കപ്പലായ ഐഎൻഎസ് മാഹിയുടെ നിര്മ്മാണം, ശക്തി എന്ന ഇലക്ട്രോണിക് യുദ്ധ സംവിധാനം, വരുണാസ്ത്ര എന്ന ടോർപ്പിഡോകളുടെ നിര്മ്മാണം എന്നിവ.
ഇക്കാര്യം കഴിഞ്ഞ ദിവസം ദ വീക്ക് സംഘടിപ്പിച്ച നാവികസേനയുമായി ബന്ധപ്പെട്ട സമ്മേളനത്തില് ജിആർഎസ്ഇയുടെ ചെയർമാനും മാനേജിംഗ് ഡയറക്ടറുമായ (സിഎംഡി) കൊമോഡോർ പി. ആർ. ഹരി ഇന്ത്യയുടെ നാവികസേനാരംഗത്ത് വന്ന മാറ്റം വ്യക്തമായി ചൂണ്ടിക്കാണിക്കുകയുമുണ്ടായി.
ഇന്ത്യയുടെ സമുദ്ര മഹത്വം വീണ്ടെടുക്കാന് ഇന്ത്യന് നാവികസേന
ഒരു കാലത്ത് ഭാരത ഒരു സാമുദ്രിക ശക്തിയായിരുന്നു. തെക്കുകിഴക്കൻ ഏഷ്യ, മെസൊപ്പൊട്ടേമിയ, റോമൻ സാമ്രാജ്യം എന്നിവയിലേക്ക് സമുദ്ര ബന്ധങ്ങൾ വ്യാപിക്കുന്നതിനാൽ, നൂറ്റാണ്ടുകളായി ഇന്ത്യ ആഗോള വ്യാപാരത്തിന്റെ ഒരു പ്രധാന കേന്ദ്രമായിരുന്നുവെന്ന് പ്രതിരോധമന്ത്രി രാജ് നാഥ് സിങ്ങ്. ദി വീക്ക് സംഘടിപ്പിച്ച ഉന്നതതല സമുദ്ര പ്രതിരോധ പരിപാടിയില് പങ്കെടുത്ത് സംസാരിക്കുകയായിരുന്നു രാജ് നാഥ് സിങ്ങ്.
പുരാതന സമുദ്ര ജ്ഞാനത്തെ ആധുനിക സാങ്കേതികവിദ്യയുമായി സംയോജിപ്പിക്കേണ്ടത് അത്യാവശ്യമാണ്. പക്ഷെ വ്യാപാരത്തിന് മാത്രമല്ല, ദേശീയ സുരക്ഷ, സാമ്പത്തിക വളർച്ച, തന്ത്രപരമായ സ്വയംഭരണം എന്നിവയ്ക്കും സമുദ്ര മേഖല ഇന്ന് അത്യന്താപേക്ഷിതമാണെന്നും രാജ് നാഥ് സിങ്ങ് പറഞ്ഞു.
ഇന്ത്യൻ സുരക്ഷാ സംവിധാനങ്ങൾ ശരിയായ ദിശയിലേക്ക് നീങ്ങുന്നു എന്നതിന്റെ തെളിവാണ് ഓപ്പറേഷൻ സിന്ദൂരിന്റെ വിജയം. പ്രതിരോധത്തിൽ സ്വയംപര്യാപ്തത കൈവരിക്കലാണ് പ്രധാനം എന്നും അദ്ദേഹം പറഞ്ഞു.
പ്രതിരോധ നിർമ്മാണത്തിൽ സ്വാശ്രയത്വത്തിന്റെ പ്രാധാന്യം ഊന്നിപ്പറഞ്ഞു, “അനിശ്ചിതത്വത്തിന്റെ ഈ കാലഘട്ടത്തിൽ, വിതരണ ശൃംഖല തടസ്സങ്ങൾ ഒഴിവാക്കാനുള്ള ഏക മാർഗം ആത്മനിർഭർതയിലൂടെയാണ്” രാജ് നാഥ് സിങ്ങ് പറഞ്ഞു.
പ്രമുഖ യുദ്ധക്കപ്പൽ നിർമ്മാതാക്കളായ ജിആർഎസ്ഇ (ഗാർഡൻ റീച്ച് ഷിപ്പ് ബിൽഡേഴ്സ് ആൻഡ് എഞ്ചിനീയേഴ്സ്) എന്നിവരുമായി സഹകരിച്ച് ഭാരത് ഫോർജ്, ഇന്ത്യൻ രജിസ്റ്റർ ഓഫ് ഷിപ്പിംഗ് (ഐആർക്ലാസ്), മറൈൻ ഇലക്ട്രിക്കൽസ്, മസഗോൺ ഡോക്ക് ഷിപ്പ് ബിൽഡേഴ്സ് ലിമിറ്റഡ് (എംഡിഎൽ), ടിറ്റഗഡ് റെയിൽ സിസ്റ്റംസ് ലിമിറ്റഡ് എന്നിവ ഈ പരിപാടിയില് പങ്കെടുത്തു.
ഭാരത് ഫോർജിന്റെ ചെയർമാനും മാനേജിംഗ് ഡയറക്ടറുമായ ബാബ കല്യാണി, ശക്തമായ ഒരു വിതരണ ശൃംഖല ഉണ്ടായിരിക്കേണ്ടതിന്റെ പ്രാധാന്യം അടിവരയിട്ടു. “നമ്മൾ നവീകരണം, തദ്ദേശീയ രൂപകൽപ്പന, വികസനം, നിർമ്മാണം, സഹ-സൃഷ്ടി, സഹ-ഉൽപ്പാദനം എന്നിവയുടെ ഒരു യുഗത്തിലേക്ക് പ്രവേശിക്കുകയാണ്. നമ്മുടെ സമുദ്ര സുരക്ഷയും പരമാധികാരവും സമ്പൂർണ്ണമായി തുടരുന്നുവെന്ന് ഉറപ്പാക്കാൻ, ഇന്ത്യൻ വ്യവസായം കൃത്രിമബുദ്ധി, നിരീക്ഷണം, ആളില്ലാ പ്ലാറ്റ്ഫോമുകൾ മുതൽ ആയുധങ്ങൾ വരെ പ്രത്യേക സാങ്കേതികവിദ്യകൾ നൽകണം,” അദ്ദേഹം പറഞ്ഞു.
ഇന്ത്യയെ യഥാർത്ഥത്തിൽ സ്വയംപര്യാപ്തമാക്കുന്നതിനും ‘മാരിടൈം ഇന്ത്യ വിഷൻ 2030’ ൽ നിശ്ചയിച്ചിട്ടുള്ള ലക്ഷ്യങ്ങൾ കൈവരിക്കുന്നതിനും ആഗോള സമുദ്ര ശക്തികേന്ദ്രമായി സ്വയം സ്ഥാപിക്കുന്നതിനും കൂടുതൽ ശ്രദ്ധയും സാങ്കേതിക സ്വീകാര്യതയും ആവശ്യമാണെന്ന് തുറമുഖ, ഷിപ്പിംഗ്, ജലപാത മന്ത്രാലയത്തിലെ സ്പെഷ്യൽ സെക്രട്ടറി രാജേഷ് കുമാർ എടുത്തുപറഞ്ഞു.
ഇന്ത്യയ്ക്ക് അപാരമായ സമുദ്ര സാധ്യതകളുണ്ടെന്ന് ചൂണ്ടിക്കാട്ടിയ തുറമുഖ, ഷിപ്പിംഗ്, ജലപാത മന്ത്രാലയത്തിലെ സഹമന്ത്രി ശാന്തനു താക്കൂർ, തുറമുഖങ്ങൾ ആധുനികവൽക്കരിക്കുന്നതിനും തുറമുഖ കണക്റ്റിവിറ്റി മെച്ചപ്പെടുത്തുന്നതിനും തുറമുഖങ്ങൾ നയിക്കുന്ന വ്യവസായവൽക്കരണം പ്രോത്സാഹിപ്പിക്കുന്നതിനും സർക്കാർ നിരവധി പരിവർത്തന നടപടികൾ സ്വീകരിച്ചിട്ടുണ്ടെന്ന് പറഞ്ഞു. “ഇന്ത്യ അതിന്റെ സമുദ്ര യാത്രയിൽ ഒരു നിർണായക നിമിഷത്തിലാണ്. പ്രധാനമന്ത്രി നരേന്ദ്ര മോദിയുടെ ദർശനം വളരെ വ്യക്തമാണ്: ഇന്ത്യയെ ഒരു ആഗോള സമുദ്ര കേന്ദ്രമായും ഒരു മുൻനിര സമുദ്ര ശക്തിയായും മാറ്റുക. ഇന്നത്തെ പരിപാടിയുടെ പ്രമേയം ഗവൺമെന്റ്, വ്യവസായം, നൂതനാശയക്കാർ, സമുദ്ര പ്രൊഫഷണലുകൾ എന്നിവരുടെ ശക്തമായ പങ്കാളിത്തത്തിലൂടെ ഈ അഭിലാഷത്തെ പൂർണ്ണമായി പകർത്തുന്നു,”- അദ്ദേഹം പറഞ്ഞു.
