കൊച്ചി: ”എറണാകുളത്ത് നിന്ന് വന്ന ഒരുത്തനുണ്ട്…. ഫുള് കഞ്ചാവടിക്കും”.-സിപിഎമ്മിലെ യുവനേതാവിനെക്കുറിച്ച് സിപിഎമ്മിന്റെ പ്രാഥമികഅംഗത്വത്തില് നിന്നും പുറത്താക്കപ്പെട്ട നേതാവ് പി.കെ. ശശി പ്രസംഗിച്ച വാചകം പങ്കുവെച്ച് യുവരാജ് ഗോകുല്. സിപിഎം യുവനേതാവ് ആര്ഷോയുടെ ചിത്രം പങ്കുവെച്ചുകൊണ്ടാണ് യുവരാജ് ഗോകുല് പി.കെ. ശശി പാലക്കാട് നടത്തിയ പ്രസംഗത്തിന്റെ ഭാഗം ഫെയ്സ്ബൂക്കില് പങ്കുവെച്ചത്.
യുവരാജ് ഗോകുല് പങ്കുവെച്ച ഫെയ്സ്ബുക്ക് പോസ്റ്റ്:
സിപിഎം വ്യാഴാഴ്ച പി.കെ. ശശിയെ സിപിഎമ്മിന്റെ പ്രാഥമിക അംഗത്വത്തില് നിന്നും പുറത്താക്കിയതിന് പിന്നാലെയാണ് യുവരാജ് ഗോകുല് ഇക്കാര്യം പങ്കുവെച്ചത്. ഒരു കാലത്ത് വിഎസ് ഗ്രൂപ്പിനെ പാലക്കാട് ജില്ലയില് വെട്ടിനിരത്തി പിണറായിയെ സംരക്ഷിച്ച നേതാവാണ് പി.കെ. ശശി. പാര്ട്ടിയില് നിന്നും പുറത്താക്കപ്പെട്ടതോടെ പി.കെ. ശശിയും പാര്ട്ടിയിലെ പുത്തന് ദുഷ്പ്രവണതകള്ക്കെതിരെ ആഞ്ഞടിക്കാന് തുടങ്ങിയിരിക്കെ യുവരാജ് ഗോകുലിന്റെ ഈ ഫെയ്സ് ബുക്ക് പോസ്റ്റ് വൈറലാണ്.
ആര്ഷോയെപ്പറ്റി പി.കെ. ശശി പ്രസംഗിച്ച മറ്റൊരു വാചകം കൂടി യുവരാജ് ഗോകുല് പങ്കുവെച്ചിട്ടുണ്ട്. … “ചാരാതെ നിന്നാല് താഴെ വീഴും…. അതുകൊണ്ട് ആരെയെങ്കിലും ചാരി നിന്നേ പ്രസംഗിക്കൂ…. ”- ആര്ഷോയെക്കുറിച്ച് പി.കെ. ശശി പറഞ്ഞ ഈ വാചകവും സമൂഹമാധ്യമങ്ങളില് വൈറലാണ്.
പാര്ട്ടിയുമായി കുറച്ചുകാലമായി ഉടക്കി നില്ക്കുന്ന പി.കെ. ശശി ഈയിടെയാണ് സിപിഎം തന്നെ നല്കിയ കെടിഡിസി ചെയര്മാന് പദവി രാജിവെച്ചത്. പുതിയ പാര്ട്ടി രൂപീകരിക്കുമെന്നും സിപിഎമ്മിനെതിരെ മത്സരിക്കുമെന്നും ഉള്ള അഭ്യൂഹങ്ങള് ഉയരുന്നതിനിടെയാണ് പി.കെ. ശശി പാലക്കാട് നടന്ന വിമതകണ്വെന്ഷനില് പങ്കെടുത്തത്. ഇതോടെയാണ് പി.കെ. ശശിയെ പ്രാഥമിക അംഗത്വത്തില് നിന്നും പുറത്താക്കിയതായി സിപിഎം പാലക്കാട് ജില്ലാ സെക്രട്ടറി പ്രഖ്യാപിച്ചത്. ഇക്കാര്യത്തില് പിണറായി ഇപ്പോഴും മൗനം പാലിക്കുകയാണ്.
