ന്യൂദല്ഹി: ഇറാനെ ആക്രമിക്കാന് സൗകര്യം നല്കിയത് അയല് രാജ്യങ്ങളാണെന്ന് ഇന്ത്യയിലെ ഇറാന് അംബാസഡര് മുഹമ്മദ് ഫത്താലി. ഇറാന് അയല് രാജ്യങ്ങളെ ആക്രമിച്ചിട്ടില്ല.ഇറാനിലെ സ്കൂള് ആക്രമിക്കപ്പെട്ടതും അംബാസഡര് ചൂണ്ടിക്കാട്ടി.ഇന്ത്യയുമായി പണ്ടുകാലം മുതലേ അടുത്ത ബന്ധം ആണ് ഇറാന് ഉള്ളതെന്നും അദ്ദേഹം പറഞ്ഞു.
കൊല്ലപ്പെട്ട പരമോന്നത നേതാവ് ആയത്തൊളള അലി ഖമനേയി തങ്ങളുടെ പിതൃസ്ഥാനീയനാണ്.അദ്ദേഹം നിലകൊണ്ടത് ചരിത്രത്തിലെ ശരിയുടെ ഭാഗത്ത്. ഇറാന് യുദ്ധം ആഗ്രഹിച്ചിട്ടില്ല.യുദ്ധത്തിനും സമാധാനത്തിനും തയാറാണെന്നും സമാധാന ശ്രമങ്ങളെ ഇല്ലാതാക്കിയത് തങ്ങളല്ലെന്നും അംബാസഡര് പറഞ്ഞു.നിലവില് ഒരു ചര്ച്ചകള്ക്കും ഇറാന് തയാറല്ല.
പശ്ചിമേഷ്യ നിരവധി പ്രശ്നങ്ങള് നേരിടുന്നുണ്ട്. പാശ്ചാത്യ ശക്തി പശ്ചിമേഷ്യയുടെ സമ്പത്ത് ഇല്ലാതാക്കാന് ശ്രമിക്കുന്നു. ഈ അവസരത്തില് അമേരിക്കയുമായി സമവായം സാധ്യമല്ല.
ഇറാന്റെ ശേഷിയെ കുറിച്ച് അമേരിക്കയ്ക്ക് അറിയാം. യുദ്ധം അവസാനിപ്പിക്കേണ്ടത് എപ്പോഴെന്ന് തീരുമാനിക്കേണ്ടത് നിലവില് ഇറാന് ആണ്-മുഹമ്മദ് ഫത്താലി പറഞ്ഞു.
നേരത്തേ , ആയത്തൊളള അലി ഖമനേയിയുടെ വധത്തില് ഇന്ത്യ അനുശോചനം രേഖപ്പെടുത്തി.ന്യൂദല്ഹിയിലെ ഇറാന് എംബസിയിലെത്തി വിദേശകാര്യ സെക്രട്ടറി വിക്രം മിസ്രി അനുശോചന പുസ്തകത്തില് ഒപ്പിട്ടു.
ദല്ഹിയിലെ ഇറാന് എംബസിയില് ദുഃഖാചരണം നടക്കുകയാണ്. നയതന്ത്രജ്ഞര്ക്ക് അനുശോചനം രേഖപ്പെടുത്താന് എംബസിയില് പുസ്തകം വച്ചിട്ടുണ്ട്. വ്യാഴം, വെളളി ദിവസങ്ങളിലും ഒന്പതാം തീയതിയും എംബസി സന്ദര്ശിച്ച് അനുശോചനം രേഖപ്പെടുത്താം.റഷ്യന് നയതന്ത്ര ഉദ്യോഗസ്ഥരും അനുശോചനം രേഖപ്പെടുത്തി.
