എസ്.എസ്.എല്‍.സിക്കാര്‍ക്ക് ലൈവ് ഫോണ്‍-ഇന്‍ ക്ലാസുകള്‍, പ്ലസ് വണ്‍, പ്ലസ്ടുവിന് പ്രത്യേക റിവിഷന്‍

തിരുവനന്തപുരം: കൈറ്റ് വിക്ടേഴ്സില്‍ പൊതുപരീക്ഷ എഴുതുന്ന എസ്.എസ്.എല്‍.സി കുട്ടികള്‍ക്ക് സംശയ നിവാരണത്തിന് അവസരം നല്‍കുന്ന ലൈവ് ഫോണ്‍-ഇന്‍ ക്ലാസുകള്‍ മാര്‍ച്ച് 8 മുതല്‍ ആരംഭിക്കും. ഓരോ വിഷയത്തിനും ഒന്നര മണിക്കൂര്‍ ദൈര്‍ഘ്യമാണുണ്ടായിരിക്കുക. പരീക്ഷയുടെ തലേദിവസം വൈകിട്ട് 5.30 നാണ് ലൈവ് ആരംഭിക്കുക. പത്താം ക്ലാസുകാര്‍ക്കായി മാര്‍ച്ച് 8-ന് ഇംഗ്ലീഷ്, 10-ന് ഭാഷാവിഷയങ്ങള്‍, 12-ന് ഹിന്ദി, 15-ന് ഗണിതം, 17-ന് ഫിസിക്സ്, 22-ന് സോഷ്യല്‍ സയന്‍സ്, 24-ന് കെമിസ്ട്രി, 29-ന് ബയോളജി എന്നീ തരത്തിലാണ് തത്സമയം ക്രമീകരിച്ചിരിക്കുന്നത്. ഇതോടൊപ്പം പ്ലസ് വണ്‍, പ്ലസ്ടു വിദ്യാര്‍ത്ഥികള്‍ക്കായി ഒന്നര മണിക്കൂര്‍ റിവിഷന്‍ ക്ലാസുകളും സംപ്രേഷണം നടത്തും. രാവിലെ 8.30, ഉച്ചയ്‌ക്ക് 11 മണി, വൈകുന്നേരം 3 മണി, രാത്രി 8 മണി എന്നിങ്ങനെയാണ് പ്ലസ്ടു റിവിഷന്റെ സമയക്രമം. മാര്‍ച്ച് 5-ന് ഫിസിക്സ്, 6-ന് കമ്പ്യൂട്ടര്‍ സയന്‍സ്, 8-ന് അക്കൗണ്ടന്‍സി, 9-ന് യഥാക്രമം കെമിസ്ട്രി, ഹിസ്റ്ററി, ബിസിനസ് സ്റ്റഡീസ്, മാര്‍ച്ച് 11-ന് കമ്പ്യൂട്ടര്‍ സയന്‍സും ഭാഷാ വിഷയങ്ങളും, 16-ന് മാത്സ്, 18-ന് ഇക്കണോമിക്സ്, 23-ന് ബോട്ടണി, സുവോളജി, പൊളിറ്റിക്കല്‍ സയന്‍സ്, കമ്പ്യൂട്ടര്‍ ആപ്ലിക്കേഷന്‍സ്, 25-ന് ജ്യോഗ്രഫി, 27-ന് ഇംഗ്ലീഷ് എന്നിങ്ങനെയാണ് സംപ്രേഷണം. എസ്.എസ്.എല്‍.സി, പ്ലസ് വണ്‍, പ്ലസ് ടു പൊതുപരീക്ഷയ്‌ക്ക് വളരെയധികം പ്രയോജനപ്രദമാകുന്ന വിധത്തില്‍ എഴുപതിലധികം റിവിഷന്‍ ക്ലാസുകള്‍ youtube.com/itsvicters ചാനലില്‍ ലഭ്യമാണ്. ലൈവ് ഫോണ്‍-ഇന്‍ പ്രോഗ്രാമിലേയ്‌ക്ക് വിളിക്കേണ്ട ടോള്‍ഫ്രീ നമ്പര്‍: 18004259877.