തിരുവനന്തപുരം: ആറ്റുകാല് പൊങ്കാലയോടനുബന്ധിച്ച് വാഹന പാര്ക്കിങ്ങിന്റെ പേരില് സര്ക്കാര് സ്കൂളില് പിടിഎ പ്രസിഡന്റിന്റെ നേതൃത്വത്തില് തീവെട്ടിക്കൊള്ള. പിടിഎ പ്രസിഡന്റ് കര്ണന്, ഭരണസമിതി അംഗം ഹാഷിം എന്നിവരെ തമ്പാനൂര് പോലീസ് കസ്റ്റഡിയിലെടുത്തു.
ഓവര് ബ്രിഡ്ജിന് സമീപത്തെ ഗവ. എസ്എംവി ഹയര് സെക്കന്ററി സ്കൂളിലാണ് തീവെട്ടിക്കൊള്ള നടന്നത്. പൊങ്കാലക്കാരുമായി വന്ന വാഹനങ്ങള് സ്കൂള് ഗ്രൗണ്ടിലായിരുന്നു പാര്ക്ക് ചെയ്തത്. ചെറിയ വാഹനങ്ങള്ക്ക് 400 രൂപയും വലിയ വാഹനങ്ങള്ക്ക് 1000 രൂപയും പിടിഎ കമ്മിറ്റി പ്രസിഡന്റിന്റെ നേതൃത്വത്തില് ഈടാക്കി. നഗരസഭയുടെ അനുമതി വാങ്ങാതെയാണ് പിരിവ് നടത്തിയത്. ഫീസ് ഈടാക്കുന്നതിന് വ്യാജ രസീതും നല്കി. വിവരം അറിഞ്ഞ് സ്കൂളിലെത്തിയ മേയര് വി.വി. രാജേഷിനോട് നിരവധി ഡ്രൈവര്മാരും പരാതിപ്പെട്ടു. രസീത് പരിശോധിച്ചപ്പോള് വ്യാജമാണെന്ന് കണ്ടെത്തി.
വലുതും ചെറുതുമായ നൂറുകണക്കിന് വാഹനങ്ങള് ഈ സമയം ഗ്രൗണ്ടില് പാര്ക്ക് ചെയ്തിട്ടുണ്ട്. പണപ്പിരിവിന് പിടിഎ കമ്മിറ്റി തീരുമാനിച്ചു എന്നാണ് പിടിഎ പ്രസിഡന്റ് പറഞ്ഞത്. എന്നാല് പ്രിന്സിപ്പലോ ഹെഡ്മാസ്റ്ററോ അറിഞ്ഞിട്ടില്ല. ഇതോടെ കോര്പറേഷന് സെക്രട്ടറിയുടെ പരാതിയെ തുടര്ന്ന് ഇരുവരെയും പോലീസ് കസ്റ്റഡിയില് എടുക്കുകയായിരുന്നു. ഇതിലൂടെ ആയിരക്കണക്കിന് രൂപയുടെ തട്ടിപ്പും നടന്നിട്ടുണ്ടെന്ന് വ്യക്തമാകുന്നു. സമാന സംഭവം കഴിഞ്ഞ ദിവസങ്ങളിലും മേയറുടെ നേതൃത്വത്തില് കണ്ടെത്തി നടപടി സ്വീകരിച്ചിരുന്നു. സിപിഎമ്മുകാര് നേതൃത്വം നല്കുന്നതാണ് പിടിഎ കമ്മിറ്റി. സ്കൂളിന് സമീപത്തെ ഒരു ഹോട്ടലിന് ബാര് ലൈസന്സ് ലഭിക്കുന്നതിനു വേണ്ടി ഈ പിടിഎ കമ്മിറ്റിയുടെ നേതൃത്വത്തില് സ്കൂളിലെ ഗേറ്റ് മാറ്റി സ്ഥാപിച്ചത് വിവാദമായിരുന്നു.
