ടെഹ്റാന്: വടക്കന് ടെഹ്റാനിലുള്ള ഗാന്ധി ആശുപത്രിക്ക് നേരെ ഇസ്രയേല് വ്യോമാക്രമണം. ഞായറാഴ്ച ആക്രമണം നടന്നതായി ഇറാനിയന് വാര്ത്താ ഏജന്സിയായ ഐഎസ്എന്എയാണ് റിപ്പോര്ട്ട് പുറത്തുവിട്ടത്. ആശുപത്രിയെ ലക്ഷ്യമിട്ടതിനെ സയണിസ്റ്റ്-അമേരിക്കന് വ്യോമാക്രമണങ്ങള് എന്നാണ് ഐഎസ്എന്എ വിശേഷിപ്പിച്ചത്. ആക്രമണത്തിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്.
വ്യോമാക്രമണത്തില് ആശുപത്രിക്ക് കാര്യമായ നാശനഷ്ടം സംഭവിച്ചിട്ടുണ്ടെങ്കിലും മരണങ്ങള് റിപ്പോര്ട്ട് ചെയ്തിട്ടില്ല. ഇവിടെ നിന്ന് രോഗികളെയെല്ലാം ഒഴിപ്പിച്ചു.
ഇറാനെതിരെയുള്ള സൈനിക നടപടികള് ഇസ്രയേലും യുഎസും ശക്തമാക്കി കഴിഞ്ഞു. ടെഹ്റാനിന്റെ മധ്യഭാഗങ്ങളിലേക്ക് ആക്രമണം വ്യാപിപ്പിക്കുകയാണെന്ന് ഇസ്രായേല് പ്രഖ്യാപിച്ചു. ടെഹ്റാനിലുള്ള സര്ക്കാര് കേന്ദ്രങ്ങളില് ഒരേസമയം 100 ഫൈറ്റര് ജെറ്റുകള് ആക്രമണം നടത്തിയതായി ഇസ്രയേല് പ്രതിരോധ സേന വക്താവ് ബ്രിഗേഡിയര് ജനറല് എഫി ഡെഫ്രിന് അറിയിച്ചു. ഇറാന്റെ വ്യോമസേന, മിസൈല് കമാന്ഡ്, ആഭ്യന്തര സുരക്ഷാ സേനയുടെ ഓഫീസ് എന്നിവിടങ്ങളിലും ഇസ്രയേല് ആക്രമണം നടത്തി. ഇതിന് മറുപടിയായി സൗദി തലസ്ഥാനം, ദുബായ് തുടങ്ങിയ ഗള്ഫ് മേഖലകളിലെ യുഎസ് സൈനിക താവളങ്ങള് ലക്ഷ്യമാക്കി ഇറാന് മിസൈലുകളും ഡ്രോണുകളും വിക്ഷേപിച്ചു.
