തിരുവനന്തപുരം: തിരുവനന്തപുരം നഗരത്തിലെ കുടിവെള്ളക്ഷാമത്തില് സംസ്ഥാന സര്ക്കാര് രാഷ്ട്രീയം കളിക്കുകയാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ശബരിമല തീര്ത്ഥാടകരോട് കാണിച്ച വിവേചനമാണ് ആറ്റുകാലിലും ചെയ്യുന്നതെന്ന് അദ്ദേഹം വാര്ത്താസമ്മേളനത്തില് പറഞ്ഞു.
ആറ്റുകാല് പൊങ്കാല മഹോത്സവം അടുത്തുനില്ക്കെ, നഗരത്തിലെ ഭക്തജനങ്ങളെയും സാധാരണക്കാരെയും ഒരുപോലെ ദുരിതത്തിലാക്കുന്ന നടപടിയാണ് സര്ക്കാരിന്റെയും വാട്ടര് അതോറിറ്റിയുടെയും ഭാഗത്തുനിന്നുണ്ടാകുന്നത്. ശബരിമല തീര്ത്ഥാടകര്ക്കെതിരെ ഉണ്ടായതിന് സമാനമായ വിവേചനവും ദ്രോഹവുമാണ് ആറ്റുകാല് ഭക്തജനങ്ങള്ക്കെതിരെയും നടക്കുന്നത്. ഇത് ബോധപൂര്വം സൃഷ്ടിച്ച ഒരു പ്രതിസന്ധിയാണെന്ന് സംശയിക്കുന്നതായും രാജീവ് ചന്ദ്രശേഖര് പറഞ്ഞു. കഴിഞ്ഞ പത്ത്കൊല്ലം കേരളം ഭരിച്ചിട്ട് 20 ലക്ഷം കോടി രൂപ ചെലവഴിച്ച പിണറായി സര്ക്കാര് തലസ്ഥാന നഗരത്തിലെ കുടിവെള്ള പ്രശ്നം പരിഹരിക്കാന് എന്താണ് ചെയ്തതെന്നും അദ്ദേഹം ചോദിച്ചു. കേന്ദ്രസര്ക്കാര് നല്കിയ ജല് ജീവന് മിഷന്റെ പണം കൊണ്ട് എന്തുകൊണ്ടാണ് ഇതിന് പരിഹാരം കാണാത്തത്. ബിജെപി ഇതിനെതിരെ ശക്തമായി പ്രതിഷേധിക്കുമെന്നും അദ്ദേഹം പറഞ്ഞു.
ജനങ്ങളെ വഡ്ഢിയാക്കുന്ന രാഷ്ട്രീയമാണ് കോണ്ഗ്രസും സിപിഎമ്മും നടത്തുന്നത്. കോണ്ഗ്രസും സിപിഎമ്മും തമിഴ്നാട്ടില് ജമാഅത്തെ ഇസ്ലാമിയുമായും എസ്ഡിപിഐയുമായും ചങ്ങാത്തം കൂടിയിരിക്കുന്നു.
മുമ്പ് രഹസ്യ ചങ്ങാത്തമായിരുന്നെങ്കില് ഇപ്പോള് പരസ്യ ചങ്ങാത്തമായി. കൈയില് ഭരണഘടന പിടിച്ചിട്ട് ഭരണഘടന സംരക്ഷിക്കണം എന്ന് പറഞ്ഞ് നടക്കുന്ന ഇവര് ഭരണഘടന വിരുദ്ധ പ്രവര്ത്തനം നടത്തുന്നവരുമായി കൂട്ടുകൂടുകയാണ്. ഇത് ജനങ്ങള് മനസിലാക്കണം. രാഷ്ട്രീയ ഇരട്ടകളായ സിപിഎമ്മിന്റെയും കോണ്ഗ്രസിന്റെയും ക്രിമിനല് രാഷ്ട്രീയം ജനങ്ങള് തിരിച്ചറിയുമെന്നും രാജീവ് ചന്ദ്രശേഖര് പറഞ്ഞു.
