കൊല്ക്കത്ത: ബംഗാള് നിയമസഭാ തെരഞ്ഞെടുപ്പ് പ്രചാരണത്തിന്റെ ഭാഗമായുള്ള പരിവര്ത്തന് യാത്രയ്ക്ക് തുടക്കമായി. കൂച്ച് ബെഹാറിലെ റാസ് മേള മൈതാനിയില് നടന്ന ചടങ്ങില് ബിജെപി ദേശീയ അധ്യക്ഷന് നിതിന് നബിന് യാത്രയുടെ ഉദ്ഘാടനം നിര്വഹിച്ചു. സംസ്ഥാനത്തെ മാറ്റത്തിനുള്ള തുടക്കമാണ് പരിവര്ത്തന് യാത്രയിലൂടെ കുറിക്കുന്നതെന്നും വരുന്ന തെരഞ്ഞെടുപ്പ് സംസ്ഥാനത്തിന്റെ ഭാവി നിര്ണയിക്കുമെന്നും നിതിന് നബിന് പറഞ്ഞു.
ബംഗാളിലെ വോട്ടര്പട്ടികയില് 50 ലക്ഷത്തിലധികം നുഴഞ്ഞുകയറ്റക്കാര് കടന്നുകൂടിയിരുന്നു. എസ്ഐആറില് ഇവരെയെല്ലാം കണ്ടെത്തി ഒഴിവാക്കി. സംസ്ഥാനത്തെ അനധികൃത കുടിയേറ്റക്കാര്ക്കുള്ള സമയം കഴിഞ്ഞു. യഥാര്ത്ഥ പൗരന്മാര്ക്കുള്ള സര്ക്കാര് ജോലികളും ക്ഷേമ ആനുകൂല്യങ്ങളും തട്ടിയെടുത്തുകൊണ്ടാണ് അവര് ബംഗാളില് കഴിഞ്ഞിരുന്നത്. ഇനി അത് അനുവദിച്ച് തരില്ല. ഈ നുഴഞ്ഞുകയറ്റക്കാര് നിയമാനുസൃത പൗരന്മാരുടെ അവകാശങ്ങള് ലംഘിക്കുക മാത്രമല്ല, രാജ്യത്തിന്റെ സുരക്ഷയെ അപകടത്തിലാക്കുകയും ചെയ്തു, നിതിന് നബിന് കൂട്ടിച്ചേര്ത്തു.
കേന്ദ്രമന്ത്രിമാരായ ധര്മേന്ദ്ര പ്രധാന്, അന്നപൂര്ണ്ണ ദേവി, മുന് കേന്ദ്രമന്ത്രി സ്മൃതി ഇറാനി, മുന് സംസ്ഥാന അധ്യക്ഷന് ദിലീപ് ഘോഷ് എന്നിവര് പങ്കെടുത്തു. നാദിയയിലെ കൃഷ്ണനഗറിലും നബദ്വിപ്പിലും നടന്ന പരിവര്ത്തന് യാത്രയില് കേന്ദ്രമന്ത്രിയും മുന് ബിജെപി അഖിലേന്ത്യാ അധ്യക്ഷനുമായ ജെ. പി. നഡ്ഡ, കേന്ദ്രമന്ത്രി സുകാന്ത മജുംദാര്, മുന് കേന്ദ്ര സെക്രട്ടറി രാഹുല് സിന്ഹ എന്നിവര് പങ്കെടുത്തു. ഓരോ ജില്ലകളിലും ബിജെപി നേതാക്കള് യാത്രയുടെ ഭാഗമാകും. അതേസമയം ഡോല് യാത്ര, ഹോളി എന്നിവ പ്രമാണിച്ച് ചൊവ്വ, ബുധന് ദിവസങ്ങളില് പരിവര്ത്തന് യാത്രയുണ്ടാകില്ലെന്ന് ബിജെപി അറിയിച്ചു.
