തിരുവനന്തപുരം: സമരത്തിലുള്ള സര്ക്കാര് മെഡിക്കല് കോളേജ് ഡോക്ടര്മാര്ക്ക് ശമ്പള കുടിശികയിനത്തില് നല്കാനുള്ളത് 405 കോടി രൂപ. നാലുവര്ഷത്തെയും 9 മാസത്തെയും ശമ്പള കുടിശ്ശികയാണിത്. ഈ സര്ക്കാര് അധികാരത്തിലേറിയ കാലംമുതലുള്ള ഈ കുടിശിക അടുത്ത തെരഞ്ഞെടുപ്പ് അടുത്തിട്ടും കൊടുക്കാന് കഴിഞ്ഞിട്ടില്ല. ഇത്രയും തുക കണ്ടെത്താന് കഴിയില്ലെന്നുള്ളതുകൊണ്ടാണ് സമരം ഒത്തുതീര്പ്പാക്കാന് കഴിയാത്തത് . ഒന്നരവര്ഷത്തെ കുടിശിക ഇപ്പോള് പ്രഖ്യാപിക്കാമെന്നാണ് നിലവില് സര്ക്കാര് പറയുന്നത് .അക്കാര്യത്തില് ഡോക്ടര്മാര് നിലപാട് വ്യക്തമാക്കിയിട്ടില്ല. ആര്ട്സ് ആന്ഡ് സയന്സ് കോളേജ് അധ്യാപകര്ക്ക് ശമ്പള കുടിശ്ശിക നല്കാനുണ്ടായിരുന്നു ഒന്നരവര്ഷത്തെ കുടിശികയാണ് അവര്ക്ക് പ്രഖ്യാപിച്ചത്. കോടതി ഇടപെടല് ഉണ്ടായതോടെ ബാക്കി തുക നല്കുന്നത് മുടങ്ങിയിരുന്നു. ഡോക്ടര്മാര്ക്കും ഒന്നരവര്ഷത്തെ കുടിശിക നല്കാമെന്ന് ആരോഗ്യവകുപ്പ് പറയുന്നത് ഈ കോടതി വിധിയുടെ ചുവടു പിടിച്ചാണ്.
