തിരുവനന്തപുരം: ആറ്റുകാല് പൊങ്കാലയ്ക്കുള്ള ഒരുക്കങ്ങള് പൂര്ത്തിയായതായി ആറ്റുകാല് ക്ഷേത്ര ട്രസ്റ്റ് ഭാരവാഹികള് പത്രസമ്മേളനത്തില് അറിയിച്ചു.
കൂടാതെ താലപ്പൊലി നേര്ച്ചക്കാര് ഉച്ചയ്ക്ക് 1.30 മുമ്പായി ദേവി ദര്ശനം പൂര്ത്തിയാക്കണം. തിരക്ക് നയന്ത്രിക്കാന് താലപ്പൊലി കുട്ടികളുടെ കൂടെ രണ്ട് പേര് മാത്രം ദര്ശനം നടത്താന് ശ്രദ്ധിക്കണം. 3.10നാണ് നട അടയ്ക്കുന്നതെങ്കിലും അതിന് മുമ്പ് വിവിധ ചടങ്ങുകള് നടത്തേണ്ടതായിട്ടുണ്ട്. അതിനാല് 1.30 മണിവരെ മാത്രം ദര്ശനം പരിമിതപ്പെടുത്തേണ്ടി വരും. തുടര്ന്ന് 7 മണിക്ക് നട തുറക്കുമ്പോള് ചൂരല്കുത്ത് ചടങ്ങ് നടക്കുന്ന സമയത്തും ദര്ശന നിയന്ത്രണമുണ്ടാകും. ചുരുക്കത്തില് ഉച്ചയ്ക്ക് ഒന്നര മണിക്ക് ശേഷം ദര്ശനസമയം വളരെ കുറച്ചു മാത്രമേ ഉണ്ടായിരിക്കൂ എന്നതിനാല് ഭക്തര് ഉച്ചയ്ക്ക് 1.30 മുമ്പായി ക്ഷേത്ര ദര്ശനം നടത്താന് ശ്രമിക്കണമെന്ന് ട്രസ്റ്റ് ഭാരവാഹികള് അറിയിച്ചു.
പൊങ്കാല മഹോത്സവത്തിന്റെ സുഗമമായ നടത്തിപ്പിന് നേതൃത്വം നല്കുന്നത് 132 പേരടങ്ങുന്ന കമ്മറ്റിയാണ്. കൂടാതെ അക്കോമഡേഷന്, കുത്തിയോട്ടം, മീഡിയ ആന്റ് ഇന്ഫര്മേഷന്, മെസ്സ്, പ്രസാദ ഊട്ട്, പ്രൊസഷന് ആന്റ് താലപ്പൊലി, പ്രോഗ്രാം, റിസപ്ഷന്, വോളന്റിയേഴ്സ് തുടങ്ങിയ കമ്മറ്റികളും പ്രവര്ത്തിക്കുന്നുണ്ട്.
അതേസമയം ആറ്റുകാലമ്മയുടെ പൊങ്കാല ആഘോഷത്തിലമര്ന്ന് തലസ്ഥാനം. അനന്തപുരി യാഗശാലയാകാന് ഇനി രണ്ടു നാള്. നാളെ നഗരത്തിലാകെ കലാപരിപാടികളാലും ആഘോഷമേളങ്ങളാലും നിറയും റസിഡന്റ്സ് അസോസിയേഷനുകള്, തൊഴിലാളി കൂട്ടായ്മകള്, പൗരസമിതിക്കാര് തുടങ്ങിവരുടെ നേതൃത്വത്തില് പൊങ്കാലയ്ക്കുള്ള ഒരുക്കങ്ങള് തുടങ്ങി.
ആറ്റുകാല് ഭഗവതി ക്ഷേത്രത്തില് ഭക്തരുടെ വന് തിരക്കാണ് അനുഭവപ്പെട്ടത്. പുലര്ച്ചെ മുതല് നല്ല തിരക്ക് അനുഭവപ്പെട്ടു. മണിക്കൂറുകള് വരിനിന്നാണ് ഭക്തര് തൊഴുതു മടങ്ങിയത്. തിരക്ക് നിയന്ത്രിക്കാന് പൊലീസ് കൂടുതല് ക്രമീകരണങ്ങള് ഏര്പ്പെടുത്തിയിട്ടുണ്ട്. നാരങ്ങാവിളക്ക് തെളിച്ച് പ്രാര്ത്ഥിക്കാനും തിരക്കുണ്ടായിരുന്നു. ഇന്നും നാളെയും തിരക്ക് ക്രമാതീതമായി വര്ദ്ധിക്കുമെന്നാണ് കരുതുന്നത്. ഭക്തര്ക്ക് ദര്ശനത്തിനുള കൂടുതല് സൗകര്യങ്ങള് ഒരുക്കിയിട്ടുണ്ടെന്ന് ട്രസ്റ്റ് അധികൃതര് അറിയിച്ചു. അംബ, അംബിക, അംബാലിക ഓഡിറ്റോറിയങ്ങളില് നടക്കുന്ന വിവിധ കലാപരിപാടികള് ആസ്വദിക്കുന്നതിനും ധാരാളം ഭക്തര് എത്തിയിരുന്നു.
അധികാരത്തിന്റെ ലഹരിയില് പാണ്ഡ്യരാജാവ് കോവലനെ ചിലമ്പ് മോഷ്ടിച്ചുഎന്ന കുറ്റം ചുമത്തി വധിക്കുന്ന ഭാഗമാണ് തോറ്റം പാട്ടുകാര് ഇന്നലെ പാടിയത്. ഇന്ന്കോവലന്റെ മരണ വാര്ത്തയറിഞ്ഞ ദേവി കൈലാസത്തില് പോയി പരമശിവനില് നിന്നും വരം വാങ്ങി കോവലനെ ജീവിപ്പിക്കുന്നു. ദുഖസൂചകമായി ഇന്ന് ആറ്റുകാല് ക്ഷേത്ര നട രാവിലെ താമസിച്ചാണ് തുറന്നത്.
