നെടുമങ്ങാട്: വെള്ളനാട് പഞ്ചായത്ത് പ്രസിഡന്റും സിപിഎം നേതാവുമായ വെള്ളനാട് ശശി വീടിനുള്ളില് കയറിയ മുള്ളന് പന്നിയെ അടിച്ചുകൊന്നു. വാളിയറ ആശ്രമത്തിനടുത്ത് തിരുവാതിരയില് രജിതാദേവിയുടെ വീട്ടില് കണ്ട മുള്ളന്പന്നിയേയാണ് കൊന്നത്. സംഭവത്തെ തുടര്ന്ന് ഷെഡ്യൂള് ഒന്നില്പ്പെട്ട സംരക്ഷിത വന്യജീവിയെ കൊന്നതിനാല് ഇയാള്ക്കെതിരെ വനം നിയമപ്രകാരം കേസ് എടുത്തു.
ഇന്നലെ രാവിലെ 7നാണ് സംഭവം. മുള്ളന് പന്നിയെ കണ്ടയുടനെ വാര്ഡ് മെമ്പറെ വിവരം അറിയിച്ചു, മെമ്പര്, പ്രസിഡന്റിനെയും വനം വകുപ്പിനെയും അറിയിച്ചിരുന്നു. പ്രസിഡന്റ് ശശി ഈ വീട്ടിലെത്തി. മുള്ളന് പന്നിയെ തല്ലിക്കൊല്ലാന് ശ്രമിച്ചപ്പോള് വനം വകുപ്പിനെ അറിയിച്ചിട്ടുണ്ടെന്ന കാര്യം നാട്ടുകാര് അറിയിച്ചു. എന്നാല് അവര് ഇതിനെ കൊല്ലാതെ രക്ഷപ്പെടുത്തികൊണ്ടുപോകുമെന്ന് പറഞ്ഞ് അടിച്ചുകൊന്നു. വനം വകുപ്പ് ആര്ആര്ടി റോഷ്നി എത്തിയപ്പോഴേക്കും തലപൊട്ടി രക്തം ഒലിച്ച് ചത്തുകിടക്കുന്ന നിലയിലായിരുന്നു മുള്ളന് പന്നി. തുടര്ന്ന് പരുത്തിപ്പള്ളി വനം വകുപ്പ് റെയിഞ്ച് ഓഫീസര് ശ്രീജുവിന്റെ നേതൃത്വത്തിലുള്ള സംഘം ശശിയെ അറസ്റ്റ് ചെയ്യാനായി പഞ്ചായത്ത് ഓഫീസില് എത്തിയപ്പോള് വെള്ളനാട് എല്പി സ്കൂളിലുണ്ടെന്ന് അറിഞ്ഞു. ഉദ്യോഗസ്ഥര് സ്കൂളിലെത്തിയപ്പോഴേക്കും അവിടെ നിന്നും പഞ്ചായത്തിന്റെ വാഹനത്തില് രക്ഷപ്പെട്ടിരുന്നു. വനം വകുപ്പ് പഞ്ചായത്ത് വാഹനത്തെ പിന്തുടര്ന്നെങ്കിലും ഇടയ്ക്ക് വച്ച് വാഹനത്തില് നിന്നും ഇറങ്ങി രക്ഷപ്പെട്ടു.
