ആലപ്പുഴ: കാര്ഷിക മേഖലയില് പണിയെടുത്തിരുന്ന സിഐടിയുവില് അംഗങ്ങളായിരുന്ന 56 തൊഴിലാളികള് ബിഎംഎസില് ചേര്ന്നു.
തകഴി പഞ്ചായത്തില് കേളമംഗലം പ്രദേശത്തെ ഏഴ്, എട്ട് വാര്ഡുകളില് 36 വര്ഷമായി സിഐടിയു നേതൃത്വത്തില് പ്രവര്ത്തിച്ച തൊഴിലാളികളാണ് ബിഎംഎസില് ചേര്ന്നത്. ഇവര് സിപിഎമ്മിന്റെ കെഎസ്കെടിയു അംഗങ്ങളുമായിരുന്നു. ആകെയുള്ള 72 തൊഴിലാളികളില് 56 പേരും ബിഎംഎസില് ചേര്ന്നു. കമ്യൂണിസ്റ്റ് ആശയങ്ങള് രാജ്യപുരോഗതിക്ക് ഉപകരിക്കുന്നതല്ലെന്ന് ബോദ്ധ്യപ്പെട്ടും, തൊഴിലാളിവിരുദ്ധ നടപടികളില് പ്രതിഷേധിച്ചുമാണ് ദേശീയതയില് ഊന്നിയ തൊഴിലാളി പ്രസ്ഥാനമായ ബിഎംഎസില് ചേരാന് തീരുമാനിച്ചതെന്ന് അവര് വ്യക്തമാക്കി.
ബിഎംഎസ് ജില്ലാ സെക്രട്ടറി ജി. ഗോപകുമാര് തൊഴിലാളികളെ ഷാള് അണിയിച്ച് സ്വീകരിച്ചു. ആലപ്പുഴ ജില്ലാ കര്ഷകതൊഴിലാളി സംഘ് ജനറല് സെക്രട്ടറി ജെ. മനോജ്, അമ്പലപ്പുഴ മേഖലാ സെക്രട്ടറി ആര്. പ്രവീണ്കുമാര്, തകഴി പഞ്ചായത്ത് സെക്രട്ടറി ശ്രീകുമാര് എന്നിവര് യോഗത്തില് ആശംസകള് അര്പ്പിച്ചു.
