കവച്: റെയില്‍വേയുടെ സുരക്ഷാ കവചം

ഭാരതത്തിന്റെ റെയില്‍വേ സുരക്ഷാ രംഗത്ത് ഒരു പുതിയ യുഗത്തിന് തുടക്കമിടുകയാണ്. തദ്ദേശീയമായി വികസിപ്പിച്ച ‘കവച്’ (Kavach) എന്ന സ്വയംപ്രവര്‍ത്തന സുരക്ഷാ സംവിധാനവും നിര്‍മിത ബുദ്ധിയും (എഐ) കൈകോര്‍ക്കുമ്പോള്‍ പാളങ്ങളിലെ യാത്ര കൂടുതല്‍ സുരക്ഷിതമാകുന്നു.

എന്താണ് ഈ മാറ്റത്തിന് പിന്നില്‍?
ഇന്ത്യന്‍ റെയില്‍വേയില്‍ ഓരോ യാത്രയും ലക്ഷക്കണക്കിന് മനുഷ്യരുടെ സ്വപ്‌നങ്ങളും പ്രതീക്ഷകളുമാണ്. വര്‍ദ്ധിച്ചുവരുന്ന ഗതാഗതവും ട്രെയിനുകളുടെ വേഗതയും കണക്കിലെടുത്ത് സുരക്ഷയില്‍ വിട്ടുവീഴ്ചയില്ലാത്ത മാറ്റങ്ങളാണ് സര്‍ക്കാര്‍ നടപ്പിലാക്കുന്നത്. 2014-15 കാലഘട്ടത്തില്‍ 135 ആയിരുന്ന ട്രെയിന്‍ അപകടങ്ങള്‍, 2025-26 ആയപ്പോഴേക്കും (നവംബര്‍ വരെ) വെറും 11 ആയി കുറഞ്ഞു എന്നത് ഈ മാറ്റത്തിന്റെ വലിയ വിജയമാണ്.

കവച് : റെയില്‍വേയുടെ സംരക്ഷണ കവചം
ട്രെയിനുകള്‍ തമ്മിലുള്ള കൂട്ടിയിടി തടയാന്‍ രൂപകല്‍പ്പന ചെയ്ത അത്യാധുനിക സംവിധാനമാണ് കവച്. ഇതിന്റെ പ്രധാന പ്രത്യേകതകള്‍:

ഓട്ടോമാറ്റിക് ബ്രേക്കിംഗ്: ലോക്കോ പൈലറ്റ് ശ്രദ്ധിച്ചില്ലെങ്കിലും, അപകടസാഹചര്യങ്ങളില്‍ ട്രെയിന്‍ സ്വയം ബ്രേക്ക് പ്രയോഗിച്ച് നില്‍ക്കുന്നു.

ക്യാബ് സിഗ്‌നലിംഗ്: മൂടല്‍മഞ്ഞോ മഴയോ കാരണം പുറത്തെ സിഗ്‌നലുകള്‍ കാണാന്‍ കഴിയാത്തപ്പോള്‍, ലോക്കോ പൈലറ്റിന്റെ കാബിനുള്ളിലെ ഡിസ്‌പ്ലേയില്‍ സിഗ്‌നല്‍ വിവരങ്ങള്‍ തെളിയുന്നു.

വേഗത നിയന്ത്രണം: വളവുകളിലും മറ്റും അനുവദനീയമായ വേഗതയേക്കാള്‍ കൂടുതല്‍ ട്രെയിന്‍ ഓടിക്കുന്നത് കവച് തടയുന്നു.

പുരോഗതി: നിലവില്‍ 2,200 റൂട്ട് കിലോമീറ്ററുകളില്‍ കവച് സ്ഥാപിച്ചുകഴിഞ്ഞു. ഇതില്‍ ഏറ്റവും പുതിയ കവച് 4.0 പതിപ്പ് 1,300 കിലോമീറ്ററില്‍ കൂടുതല്‍ ദൂരത്തില്‍ പ്രവര്‍ത്തനക്ഷമമാണ്.

നിര്‍മ്മിത ബുദ്ധി (എഐ): ട്രാക്കിലെ ‘ബുദ്ധിയുള്ള’ നിരീക്ഷകന്‍ സുരക്ഷ ഉറപ്പാക്കാന്‍ റെയില്‍വേ ഇപ്പോള്‍ എഐ സാങ്കേതികവിദ്യയെയും വന്‍തോതില്‍ പ്രയോജനപ്പെടുത്തുന്നു: റെയില്‍വേ സ്റ്റേഷനുകളില്‍ സ്ഥാപിച്ചിട്ടുള്ള എഐ ക്യാമറകള്‍ക്ക് സംശയാസ്പദമായ നീക്കങ്ങള്‍ തനിയെ കണ്ടെത്താനും ആള്‍ക്കൂട്ട നിയന്ത്രണത്തില്‍ സഹായിക്കാനും കഴിയും.

‘ഗജരാജ്’: ആനകളെ രക്ഷിക്കാന്‍ എഐ
ആനകളും ട്രെയിനുകളും കൂട്ടിയിടിച്ചുണ്ടാകുന്ന അപകടങ്ങള്‍ ഒഴിവാക്കാന്‍ നടപ്പിലാക്കിയ അതിനൂതന സംവിധാനമാണിത്. വനാതിര്‍ത്തികളിലെ റെയില്‍വേ പാളങ്ങളില്‍ ആനകളുടെ സാന്നിധ്യം തിരിച്ചറിഞ്ഞ് ലോക്കോ പൈലറ്റിന് തത്സമയം മുന്നറിയിപ്പ് നല്‍കുന്നു.

പ്രവര്‍ത്തന രീതി: ട്രാക്കിന് സമീപം പാകിയിരിക്കുന്ന ഒപ്റ്റിക്കല്‍ ഫൈബര്‍ കേബിളുകളിലൂടെ ഉണ്ടാകുന്ന പ്രകമ്പനങ്ങള്‍ എഐ ഉപയോഗിച്ച് വിശകലനം ചെയ്യുന്നു.

കൃത്യത: 200 മീറ്റര്‍ ദൂരപരിധിയില്‍ ആനകളുടെ സാന്നിധ്യം കണ്ടെത്താനും 99.5% കൃത്യതയോടെ അറിയിപ്പ് നല്‍കാനും ഇതിന് കഴിയും.

ഫലം: വടക്കുകിഴക്കന്‍ ഭാരതത്തില്‍ ഇത് നടപ്പിലാക്കിയതോടെ ആന അപകടങ്ങള്‍ 70-ല്‍ നിന്നും 1 ആയി കുറഞ്ഞു.
വീഡിയോ നിരീക്ഷണം: 1,731 സ്റ്റേഷനുകളില്‍ സ്ഥാപിച്ചിട്ടുള്ള എഐ ക്യാമറകള്‍ വഴി അസ്വാഭാവികമായ സാഹചര്യങ്ങളും ആള്‍ക്കൂട്ടവും തിരിച്ചറിയുന്നു.

മുന്‍കൂട്ടിയുള്ള അറ്റകുറ്റപ്പണി: ട്രെയിന്‍ ചക്രങ്ങളിലെയും പാളങ്ങളിലെയും നേരിയ തകരാറുകള്‍ പോലും എഐ ഉപയോഗിച്ച് മുന്‍കൂട്ടി കണ്ടെത്തി പരിഹരിക്കുന്നു.

ഓടിക്കൊണ്ടിരിക്കുന്ന ട്രെയിനുകളുടെ അടിഭാഗം ക്യാമറകള്‍ ഉപയോഗിച്ച് നിരീക്ഷിക്കുകയും ഘടകഭാഗങ്ങള്‍ അയഞ്ഞതോ നഷ്ടപ്പെട്ടതോ ആണെങ്കില്‍ ഉടന്‍ അറിയിപ്പ് നല്‍കുകയും ചെയ്യുന്നു.

ട്രെയിന്‍ ചക്രങ്ങളുടെ തേയ്‌മാനം യാതൊരു സ്പര്‍ശനവുമില്ലാതെ ലേസര്‍/ക്യാമറ സാങ്കേതികവിദ്യ ഉപയോഗിച്ച് അളക്കുന്നു. പാളങ്ങളിലെ ചെറിയ വിള്ളലുകള്‍ പോലും അള്‍ട്രാസോണിക് ഡിറ്റക്ടറുകള്‍ വഴി കണ്ടെത്തുന്നു.

നിക്ഷേപവും ഭാവി പദ്ധതികളും
റെയില്‍വേ സുരക്ഷയ്‌ക്കായുള്ള ബജറ്റ് വിഹിതം വന്‍തോതില്‍ വര്‍ദ്ധിപ്പിച്ചിട്ടുണ്ട്. 2013-14-ല്‍ 39,200 കോടി രൂപയായിരുന്നത് 2025-26-ല്‍ 1,17,693 കോടി രൂപയായാണ് ഉയര്‍ന്നത്. വരാനിരിക്കുന്ന വന്ദേ ഭാരത് 4.0 ട്രെയിനുകളില്‍ കവചിന്റെ ഏറ്റവും പുതിയ പതിപ്പായ 5.0 ഉള്‍പ്പെടുത്താനാണ് ലക്ഷ്യമിടുന്നത്. സാങ്കേതികവിദ്യയും സുരക്ഷാ ബോധവും ഒന്നിക്കുമ്പോള്‍ ഭാരത റെയില്‍വേ ലോകത്തിലെ ഏറ്റവും സുരക്ഷിതമായ റെയില്‍ ശൃംഖലകളിലൊന്നായി മാറും. പാളങ്ങളിലെ ഓരോ യാത്രയും ഇനി കൂടുതല്‍ ആത്മവിശ്വാസത്തോടെയും സമാധാനത്തോടെയും പൂര്‍ത്തിയാക്കാം.