ന്യൂദല്ഹി: എഐ രംഗത്തെ ഭാരതത്തിന്റെ അത്ഭുതകരമായ കഴിവുകള് എഐ ഉച്ചകോടിയിലൂടെ ലോകം കണ്ടെന്ന് പ്രധാനമന്ത്രി നരേന്ദ്ര മോദി. മന് കി ബാത്തില് സംസാരിക്കുകയായിരുന്നു പ്രധാനമന്ത്രി. എഐയുടെ സഹായത്തോടെ, നമ്മുടെ പുരാതന ഗ്രന്ഥങ്ങള്, കൈയെഴുത്ത് പ്രതികള് എന്നിവ എങ്ങനെ സംരക്ഷിക്കുന്നുവെന്നും ഇന്നത്തെ തലമുറയ്ക്ക് അനുയോജ്യമായ രീതിയില് അവ എങ്ങനെ രൂപപ്പെടുത്തുന്നുവെന്നും കണ്ട് ലോക നേതാക്കള് അത്ഭുതപ്പെട്ടതായി പ്രധാനമന്ത്രി പറഞ്ഞു.
കന്നുകാലികളുടെ ചികിത്സയ്ക്കും കണ ക്കെടുപ്പിനും എഐ എങ്ങനെ സഹായിക്കുന്നുവെന്ന് വ്യക്തമാക്കുന്നതും ലോകനേതാക്കളെ ആകര്ഷിച്ചു. ഭാരതം മൂന്ന് മെയ്ഡ് ഇന് ഇന്ത്യ എഐ മോഡലുകള് അവതരിപ്പിച്ചു. ഇതുവരെയുള്ളതില് വച്ച് ഏറ്റവും വലിയ എഐ ഉച്ചകോടിയാണിത്. ഉച്ചകോടിയോടുള്ള യുവാക്കളുടെ ഉത്സാഹവും ആവേശവും പ്രകടമായിരുന്നു. ഉച്ചകോടിയുടെ വിജയത്തില് എല്ലാവരെയും അഭിനന്ദിക്കുന്നുവെന്നും പ്രധാനമന്ത്രി പറഞ്ഞു. കര്ഷകര് ഇപ്പോള് ഉല്പാദനത്തില് മാത്രമല്ല, ഗുണ നിലവാരത്തിലും മൂല്യവര്ദ്ധനവിലും പുതിയ വിപണികളിലും ശ്രദ്ധ കേന്ദ്രീകരിക്കുന്നുണ്ടെന്ന് പ്രധാനമന്ത്രി ചൂണ്ടിക്കാട്ടി.
അരി ഉത്പാദനത്തില് ഭാരതം ഒന്നാമതായെന്നും മോദി പറഞ്ഞു. കേരളത്തിലെ തൃശൂര് ജില്ലയില്, 570 ഇനം നെല് കൃഷി ചെയ്യുന്ന ഒരു ഗ്രാമമുണ്ട്. ഇതില് പ്രാദേശിക ഇനങ്ങള്, ഔഷധ ഇനങ്ങള്, മറ്റ് സംസ്ഥാനങ്ങളില് നിന്ന് കൊണ്ടുവന്ന ഇനങ്ങള് എന്നിവ ഉള്പ്പെടുന്നു. ഇത് കൃഷി മാത്രമല്ല, വിത്തുകളുടെ പൈതൃകം സംരക്ഷിക്കുന്നതിനുള്ള ഒരു വലിയ പദ്ധതി കൂടിയാണെന്ന് പ്രധാനമന്ത്രി പറഞ്ഞു. അഞ്ഞൂറോളം അപൂര്വ നെല്വിത്തുകള് സംരക്ഷിക്കുന്ന ആവണങ്ങാട്ട് കളരിയുടെ കീഴിലുള്ള സര്വതാഭദ്രം ഓര്ഗാനിക്സിന്റെ പ്രവര്ത്തനങ്ങളെയാണ് പ്രധാനമന്ത്രി അഭിനന്ദിച്ചത്. ഡിജിറ്റല് അറസ്റ്റ്, സാമ്പത്തിക തട്ടിപ്പ് എന്നിവയ്ക്കെതിരെ ജാഗ്രത പാലിക്കണമെന്ന് പ്രധാനമന്ത്രി വീണ്ടും ഓര്മിപ്പിച്ചു. കെവൈസി പ്രക്രിയ ചെയ്യുമ്പോള് ശ്രദ്ധപുലര്ത്തണമെന്നും പ്രധാനമന്ത്രി പറഞ്ഞു. എല്ലാവര്ക്കും പ്രധാനമന്ത്രി റംസാന്, ഹോളി ആശംസകളും നേര്ന്നു.
