വാഷിങ്ടണ്: നാസയുടെ നിര്ണായക ചാന്ദ്ര ദൗത്യമായ ആര്ട്ടെമിസ്- 2 വിക്ഷേപണം നീട്ടി. പേടകത്തിലുണ്ടായ ഹീലിയം വാതക ചോര്ച്ചയും സാങ്കേതിക തകരാറുകളും കാരണമാണ് വിക്ഷേപണം മാറ്റിവെച്ചത്.
സ്പെയ്സ് ലോഞ്ച് സിസ്റ്റം (എസ്എല്എസ്) റോക്കറ്റിന്റെ അപ്പര് സ്റ്റേജായ ഇന്ററിം ക്രയോജനിക് പ്രൊപ്പല്ഷന് സ്റ്റേജിലാണ് (ഐസിപിഎസ്) ഹീലിയം ചോര്ച്ച കണ്ടെത്തിയത്. ഫെബ്രുവരി 21ന് രാത്രി നടത്തിയ പരിശോധനയിലാണ് ഗുരുതരമായ തകരാര് ശ്രദ്ധയില്പ്പെട്ടത്.
ലോഞ്ച് പാഡില് വെച്ച് റോക്കറ്റിന്റെ പ്രവര്ത്തനം പുനരാരംഭിക്കാന് സാധിക്കാത്ത സാഹചര്യത്തില്, റോക്കറ്റും ഒറിയോണ് പേടകവും ലോഞ്ച് പാഡ് 39 ബിയില് നിന്ന് വെഹിക്കിള് അസംബ്ലി ബില്ഡിങ്ങിലേക്ക് തിരികെ മാറ്റാന് നാസ തീരുമാനിച്ചു. കാലാവസ്ഥാ വ്യതിയാനം മൂലവും സാങ്കേതിക കാരണങ്ങളാലും ആര്ട്ടെമിസ്-2 ദൗത്യം പലതവണ മാറ്റിവെച്ചിരുന്നു. വരും ദിവസങ്ങളില് നടക്കുന്ന ഉന്നതതല പരിശോധനകള്ക്ക് ശേഷം പുതിയ സമയക്രമം പുറത്തുവിടും. യാത്രികരുടെ സുരക്ഷയ്ക്ക് തന്നെയാണ് പ്രഥമ പരിഗണനയെന്ന് നാസ വ്യക്തമാക്കി. ഒരു ചെറിയ പിഴവ് പോലും വന് ദുരന്തത്തിന് കാരണമായേക്കാമെന്നും അതിനാല് പൂര്ണമായ സുരക്ഷ ഉറപ്പാക്കാതെ വിക്ഷേപണവുമായി മുന്നോട്ട് പോകില്ലെന്നും അധികൃതര് അറിയിച്ചു.
