ആലപ്പുഴ: കടലോര ജനതയെ ബാധിക്കുന്ന ഗുരുതരമായ പ്രശ്നങ്ങള് ബിജെപി നേതൃത്വത്തെയും കേന്ദ്ര സര്ക്കാരിലും അവതരിപ്പിച്ച് പരിഹാരം കാണാന് പരിശ്രമിക്കുമെന്നു ബിജെപി മേഖലാ പ്രസിഡന്റ് എന്. ഹരി.
ആലപ്പുഴ രൂപത രാഷ്ട്രീയകാര്യ സമിതിയുടെ സബ് കമ്മിറ്റി അംഗങ്ങളുമായി സംസാരിക്കുകയായിരുന്നു അദ്ദേഹം. രൂപത ബിഷപ് ഡോ. ജയിംസ് ആനാപറമ്പിലിന്റെ നിര്ദേശപ്രകാരമായിരുന്നു സബ് കമ്മിറ്റി അംഗങ്ങള് ബിജെപി നേതാക്കളുമായി സംസാരിച്ചത്. രൂപത പാസ്റ്ററല് സെന്ററില് എത്തിയ ഹരിയോടൊപ്പം ആലപ്പുഴ നോര്ത്ത് ജില്ലാ പ്രസിഡന്റ് അഡ്വ. പി.കെ. ബിനോയ്, സംസ്ഥാന സമിതി അംഗം അഡ്വ. ജോസഫ് റോണി ജോസഫ് എന്നിവര് ഉണ്ടായിരുന്നു.
നിയമസഭാ തെരഞ്ഞെടുപ്പില് ലത്തീന് സമൂഹത്തിനു അര്ഹമായ പ്രാതിനിധ്യം, ബ്ലൂ ഇക്കോണമി പദ്ധതിയിലൂടെ കടലോരത്തെ അടിസ്ഥാന ജനസമൂഹമായ മത്സ്യത്തൊഴിലാളികള്ക്കു തൊഴില്-സാമ്പത്തിക നേട്ടത്തിനു ഉപകരിക്കാന് ശ്രദ്ധിക്കുക, തീരപരിപാലന നിയമം മൂലം വീട് നിര്മിക്കുന്നതിനും ടൂറിസം പദ്ധതികളും മറ്റും തുടങ്ങുന്നതിനും മത്സ്യത്തൊഴിലാളികളും കുറഞ്ഞ ഭൂമിയുള്ളവരും നേരിടുന്ന തടസങ്ങള് നീക്കുക, പ്രൊഫഷണല് പഠനം നടത്തുന്ന മത്സ്യത്തൊഴിലാളികളുടെ മക്കള്ക്ക് അര്ഹതപ്പെട്ട സ്കോളര്ഷിപ്, ഗ്രാന്റ് തുടങ്ങിയ സാമ്പത്തിക സഹായങ്ങള് മുടക്കംവരാതെ ലഭ്യമാക്കുക തുടങ്ങിയ പ്രശ്നങ്ങള് ബിജെപി നേതൃത്വത്തെയും കേന്ദ്ര സര്ക്കാരിന്റെയും ശ്രദ്ധയില്പ്പെടുത്തുമെന്ന് ഹരി രൂപത രാഷ്ട്രീയകാര്യ സമിതിയെ അറിയിച്ചു.
ലത്തീന് സഭ ആലപ്പുഴ രൂപത രാഷ്ട്രീയകാര്യ അധ്യക്ഷന് ഫാ. സേവ്യര് കുടിയാശ്ശേരി, അംഗങ്ങളായ ക്ലീറ്റസ്, സൈറസ് എന്നിവര് കൂടിക്കാഴ്ചയില് പങ്കെടുത്തു.
