കൊച്ചി: മൂന്ന് വര്ഷത്തെ സ്പോര്ട്സ് കൗണ്സില് പുരസ്കാരങ്ങള് ഒരുമിച്ച് പ്രഖ്യാപിച്ചപ്പോള് കായിക മാധ്യമ പ്രവര്ത്തകര്ക്ക് നല്കിവരാറുള്ള പുരസ്കാര വിഭാഗത്തില് സര്ക്കാര് ഉദ്യോഗസ്ഥനും കടന്നുകൂടി. പ്രഖ്യാപിച്ച പുരസ്കാരങ്ങളില് മിക്കവാറും സര്ക്കാരുമായി വിധേയത്വം പുലര്ത്തുന്നവര്ക്കാണ്. ഇതിനെതിരെ പ്രതിഷേധവും ശക്തമാണ്.
സര്ക്കാരുമായി വിധേയത്വം പുലര്ത്തുന്നവര്ക്ക് പുരസ്കാരം നല്കിയന്നതിന് ഏറ്റവും വലിയ തെളിവാണ് 2023ലെ അവാര്ഡ് ലഭിച്ച പി.ടി.അജീഷ്. എന്ട്രിയായി അയച്ചത് കേരളത്തിലെ ഒരു പ്രമുഖ പത്രത്തിലെ എഡിറ്റോറിയല് പേജില് പ്രസിദ്ധീകരിച്ച’ലോക കപ്പ് – സഞ്ജുവിന്റെ ഭാവി എന്താകും’, ‘ഇന്ക്ലൂസീവ് സ്പോര്ട്സും കുഞ്ഞുങ്ങളും’ എന്നീ ലേഖനങ്ങളായിരുന്നു. ഡോ. അജീഷ് പി.ടി. നിലവില് എസ്സിഇആര്ടിയില് ഗവേഷണ ഓഫീസറായി സേവനമനുഷ്ഠിക്കുന്നു. കൂടാതെ ഒരു കരിയര് സ്പോര്ട്സ് ജേണലിസ്റ്റുമല്ല.
‘മികച്ച സ്പോര്ട്സ് ജേണലിസ്റ്റ്’ എന്ന വിഭാഗത്തില് ഒരു പത്രപ്രവര്ത്തകനല്ലാത്ത വ്യക്തിക്ക് ബഹുമതി നല്കുന്നത് അവാര്ഡിന്റെ ആത്മാവിനെയും ഉദ്ദേശ്യത്തെയും ദുര്ബലപ്പെടുത്തുകയും ഈ തൊഴിലില് കരിയര് സമര്പ്പിച്ച പ്രൊഫഷണല് സ്പോര്ട്സ് ജേണലിസ്റ്റുകളുടെ സംഭാവനകളെ തമസ്കരിക്കുകയാണ്. അവാര്ഡുകള് ഏര്പ്പെടുത്തുന്നതിന്റെ അടിസ്ഥാന ലക്ഷ്യം, സ്പോര്ട്സ് ജേണലിസത്തില് പ്രൊഫഷണലായി ഏര്പ്പെട്ടിരിക്കുന്നവരെയും, സുസ്ഥിരമായ പരിശ്രമത്തിലൂടെയും, വിശ്വാസ്യതയിലൂടെയും, പ്രതിബദ്ധതയിലൂടെയും ഈ മേഖലയുടെ പുരോഗതിക്കായി സ്വയം സമര്പ്പിച്ചവരെയും അംഗീകരിക്കുകയും പ്രോത്സാഹിപ്പിക്കുകയും ചെയ്യുക എന്നതാണ്.
ഇതിനിെതിരെ കേരള സ്പോര്ട്സ് ജേണലിസ്റ്റ്സ് അസോസിയേഷന്(കെഎസ്ജെഎ) മുഖ്യമന്ത്രിക്ക് പരാതി നല്കി. അവാര്ഡ് നല്കുന്ന സ്പോര്ട്സ് കൗണ്സിലിന്റെ പ്രസിഡന്റും വൈസ് പ്രസിഡന്റും ഭരണ സമിതി അംഗങ്ങളും ജൂറിയിലെത്തിയത് അനൗചിത്യവുമണെന്ന് കെഎസ്ജെഎ പരാതിയില് ചൂണ്ടിക്കാട്ടി. 2023-ലെ മാധ്യമ അവാര്ഡിനുള്ള അടിസ്ഥാന യോഗ്യതാ മാനദണ്ഡങ്ങള് പാലിക്കുന്ന, അര്ഹതയുള്ള ഒരു സ്പോര്ട്സ് ജേണലിസ്റ്റിന് അവാര്ഡ് നല്കാന് ഇടപെടണമെന്ന് മുഖ്യമന്ത്രി പിണറായി വിജയനയച്ച പരാതിയില് പറയുന്നു.
