കൊച്ചി: ഇന്ത്യന് സൂപ്പര് ലീഗ്(ഐഎസ്എല്) ഫുട്ബോള് 2025-26 സീസണിലെ കേരള ബ്ലാസ്റ്റേഴ്സിന്റെ ആദ്യ ഹോം മത്സരം മുന്നിശ്ചയിച്ച പ്രകാരം കലൂര് സ്റ്റേഡിയത്തില് ഇന്ന് നടക്കും.
വൈകീട്ട് 7.30ന് നടക്കുന്ന മത്സരത്തില് മുംബൈ സിറ്റി എഫ്സി ആണ് എതിരാളികള്. വാടക സംബന്ധിച്ച് സ്റ്റേഡിയം ഉടമകളായ ജിസിഡിഎയുമായുണ്ടായ തര്ക്കത്തെ തുടര്ന്ന് രണ്ട് ദിവസമായി മത്സരം വലിയ അനിശ്ചിതത്വത്തിലായിരുന്നു. സ്റ്റേഡിയത്തിന്റെ വാടകയും സെക്യൂരിറ്റി തുകയും സംബന്ധിച്ച് ബ്ലാസ്റ്റേഴ്സും ജിസിഡിഎ തമ്മില് സമവായത്തിലെത്തിയതോടെയാണ് മത്സരം നടത്താന് തീരുമാനമായത്.
നല്കേണ്ട തുകയുടെ ഒരു ഭാഗം ബ്ലാസ്റ്റേഴ്സ് ഉടന് അടയ്ക്കും. ബാക്കി പണമടയ്ക്കാന് ബ്ലാസ്റ്റേഴ്സിന് ഒരാഴ്ചത്തെ സാവകാശം ജിസിഡിഎ നല്കി.
നേരത്തെ, വാടക തുക സംബന്ധിച്ച തര്ക്കത്തെ തുടര്ന്ന് ഇന്നലെ വൈകിട്ട് കലൂര് സ്റ്റേഡിയത്തിലുള്ള ബ്ലാസ്റ്റേഴ്സിന്റെ ഓഫിസ് ജിസിഡിഎ പൂട്ടിയിരുന്നു. മത്സരത്തിന്റെ ഒരുക്കങ്ങളുടെ ഭാഗമായി ഓഫിസിലുണ്ടായിരുന്ന ബ്ലാസ്റ്റേഴ്സിന്റെയും അഖിലേന്ത്യാ ഫുട്ബോള് ഫെഡറേഷന്റെയും (എഐഎഫ്എഫ്) അധികൃതരെയാണ് ജിസിഡിഎ പ്രതിനിധികളും സുരക്ഷാ ഉദ്യോഗസ്ഥരും ചേര്ന്ന് പുറത്താക്കിയത്. ഇതിനു ശേഷം ഓഫിസ് മുറി പൂട്ടുകയും ചെയ്തു. തുടര്ന്ന് മത്സരം മുടങ്ങുമെന്ന ഘട്ടത്തില് നടത്തിയ ചര്ച്ചയിലാണ് പണമടയ്ക്കാന് ജിസിഡിഎ സാവകാശം നല്കിയത്.
