ദിലീപിനെ വാഴ്ത്തിയും പൃഥ്വിരാജിനെ വിമര്ശിച്ചും ബിഗ് ബോസ് വിജയിയും സംവിധായകനുമായ അഖിൽ മാരാർ പറഞ്ഞ വാക്കുകൾ ചർച്ചയായപ്പോൾ മല്ലിക സുകുമാരൻ പ്രതികരിച്ച് എത്തിയിരുന്നു. ആരെയൊക്കയോ സുഖിപ്പിക്കുന്നതിന്റെ ഭാഗമായാണ് അഖിൽ പല പ്രസ്താവനകളും നടത്തുന്നതെന്നാണ് മല്ലിക സുകുമാരൻ പറഞ്ഞത്. ഇപ്പോഴിതാ വീണ്ടും വിഷയത്തിൽ തന്റെ ഭാഗം വ്യക്തമാക്കി എത്തിയിരിക്കുകയാണ് അഖിൽ. ആരുടെയൊക്കയോ ഔദാര്യത്തിന് വേണ്ടിയാണ് താൻ ഇതെല്ലാം പറഞ്ഞതെന്ന് കേട്ടപ്പോൾ വിഷമം തോന്നിയെന്ന് അഖിൽ പറയുന്നു.
മല്ലികാമ്മയെപോലൊരാൾ എന്നെ വിമർശിച്ചാൽ ഞാൻ സന്തോഷത്തോടെ കേൾക്കും. മല്ലികാമ്മയുടെ വീഡിയോ ഞാൻ കണ്ടിരുന്നു. ബിഗ് ബോസിൽ ഒപ്പമുണ്ടായിരുന്നവർക്ക് മറുപടി കൊടുക്കുന്നത് പോലെ മല്ലികാമ്മയെ പോലെ ഒരാൾക്ക് ഞാൻ മറുപടി കൊടുത്താൽ അവർ ചെറുതായി പോകും.
മക്കളായ ഇന്ദ്രജിത്തിനോടും പൃഥ്വിരാജിനോടും ഒരുപാട് സ്നേഹമുള്ള അമ്മയാണ്. ഒരുപാട് കഷ്ടപ്പെട്ട് വളർത്തിയതാണ്. ഞാൻ എന്താണ് പറഞ്ഞതെന്ന് പൂർണ്ണ അർത്ഥത്തിൽ മല്ലികാമ്മ കേട്ടിട്ടില്ല. അതിന്റെ പ്രശ്നമാണ്. പൃഥ്വിരാജിനെ തള്ളി പറഞ്ഞതല്ല. കൃത്യമായ സ്റ്റേറ്റ്മെന്റാണ് പറഞ്ഞത്. വളരെ വ്യക്തമായി അഭിപ്രായങ്ങൾ പറയുന്ന നിലപാടുള്ള വ്യക്തിയായിരുന്നു സുകുമാരൻ സാർ. അദ്ദേഹത്തിന്റെ മകനായ പൃഥ്വിരാജിനും നിലപാടുകളും വ്യക്തമായ അഭിപ്രായങ്ങളും ഉണ്ടായിരുന്നു. എന്റെ അഭിപ്രായം കേട്ട് വൈകാരികമായി പ്രതികരിക്കാതെ സൂക്ഷ്മമായി വിലയിരുത്തിയിരുന്നുവെങ്കിൽ മനസിലാകുമായിരുന്നു. ആരുടെയൊക്കയോ ഔദാര്യത്തിന് വേണ്ടിയാണ് ഞാൻ ഇതെല്ലാം പറഞ്ഞതെന്ന് കേട്ടപ്പോൾ വിഷമം തോന്നി. അങ്ങനെ ആരെങ്കിലും ചെയ്യുന്നുണ്ടെങ്കിൽ അത് പൃഥ്വിരാജാണെന്ന് പറയേണ്ടി വരും.
ഞാൻ അഭിപ്രായങ്ങൾ പറയുന്നതും പ്രതികരിക്കുന്നതും സിനിമാ മേഖലയിൽ നിന്നും നേട്ടങ്ങൾ പ്രതീക്ഷിച്ചിട്ടല്ല. നേട്ടം കിട്ടാൻ ആഗ്രഹിക്കുന്നവർ നിശബ്ദനായി ഇരിക്കും. കേസിനും വിധിക്കും ശേഷം ദിലീപിനോട് കഥ പറയാൻ പോവുകയോ മറ്റ് നേട്ടങ്ങൾക്കായി പോവുകയോ ചെയ്തിട്ടില്ല. ഒരു കമ്യൂണിക്കേഷന് പോലും പോയിട്ടില്ല. അതുപോലെ മലയാള സിനിമയിൽ പലരുടേയും അവസരങ്ങൾ ദിലീപ് ഇല്ലാതാക്കി എന്ന സ്റ്റേറ്റ്മെന്റ് തെറ്റാണ്. കരുതിയിൽ നസ്ലിന് പൃഥ്വിരാജ് അവസരം കൊടുത്തുവെന്ന് പറയുന്നത് പോലെയല്ല ദിലീപേട്ടൻ ചെയ്തത്. ആ സിനിമയിൽ ലീഡ് പൃഥ്വിരാജ് തന്നെയാണ്. മുമ്പ് പൃഥ്വിരാജ് ചോദിച്ചത് മോഹൻലാലിനേയും മമ്മൂട്ടിയേയും പോലുള്ളവർ പ്രായം കുറഞ്ഞ കഥാപാത്രങ്ങൾ ചെയ്താൽ ചെറുപ്പക്കാരായ നടന്മാർ എന്ത് ചെയ്യും എന്നാണ്. ബ്രോ ഡാഡിയിൽ നാൽപ്പത്തിരണ്ട് വയസുകാരനായ പൃഥ്വിരാജിന്റെ അമ്മ വേഷമാണ് നടി മീന ചെയ്തത്.
ആ റോൾ വന്നപ്പോൾ അത്ഭുതപ്പെട്ടുവെന്ന് മീന തന്നെ പറഞ്ഞിട്ടുണ്ട്. അദ്ദേഹം സംവിധാനം ചെയ്ത സിനിമ അല്ലേ? എന്നിട്ടും എന്തുകൊണ്ട് 25 വയസുകാരനെ ആ റോളിലേക്ക് വെച്ചില്ലെന്ന് അഖിൽ ചോദിച്ചു. അതിജീവിതയ്ക്ക് വേണ്ടി പോരാടുന്നവരെ കുറിച്ചും അഖിൽ സംസാരിച്ചു. കേരളത്തിൽ നീതിക്കുവേണ്ടി കുറെ സ്ത്രീകൾ മുമ്പ് വലിയ സമരം നടത്തി. കേരളത്തിലെ പല ഇടത്തും സ്ത്രീകൾ പ്രശ്നത്തിലാണ്. സോഷ്യൽ മീഡിയയിൽ പോസ്റ്റ് ഇടുന്ന അല്ലെങ്കിൽ അതിജീവിതയ്ക്ക് വേണ്ടി ശബ്ദം ഉയർത്തുന്ന ആരെങ്കിലും എവിടെയെങ്കിലും ഇത്തരത്തിൽ ഉള്ള സ്ത്രീകളെ പിന്തുണച്ചുകൊണ്ട് എത്തുന്നത് കണ്ടിട്ടുണ്ടോ. അതിജീവിതയുടെ ഏതെങ്കിലും സിനിമകൾ രക്ഷപെടുത്താൻ ആരെങ്കിലും മുമ്പ് എപ്പോഴെങ്കിലും എത്തിയിട്ടുണ്ടോ. ഇല്ല. കാരണം അതിജീവിത രക്ഷപ്പെടുന്നത് ആർക്കും ഇഷ്ടമല്ല. അതിജീവിതക്ക് നീതി കിട്ടുന്നതും വിഷയമല്ല. ഇവരുടെ വിഷയം ഇവർക്ക് ആരോടെങ്കിലും വിരോധം ഉണ്ടെങ്കിൽ അവരെ എന്തെങ്കിലും പറയുക എന്നത് മാത്രമാണ്.
സ്ത്രീ സമൂഹത്തിന് വേണ്ടി ഇവർ വാദിക്കുന്നതാണ് ഇതൊക്കെയെന്ന് നിങ്ങൾ ചിന്തിക്കരുത്. ഇവർക്ക് സ്വന്തം കാര്യങ്ങൾ എന്ന ചിന്ത മാത്രമാണ് ഉള്ളത്. നമ്മൾ പിന്നെ എന്തിനാണ് ഇവരുടെ യൊക്കെ വാക്കുകൾക്ക് വില കൊടുക്കുന്നത്. സിനിമ വിജയിക്കണം എങ്കിൽ നല്ല സിനിമ വരണം. ദിലീപിനെ കോടതി വിട്ടുവെന്ന് കരുതി ഭ ഭ ബ വിജയിച്ചോ ഇല്ലല്ലോയെന്നും അഖിൽ പറയുന്നു.
