അഹമ്മദാബാദ് : നരേന്ദ്ര മോദി സ്റ്റേഡിയത്തില് നടന്ന ടി20 ലോകകപ്പില് നെതര്ലന്ഡ്സിനെ 17 റണ്സിന് കീഴടക്കി ഇന്ത്യ.
ഗ്രൂപ്പ് എ-യിലെ അവസാന മത്സരവും വിജയിച്ചതോടെ ഒരു മത്സരം പോലും തോല്ക്കാതെ ടീം ഇന്ത്യ സൂപ്പര് എട്ട് ഘട്ടത്തിലേക്ക് പ്രവേശിച്ചു.ടോസ് നേടി ആദ്യം ബാറ്റിംഗിനിറങ്ങിയ ഇന്ത്യ 20 ഓവറില് ആറ് വിക്കറ്റ് നഷ്ടത്തില് 193 റണ്സെടുത്തു.
ഓപ്പണര്മാരെ വേഗത്തില് നഷ്ടമായത് ഇന്ത്യക്ക് തിരിച്ചടിയായെങ്കിലും മധ്യനിരയിലെ തകര്പ്പന് പ്രകടനം രക്ഷക്കെത്തി. യുവതാരം അഭിഷേക് ശര്മ്മ ടൂര്ണമെന്റില് തുടര്ച്ചയായ മൂന്നാം തവണയും പൂജ്യത്തിന് പുറത്തായി.എന്നാല് പിന്നീട് ക്രീസിലെത്തിയ ശിവം ദുബെ വെടിക്കെട്ട് ബാറ്റിംഗാണ് പുറത്തെടുത്തത്. 31 പന്തില് നിന്ന് ആറ് സിക്സറുകളും നാല് ഫോറുകളും അടക്കം 66 റണ്സാണ് ദുബെ അടിച്ചുകൂട്ടിയത്.
ക്യാപ്റ്റന് സൂര്യകുമാര് യാദവ് (34), ഹാര്ദിക് പാണ്ഡ്യ (30), തിലക് വര്മ്മ (28) എന്നിവരും മികച്ച ഇന്നിംഗ്സുകള് കളിച്ചു.
മറുപടി ബാറ്റിംഗിനിറങ്ങിയ നെതര്ലന്ഡ്സ് പൊരുതിയെങ്കിലും 20 ഓവറില് 7 വിക്കറ്റ് നഷ്ടത്തില് 176 റണ്സെടുക്കാനേ സാധിച്ചുള്ളൂ.
സ്പിന്നര് വരുണ് ചക്രവര്ത്തിയുടെ മാന്ത്രിക സ്പെല്ലാണ് നെതര്ലന്ഡ്സിനെ തളച്ചത്. തുടര്ച്ചയായ രണ്ട് പന്തുകളില് വിക്കറ്റ് വീഴ്ത്തിയതടക്കം വരുണ് മൂന്ന് വിക്കറ്റുകള് സ്വന്തമാക്കി.
ശിവം ദുബെ രണ്ട് വിക്കറ്റുകളും വീഴ്ത്തി ഇന്ത്യയുടെ ജയം ഉറപ്പിച്ചു. ജസ്പ്രീത് ബുംറയുടെ സാന്നിധ്യവും അവസാന ഓവറുകളില് റണ്സ് വിട്ടുകൊടുക്കാതെയുള്ള നിയന്ത്രണവും ഇന്ത്യന് വിജയത്തില് വലിയ പങ്കുവഹിച്ചു.
ദക്ഷിണാഫ്രിക്കയുമായാണ് ഇന്ത്യയുടെ അടുത്ത പ്രധാന മത്സരം.
