ന്യൂദല്ഹി: ദേശീയ സുരക്ഷാ ഉപദേഷ്ടാവ് അജിത് ഡോവല് യെമനില് നിന്നും നിമിഷപ്രിയയുടെ മോചനത്തിനായി പ്രവര്ത്തിക്കും. കഴിഞ്ഞ ദിവസം കാന്തപുരം എ.പി. അബൂബക്കര് മുസ്ല്യാര് പ്രധാനമന്ത്രിയുമായി കൂടിക്കാഴ്ച നടത്തിയപ്പോള് നിമിഷപ്രിയയുടെ മോചനവും ചര്ച്ചയായി.
നിമിഷപ്രിയയുടെ വധശിക്ഷ നേരത്തെ ഒഴിവായിരുന്നു. 2025ല് തന്നെ നിയമയുദ്ധവും മധ്യസ്ഥചര്ച്ചകളും വഴി അവരുടെ വധശിക്ഷ ഒഴിവായിക്കിട്ടിയിരുന്നു. പക്ഷെ നിമിഷപ്രിയ ഇനിയും ജയില് മോചിതയായിട്ടില്ല. ഇപ്പോഴും യെമനിലെ സന ജയിലില് ആണിവര്. നിമിഷപ്രിയയുടെ മോചനത്തിന് വേണ്ട നയതന്ത്രനീക്കങ്ങള്ക്ക് അജിത് ഡോവല് ആണ് ഇനി ചുക്കാന് പിടിക്കുക. ഈ കേസ് സംബന്ധിച്ച് വിവിധ വശങ്ങള് കൂടി ചര്ച്ച ചെയ്യാനാണ് കാന്തപുരം-മോദി കൂടിക്കാഴ്ചയില് അജിത് ഡോവല് കൂടി പങ്കെടുക്കാന് കാരണമായത്.
യെമന് സര്ക്കാരും ഡോവലും തമ്മില് നിരന്തരം ഇക്കാര്യത്തില് ഇടപെടല് നടക്കുന്നുണ്ടെന്നും നിമിഷപ്രിയയുടെ ജയില് മോചനം ഉടനെ ഉണ്ടായേക്കുമെന്നും ചില അഭ്യൂഹങ്ങള് പുറത്തുവരുന്നുണ്ട്. അതിന് തൊട്ടുപിന്നാലെയുള്ള കാന്തപുരവുമായുള്ള കൂടിക്കാഴ്ചയ്ക്ക് ഏറെ പ്രാധാന്യമുണ്ട്. കാന്തപുരത്തിനും ഈ കേസില് ഇടപെടാനുള്ള സ്വാതന്ത്ര്യം നല്കിയിട്ടുള്ളതായും അറിയുന്നു.
