കൊച്ചി: ശബരിമല യുവതി പ്രവേശന വിഷയത്തില് തെരഞ്ഞെടുപ്പ് മുന്നില്ക്കണ്ട് പിണറായി സര്ക്കാര് എന്തും ചെയ്യുമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് വാര്ത്താസമ്മേളനത്തില് പറഞ്ഞു. സംസ്ഥാന സര്ക്കാര് നിലപാട് എന്താണെന്ന് ഇപ്പോള് പറയാന് കഴിയില്ല. അയ്യപ്പ സംഗമം നടത്തിയ സര്ക്കാരാണിതെന്നും അദ്ദേഹം പറഞ്ഞു.
ശബരിമല സ്വര്ണക്കൊള്ള പ്രശ്നം കഴിഞ്ഞിട്ടില്ല. സ്വര്ണ ക്കൊള്ളയില് ദേവസ്വം മന്ത്രി ജയിലില് പോകുന്നതുവരെ പ്രശ്നം തുടരും. ക്ഷേത്രത്തില് നിന്ന് സ്വര്ണം കട്ടിട്ട് വീഴ്ച ഇല്ല എന്നാണ് സര്ക്കാര് പറയുന്നത്. സ്വര്ണം കവര്ന്നവരെ കണ്ടെത്താന് മുഖ്യമന്ത്രിക്ക് താല്പര്യമില്ല. അല്ലെങ്കില് നേരത്തെ തന്നെ അന്വേഷണം സിബിഐക്ക് വിടാമായിരുന്നു. പത്ത് വര്ഷം ഭരിച്ചിട്ട് ഒന്നും ചെയ്യാതെ കേന്ദ്ര സര്ക്കാരിനെ വിമര്ശിക്കുകമാത്രമാണ് സംസ്ഥാന സര്ക്കാര് ചെയ്യുന്നത്. വികസന കാര്യത്തില് മുഖ്യമന്ത്രിയെ വെല്ലുവിളിക്കുന്നു. ഇക്കാര്യം തുറന്ന ചര്ച്ചക്ക് തയാറാകുമോയെന്നും രാജീവ് ചന്ദ്രശേഖര് ചോദിച്ചു. എയിംസ് ആവശ്യമാണെങ്കില് എന്ത് കൊണ്ട് മുഖ്യമന്ത്രി കേന്ദ്ര ആരോഗ്യ മന്ത്രിയെ കണ്ടില്ല. നിരവധി തവണ അദ്ദേഹം ദല്ഹിയില് പോയിരുന്നു. എന്നാല് ഇക്കാര്യം ചര്ച്ച ചെയ്തില്ല. 2017ല് കോഴിക്കോടും മധുരയിലുമായിരുന്നു എയിംസ് പ്രഖ്യാപിച്ചത്. എന്നാല് മധുരയില് യാഥാര്ത്ഥ്യമാകുകയാണ്. കോഴിക്കോട് സ്ഥലം പോലും എടുത്തില്ല. ഇത്തവണ മത്സരത്തിന് ഉണ്ടാകും. എന്റെ മനസില് നേമം ആണ്. എല്ലാം പാര്ട്ടി തീരുമാനിക്കുമെന്നും അദ്ദേഹം പറഞ്ഞു.
ബിഡിജെഎസ് അധ്യക്ഷന് തുഷാര് വെള്ളാപ്പള്ളി, എന്ഡിഎ വൈസ് ചെയര്മാന് എ.എന്. രാധാകൃഷ്ണന്, ബിജെപി സംസ്ഥാന വൈസ് പ്രസിഡന്റ് ഷോണ് ജോര്ജ്, പുതിയതായി എന്ഡിഎയില് ചേര്ന്ന നാഷണല് ഫാര്മേഴ്സ് പാര്ട്ടി ചെയര്മാന് ജോര്ജ് ജെ. മാത്യു, ജനാധിപത്യ രാഷ്ട്രീയസഭ പ്രസിഡന്റ് കുമാരദാസ് എന്നിവരും വാര്ത്താ സമ്മേളനത്തില് പങ്കെടുത്തു.
