പത്തനംതിട്ട: ആഗോള അയ്യപ്പ സംഗമത്തിലെ അതിഥികള്ക്കു സമ്മാനിക്കാന് പമ്പയിലെത്തിച്ച 24,600 പ്രസാദ പായ്ക്കറ്റുകളില് 19,200 പായ്ക്കറ്റുകള് ദേവസ്വം ജീവനക്കാരും അടുത്ത സുഹൃത്തുക്കളും അടിച്ചുമാറ്റിയതായി വിജിലന്സ്. അതിഥികള്ക്ക് വിതരണം ചെയ്തത് 5400 പായ്ക്കറ്റുകള് മാത്രം.
അരവണ, അപ്പം, ആടിയ ശിഷ്ടം നെയ്യ്, മോദകം, വിഭൂതി, ചന്ദനം എന്നിവ 4100 പായ്ക്കറ്റ് വീതമാണ് ഒരുക്കിയിരുന്നത്. പ്രസാദങ്ങള് അടങ്ങുന്ന അഞ്ച് പായ്ക്കറ്റും ഒരു കണ്ടെയ്നര് അരവണയും അടങ്ങുന്നതാണ് ഒരു കിറ്റ്. 4100 പേരെങ്കിലും പങ്കെടുക്കുമെന്നു പ്രതീക്ഷിച്ചിടത്ത് എത്തിയത് വെറും 900 പേര്. ഇതില് 300ലേറെ പേര് പാര്ട്ടി പ്രവര്ത്തകരാണ്. ക്ഷണിക്കപ്പെട്ടവരില് എത്തിയത് 600ല് താഴെ ആളുകള് മാത്രം.
12 ലക്ഷം രൂപ വില മതിക്കുന്ന പ്രസാദ കിറ്റുകളാണ് തയ്യാറാക്കിയത്. 900 അതിഥികള്ക്കായി വന്നത് 5400 പ്രസാദ പായ്ക്കറ്റ്. ശേഷിച്ച 19,200 പായ്ക്കറ്റ് പ്രസാദം തിരികെ സന്നിധാനത്തെത്തിയിട്ടില്ല. ദേവസ്വം ജീവനക്കാര് പ്രസാദം വീതിച്ചെടുത്തു. ഇവര് ഇത് പിന്വാതിലിലൂടെ വിറ്റോയെന്നു വ്യക്തമല്ല.
ഒരു കണ്ടെയ്നര് അരവണയ്ക്ക് 100 രൂപ വച്ച് 4100 കണ്ടെയ്നറുകള്ക്കു മാത്രം 4,10,000 രൂപ വരും. 100 ഗ്രാം ആടിയ ശിഷ്ടം നെയ്യ് പായ്ക്കറ്റിന് 100 രൂപ. ആ ഇനത്തിലും 4,10,000 രൂപ. ഒരു പായ്ക്കറ്റ് അപ്പത്തിന് 60 രൂപ. ഇതിന് 2,46,000 രൂപ.
അയ്യപ്പ സംഗമത്തിനുണ്ടാക്കിയ പ്രസാദം എത്രയാണെന്നതിന് കണക്കൊന്നും ബോര്ഡ് ഓഡിറ്റര് മുമ്പാകെ സമര്പ്പിച്ചിട്ടില്ല. അതിന്റെ യഥാര്ത്ഥ മൂല്യവും അറിയില്ല.
