തിരുവനന്തപുരം: പാല് പിരിക്കാതെ നേരിട്ട് തന്നെ തൈരും അനുബന്ധ ഉല്പന്നങ്ങളും നിര്മ്മിക്കാന് സഹായിക്കുന്നതും കൂടുതല് കാലം സൂക്ഷിച്ചുവയ്ക്കാനാകുന്നതുമായ കള്ച്ചര് സംഗ്രഹവുമായി ബന്ധപ്പെട്ട കേരള വെറ്ററിനറി ആന്റ് ആനിമല് സയന്സസ് സര്വ്വകലാശാലയിലെ ശാസ്ത്രജ്ഞരുടെ പഠനത്തിന് പേറ്റന്റ് ലഭിച്ചു. ഇതിനുവേണ്ട കൂടുതല് അതിജീവനശേഷിയുള്ള സ്റ്റാര്ട്ടര് സംഗ്രഹം നിര്മ്മിക്കാനാവശ്യമായ സാങ്കേതികവിദ്യ വികസിപ്പിച്ചെടുത്തതിനാണ് വിവിധ ദേശീയഅന്താരാഷ്ട്ര ഏജന്സികളുടെ പേറ്റന്റ് ലഭ്യമായത്.
വെറ്ററിനറി സര്വ്വകലാശാലയുടെ തിരുവനന്തപുരം ഡെയറി സയന്സ് കോളജിലെയും മണ്ണുത്തി വര്ഗീസ് കുര്യന് ഇന്സ്റ്റിറ്റിയൂട്ട് ഓഫ് ഡെയറി ആന്റ് ഫുഡ് ടെക്നോളജിയിലെയും അധ്യാപകരായ ഡോ. രജീഷ് ആര്., ഡോ. ബീന എ.കെ., ഡോ. ലിജിമോള് ജെയിംസ്, ഡോ. പി. സുധീര് ബാബു, ഡോ. എസ്.എന്. രാജകുമാര്, ഡോ. രചന സി.ആര്. തുടങ്ങിയവരാണ് ഈ നേട്ടത്തിന് പിന്നില് പ്രവര്ത്തിച്ചത്. ലാക്ടോബാസിലസ് ഇനത്തില്പ്പെടുന്ന ലാക്ടികേസി ബാസിലസ് റാംനോസസ് ബാക്ടീരിയയിലാണ് ഇവര് പഠനങ്ങള് നടത്തിയത്.
ലാക്ടോബാസിലസ് ബാക്ടീരിയകള് ഫെര്മെന്റേഷന് എന്ന വായു വേണ്ടാത്ത ശ്വസനപ്രക്രിയയിലൂടെയാണ് കൂടുതലും പാല് പുളിപ്പിച്ച് തൈരാക്കുന്നത്. ഇതിലൂടെ വളരെ കുറഞ്ഞ ഊര്ജ്ജം മാത്രമേ ഉല്പാദിപ്പിക്കുന്നുള്ളൂ. എന്നാല് ഇതേ ബാക്ടീരിയകളെ വായു സഹിത ശ്വസനപ്രക്രിയയിലൂടെ കടത്തി വിട്ടപ്പോള് ഒട്ടനവധി പ്രയോജനപ്രദമായ നേട്ടങ്ങളാണ് ഉണ്ടായത്. മാറിയ സാഹചര്യങ്ങളില് വളരുമ്പോള് ഇവയുടെ എണ്ണത്തില് അഭൂതപൂര്വ്വമായ വര്ദ്ധനവും, കൂടുതല് ക്രിയാത്മകതയും, കാര്യശേഷിയും, കൂടിയ സഹനസഹിഷ്ണുതയും പ്രകടമാക്കുന്നു എന്ന് ഇവര് പഠനഗവേഷണങ്ങളിലൂടെ കണ്ടെത്തി തെളിയിച്ചു.
ഇപ്രകാരം തയ്യാറാക്കിയ തൈരിന്റെ ഉറ അഥവാ സ്റ്റാര്ട്ടര് കള്ച്ചര് നാലു മാസത്തിലധികം ഫ്രിഡ്ജില് സൂക്ഷിക്കാനാകും. നൂതനമായ പുളിപ്പിച്ച പാലുല്പ്പന്നങ്ങളുടെ നിര്മ്മാണത്തിലൂടെ വളരെയധികം സംഭാവനകള് ക്ഷീരസംസ്കരണ മേഖലയ്ക്ക് ഇതുവഴി ലഭ്യമാക്കാന് കഴിയുമെന്നാണ് പ്രതീക്ഷിക്കുന്നത്.
