ദുബായ് : രാഷ്ടീയത്തിന് വേണ്ടി ആചാരത്തെ തൊട്ടു കളിക്കാന് സര്ക്കാര് തയാറാകരുതെന്ന് ബി ജെ പി കേരള ഘടകം അധ്യക്ഷന് രാജീവ് ചന്ദ്രശേഖര്. തൊട്ടാല് പ്രതികരണം ഉണ്ടാകും. യു എ ഇ യിലെ അജ്മാനില് ശിവഗിരി തീര്ത്ഥാടന മഹോത്സവത്തില് പങ്കെടുക്കാന് എത്തിയ രാജീവ് ചന്ദ്രശേഖര് മാധ്യമപ്രവര്ത്തകരോട് സംസാരിക്കുകയായിരുന്നു.
ശബരിമല സ്ത്രീ പ്രവേശനവുമായി ബന്ധപ്പെട്ട ഹര്ജികള് സുപ്രീകോടതി പരിഗണിക്കുന്ന സാഹചര്യത്തിലാണ് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറിന്റെ പ്രതികരണം. രാഷ്ടീയത്തിന് വേണ്ടി ആചാരത്തെ തൊട്ടു കളിക്കാന് സര്ക്കാര് തയാറാകരുത്. അങ്ങനെ സംഭവിച്ചാല് സ്വാഭാവികമായും പ്രതികരണം ഉണ്ടാകും. പത്ത് വര്ഷത്തിലെ ദുര്ഭരണത്തില് തിന്ന് ശ്രദ്ധ തിരിക്കാനുള്ള നാടകം ആയിരിക്കുമോ നാളെ നടക്കുന്നത് എന്ന് അറിയാന് കാത്തിരിക്കുന്നുവെന്നും അദ്ദേഹം പറഞ്ഞു. എല്ലാ കാര്യങ്ങളും കേന്ദ്രം ചെയ്യണം എന്ന് പറയുന്നത് ശരിയല്ല.
പിന്നെ എന്തിനാണ് സംസ്ഥാന സര്ക്കാര് എന്നും അദ്ദേഹം ചോദിച്ചു. എന്. എസ് എസിന് അവരുടെ അഭിപ്രായം പറയാന് സ്വാതന്ത്ര്യമുണ്ട് എന്നും ശബരിമല വിഷയത്തിന്മേല് ഉള്ള എന് എസ് എസ് നിലപാടിനെക്കുറിച്ചുള്ള ചോദ്യത്തിന് മറുപടിയായി അദ്ദേഹം പറഞ്ഞു.
ആര്ട്ടിക്കള് 25 പ്രകാരം ദേവസ്വം ബോര്ഡ് വരുന്നത് സംസ്ഥാന സര്ക്കാരിന്റെ കീഴിലാണ്. കേന്ദ്രം ഇതുവരെ സംസ്ഥാനങ്ങളുടെ വിശ്വാസപരമായ കാര്യത്തില് ഇടപെട്ടിട്ടില്ല എന്നും രാജീവ് ചന്ദ്രശേഖര് പറഞ്ഞു.
ബിജെപിയുടെ തിരഞ്ഞെടുപ്പ് പ്രചാരണം ആഗസ്റ്റ് മാസത്തില് തന്നെ തുടങ്ങിയിരുന്നു. കേന്ദ്ര ബജറ്റ് സംബന്ധിച്ച് സംവാദത്തിന് തയാറാണെന്നും ബിജെപി സംസ്ഥാന പ്രസിഡന്റ് വ്യക്തമാക്കി. മഞ്ചേശ്വരം മണ്ഡലത്തില് വോട്ട് നീക്കം ചെയ്തതിന് പിന്നില് ബിജെപി ആണെന്ന ആരോപണം ശരിയല്ലെന്നും രാജീവ് ചന്ദ്രശേഖര് പറഞ്ഞു. അനധികൃത കുടിയേറ്റക്കാര് വോട്ടര് പട്ടികയില് ഉണ്ടാകാന് പാടില്ലെന്നാണ് ബിജെപി നിലപാടെന്നും അദ്ദേഹം വ്യക്തമാക്കി.
