വെള്ളറട: ചൂട് കടുത്തതോടെ മലയോര മേഖലയിലെ തോടുകളും കുളങ്ങളും ഉള്പ്പെടെയുള്ള നീരുറവകള് വറ്റി വരണ്ടു. കുടിവെള്ളത്തിനായി ജനം നെട്ടോട്ടമോടുകയാണ്. ഫലം ചെയ്യാതെ കുടിവെള്ള പദ്ധതികള്. കൃഷികരിഞ്ഞുണങ്ങുമെന്ന ഭീതിയില് കര്ഷകര്. ആശാസ്ത്രീയ നീരുറവ സംരക്ഷണവും കുടിവെള്ള ക്ഷാമത്തിന് കാരണമെന്നും കര്ഷകര്.
ഗ്രാമീണ മേഖലയില് നിരവധി നീരുറവകള് ഉണ്ടെങ്കിലും ഏറെക്കുറെയും വറ്റി വരണ്ട അവസ്ഥയിലാണ്. വേനല് ശക്തമായതോടെ കുടിവെള്ളത്തിന് വളരെയേറെ ബുദ്ധിമുട്ടുകയാണ്. കുളങ്ങളെ ആശ്രയിച്ചാണ് ഈപ്രദേശത്തെ നീരുറവകള് സജീവമായി ഒഴുകികൊണ്ടിരുന്നത്. അശാസ്ത്രീയമായുള്ള കുളം സംരക്ഷണത്തെത്തുടര്ന്ന് കുളത്തിലെ ജലനിരപ്പ് പൂര്ണ്ണമായും വറ്റിയതോടെ തോടുകളിലും വെള്ളം ഇല്ലാതെയായി.
തോടുകളില് നീരൊഴുക്ക് പണ്ടൂര്ണമായും നിലച്ചതോടെ സമീപപ്രദേശങ്ങളിലുള്ള കിണറുകള് ജലനിരപ്പ് താഴ്ന്ന് കുടിവെള്ളം കിട്ടാക്കനിയാവുകയാണ്. നിരവധി കിണറുകള് ഉണ്ടായിരുന്ന സ്ഥലത്ത് കാളിപ്പാറ കുടിവെള്ള പദ്ധതിയിലുള്ള വെള്ളം ലഭിക്കുമെന്നതിനാല് കിണറുകളെ സംരക്ഷിക്കാത്ത സാഹചര്യവും ഉണ്ടായി. എന്നാല് കാളിപ്പാറ പദ്ധതിയില് നിന്ന് വെള്ളം ലഭിക്കുന്നുമില്ല. കിണറുകളിലെ വെള്ളം കോരി ഉപയോഗിക്കാന് കഴിയാത്ത സാഹചര്യവുമായി.
വേനല് തുടര്ന്നാല് മരിച്ചീനി, പച്ചക്കറിതുടങ്ങിയ കൃഷികള്ക്ക് നീരുറവയില് നിന്നും വെള്ളം കോരി നനക്കാന് കഴിയാതെ കരിഞ്ഞുണങ്ങുന്ന അവസ്ഥയിലാണ്.
കാളിപ്പാറ കുടിവെള്ള പദ്ധതിയിലെ ശുദ്ധജല വിതരണത്തിലെ പിഴവ് മൂലം പലസ്ഥലങ്ങളിലും കുടിവെള്ളമെത്തുന്നതുമില്ല. താഴ്ന്ന പ്രദേശങ്ങളില് ശുദ്ധജലം എത്തിച്ചാല് കുന്നിന് പ്രദേശങ്ങളില് വെള്ളമെത്താത്ത സ്ഥിതിയാണ്. വെള്ളം ദിശ മാറ്റി ഉയര്ന്ന ഭാഗത്തുള്ള വര്ക്ക് വെള്ളം നല്കുമ്പോള് ദിവസങ്ങളോളം താഴ്ന്ന ഭാഗങ്ങളില് കുടിവെള്ളം നിലയ്ക്കും. ഇതിനെതിരെ ഗുണഭോക്താക്കള് ബന്ധപ്പെട്ട അധികൃതരെ പരാതി അറിയിച്ചുവെങ്കിലും പരിഹാരം ഉണ്ടായിട്ടില്ല.
കാളിപ്പാറ പദ്ധതിയിലെ ജീവനക്കാരുടെ അശാസ്ത്രീയമായുള്ള വെള്ളത്തിന്റെ ദിശ മാറ്റല് നിയന്ത്രിച്ച് എല്ലാ പ്രദേശത്തും വെള്ളം എത്തിക്കാനുള്ള ക്രമീകരണം ഒരുക്കണമെന്നുള്ളതാണ് പ്രദേശവാസികളുടെ ആവശ്യം.
