ന്യൂദൽഹി: വന്ദേമാതരത്തിനോട് എതിർപ്പില്ല, എന്നാൽ എല്ലാവരികളും പാടാൻ തയാറല്ലെന്നും അതിന് ആവശ്യപ്പെടുന്നത് ഭരണഘടനാ വിരുദ്ധമാണെന്നും ജാമിയത്ത് ഉലമ-ഇ-ഹിന്ദിന്റെ തലവൻ മൗലാനാ അർഷാദ് മദനി. വന്ദേമാതരത്തിന്റെ 150 ാം വർഷത്തിൽ എല്ലാ സർക്കാർ പരിപാടികളിലും, സ്കൂളുകളിലും, കോളേജുകളിലും, പരിപാടികളിലും ‘വന്ദേമാതരം’ എന്നദേശീയ ഗീതത്തിന്റെ എല്ലാ വരികളും ആലപിക്കണമെന്ന് നിർബന്ധമാക്കിയുള്ള കേന്ദ്ര സർക്കാരിന്റെ തീരുമാനത്തോട് പ്രതികരിക്കുകയായിരുന്നു അർഷാദ് മദനി.
ഈ നിർദ്ദേശം പക്ഷപാതപരവും നിർബന്ധിതവുമായ തീരുമാനം മാത്രമല്ല, ഭരണഘടന ഉറപ്പുനൽകുന്ന മതസ്വാതന്ത്ര്യത്തിന് നേരെയുള്ള ആക്രമണവും ന്യൂനപക്ഷങ്ങളുടെ അവകാശങ്ങൾ കവർന്നെടുക്കാനുള്ള അപലപനീയമായ ശ്രമവുമാണെന്ന് അർഷാദ് പ്രസ്താവനയിൽ പറഞ്ഞു.
വന്ദേമാതരം ചൊല്ലുന്നതിൽ നിന്നോ വായിക്കുന്നതിൽ നിന്നോ മുസ്ലിങ്ങൾ ആരെയും തടയുന്നില്ല, മറിച്ച് അതിലെ ചില വരികൾ ബഹുദൈവ വിശ്വാസങ്ങളെ അടിസ്ഥാനമാക്കിയുള്ളതും മാതൃരാജ്യത്തെ ദൈവമായി ചിത്രീകരിക്കുന്നതുമാണ്, ഇത് ഏകദൈവ മതങ്ങളുടെ വിശ്വാസങ്ങളുമായി വൈരുദ്ധ്യമുള്ളതുമാണ്, ഏക അല്ലാഹുവിനെ മാത്രം ആരാധിക്കുന്ന മുസ്ലിങ്ങളെ അത് ചൊല്ലാൻ നിർബന്ധിക്കുന്നത് ഭരണഘടനയുടെ അനുച്ഛേദം 25 ന്റെയും സുപ്രീം കോടതി വിധികളുടെയും നഗ്നമായ ലംഘനമാണ്, പ്രസ്താവന പറയുന്നു.
ഇന്ന് ഈ ഗാനം നിർബന്ധമാക്കുകയും പൗരന്മാരുടെ മേൽ അടിച്ചേൽപ്പിക്കുകയും ചെയ്യുന്നത് ദേശസ്നേഹത്തിന്റെ കാര്യമല്ല, മറിച്ച് തെരഞ്ഞെടുപ്പ് രാഷ്ട്രീയത്തിന്റെയും, വർഗീയ അജണ്ടകളുടെയും, കാതലായ വിഷയങ്ങളിൽ നിന്ന് പൊതുജനശ്രദ്ധ തിരിച്ചുവിടാനുള്ള ബോധപൂർവമായ തന്ത്രത്തിന്റെയും കാര്യമാണ്. മാതൃരാജ്യത്തോടുള്ള സ്നേഹം മുദ്രാവാക്യങ്ങളെ അടിസ്ഥാനമാക്കിയുള്ളതല്ല, മറിച്ച് സ്വഭാവത്തെയും ത്യാഗത്തെയും അടിസ്ഥാനമാക്കിയുള്ളതാണ്, മുസ്ലിങ്ങളുടെയും ജാമിയത്ത് ഉലമ-ഇ-ഹിന്ദിന്റെയും അഭൂതപൂർവമായ പോരാട്ടം ഇതിന് ഒരു തിളക്കമാർന്ന ഉദാഹരണമാണ്. ഇത്തരം തീരുമാനങ്ങൾ രാജ്യത്തിന്റെ സമാധാനം, ഐക്യം, ജനാധിപത്യ മൂല്യങ്ങൾ എന്നിവയെ തകർക്കുക മാത്രമല്ല, ഭരണഘടനയെ ലംഘിക്കുകയും ചെയ്യുന്നുവെന്ന് പ്രസ്താവന തുടരുന്നു.
ഓർക്കുക! മുസ്ലിങ്ങൾ ഏക അല്ലാഹുവിനെ മാത്രമേ ആരാധിക്കുന്നുള്ളൂ. നമുക്ക് എന്തും സഹിക്കാം, പക്ഷേ ആരെയും അല്ലാഹുവുമായി പങ്കുവെക്കുന്നത് ഒരിക്കലും അംഗീകരിക്കാൻ കഴിയില്ല. അതിനാൽ, വന്ദേമാതരം നിർബന്ധമാക്കുന്നത് ഭരണഘടനയുടെ ആത്മാവിനും മതസ്വാതന്ത്ര്യത്തിനും ജനാധിപത്യ മൂല്യങ്ങൾക്കും നേരെയുള്ള നഗ്നമായ ആക്രമണമാണ്, പ്രസ്താവനയിൽ ആവർത്തിക്കുന്നു.
