മുംബയ്: മഹാരാഷ്ട്ര ഉപമുഖ്യമന്ത്രി അജിത് പവാറിന്റെ മരണത്തില് സംശയം പ്രകടിപ്പിച്ച് അനന്തരവന് രോഹിത് പവാര്. ഒരു മുതിര്ന്ന നേതാവ് യാത്ര മനഃപൂര്വം വൈകിപ്പിച്ചു. അതിനാലാണ് ട്രെയിനിലെ യാത്ര മാറ്റി വിമാന മാര്ഗമാക്കിയതെന്ന് അദ്ദേഹം പറഞ്ഞു.
അപകടത്തിന് തൊട്ട് മുമ്പുള്ള റേഡിയോ സിഗ്നലും പ്രധാന പൈലറ്റിന്റെ സംഭാഷണവും ലഭിക്കാത്തതിലും ദുരൂഹതയുണ്ടെന്നാണ് രോഹിത് പവാര് പറയുന്നത്.
കഴിഞ്ഞ 28 ന് പൂനെയ്ക്ക് സമീപം ബാരാമതിയില് വിമാന അപകടത്തിലാണ് അജിത് പവാര് കൊല്ലപ്പെട്ടത്. നിലത്തിറങ്ങുന്നതിനിടെ വിമാനം തകര്ന്നു വീണ് തീപിടിക്കുകയായിരുന്നു.
അപകടത്തില് പൈലറ്റുമാര് ഉള്പ്പെടെ വിമാനത്തിലുണ്ടായിരുന്ന മറ്റ് നാലു പേരും കൊല്ലപ്പെട്ടിരുന്നു. കൃത്യസമയത്ത് വിമാനത്താവളത്തില് എത്തിയെങ്കിലും വൈകിയാണ് അവിടെ നിന്ന് പുറപ്പെട്ടത്. അപകടം നടക്കുന്നതിനു തൊട്ടു മുന്പ് ട്രാന്സ്പോണ്ടര് ഓഫായത് പൈലറ്റ് ചെയ്തതാണോയെന്ന് പരിശോധിക്കണം.
സഹ പൈലറ്റ് മെയ് ഡേ സന്ദേശം അയച്ചില്ല. വിമാനം പറത്താന് ചുമതലയുണ്ടായിരുന്ന പൈലറ്റിനെ അവസാന നിമിഷം മാറ്റി. ഒരു പൈലറ്റ് ഗതാഗതകുരുക്കില് കുടുങ്ങിയത് കൊണ്ടെന്നാണ് വിശദീകരണം. എന്നാല് രണ്ട് പൈലറ്റുമാരെയും മാറ്റിയതില് ദുരൂഹതയുണ്ടെന്ന് രോഹിത് പവാര് ആരോപിച്ചു.
