ന്യൂദല്ഹി: ഭാരതവും അമേരിക്കയും ഒപ്പിടുന്ന വാണിജ്യക്കരാറിന്റെ വിശദാംശങ്ങള് കേന്ദ്ര സര്ക്കാര് പുറത്തുവിട്ടു. ഭാരതത്തിന്റെ ക്ഷീര, കാര്ഷിക മേഖലകളെ പരിപൂര്ണമായും സംരക്ഷിക്കുന്ന കരാര് രാജ്യത്തെ തുണിത്തര, വസ്ത്ര, തുകല്, ഔഷധ, റബര് അടക്കമുള്ള മേഖലകള്ക്ക് വലിയ ഗുണകരമാകുമെന്നു വ്യക്തമായി.
യുഎസില് നിന്നുള്ള ഇറക്കുമതി
യുഎസില് നിന്നുള്ള എല്ലാ വ്യവസായ ഉത്പന്നങ്ങളുടെയും, ചോളത്തിന്റെ അവശിഷ്ടം ഡ്രൈഡ് ഡിസ്റ്റിലേഴ്സ് ഗ്രെയിന്സ്, കാലിത്തീറ്റയ്ക്കുള്ള ചുവന്ന ചോളം, അണ്ടിപ്പരിപ്പ്, പുതിയതും സംസ്കരിച്ചതുമായ പഴങ്ങള്, സോയാബീന് എണ്ണ, വൈന്, സ്പിരിറ്റ് എന്നിവയുടെയും ഭക്ഷ്യ-കാര്ഷിക ഉത്പന്നങ്ങളുടെയും മേലുള്ള തീരുവ ഭാരതം ഒഴിവാക്കുകയോ കുറയ്ക്കുകയോ ചെയ്യും.
ഭാരതത്തിന്റെ കയറ്റുമതി
പകരം ഭാരതത്തില് നിന്നുള്ള ഉത്പന്നങ്ങള്ക്ക് അമേരിക്ക 18 ശതമാനം തീരുവ ചുമത്തും. തുണിത്തരങ്ങള്, വസ്ത്രങ്ങള്, തുകല്, പാദരക്ഷകള്, പ്ലാസ്റ്റിക്, റബര്, ജൈവ രാസവസ്തുക്കള്, ഗൃഹാലങ്കാര വസ്തുക്കള്, കരകൗശല ഉത്പന്നങ്ങള്, ചില യന്ത്ര സാമഗ്രികള് എന്നിവ കുറഞ്ഞ വിലയ്ക്ക് യുഎസില് വില്ക്കാം.
ജനറിക് മരുന്നുകള്, രത്നങ്ങള്, വജ്രങ്ങള്, വിമാന ഘടക ഭാഗങ്ങള് തുടങ്ങിയവയുടെ നികുതി അമേരിക്ക പൂര്ണമായും നീക്കും. അതായത്, ഇവയും കുറഞ്ഞ വിലയ്ക്ക് യുഎസില് വില്ക്കാം. ഭാരതത്തില് നിന്നുള്ള ചില വിമാനങ്ങള്ക്കും വിമാന ഭാഗങ്ങള്ക്കുമുള്ള തീരുവകളും അമേരിക്ക എടുത്തുകളയും. വാഹന ഭാഗങ്ങളും കുറഞ്ഞ തീരുവയ്ക്ക് യുഎസിലെത്തിക്കാം.
