തിരുനാവായ: എസ് എഫ് ഐ തൃശൂര് ജില്ലാ നേതാവായിരിക്കെ ഒളിവിലിരിക്കേണ്ട സന്ദര്ഭത്തില് പ്രയാഗ് രാജിലെ കുംഭമേള കാണാനിടയായതാണ് ഇന്ന് ജുന അഖാഡയുടെ മഹാമണ്ഡലേശ്വറായ സ്വാമി ആനന്ദവനം സ്വാമിയെ സനാതനധര്മ്മത്തിന്റെ പാതയിലേക്ക് നയിച്ചത്. കണ്ണൂരിലെ പഴയ നക്സലൈറ്റായ പവിത്രന്റെ മകള് സന്യാസിനിയായ അവന്തിക ഭാരതിയും പഴയ എസ് എഫ്ഐ പ്രവര്ത്തകയായിരുന്നെങ്കിലും ഇന്ന് സനാതനധര്മ്മത്തിന്റെ കാവല്ക്കാരിയാണ്. നടി നിഖില വിമലിന്റെ ചേച്ചിയാണ് ഇപ്പോള് അവന്തിക ഭാരതി എന്ന പേരില് അറിയപ്പെടുന്ന സന്യാസിനി. ദല്ഹിയിലെ ജെഎന്യുവില് തിയറ്റര് ആര്ട്സ് പഠിച്ച ശേഷം അമേരിക്കയിലെ സര്വ്വകലാശാലയില് ഉപരിപഠനം നടത്തി മടങ്ങിയെത്തിയ ശേഷമാണ് ജുന അഖാഡയില് ചേര്ന്നത്.
തിരുനാവായില് നടന്ന മഹാമാഘമഹോത്സവം എന്ന മലപ്പുറം കുംഭമേളയുടെ നടത്തിപ്പുകാരില് പ്രധാനികള് മഹാമണ്ഡലേശ്വര് ആനന്ദവനംസ്വാമിയും അവന്തിക ഭാരതിയും പിന്നെ യോഗി അഭിനവ ബാലാനന്ദ ഭൈരവയുമായിരുന്നു. ദിവസേന പതിനായിരങ്ങള് വരും എന്ന് പ്രതീക്ഷിച്ചിടത്ത് ലക്ഷങ്ങളാണ് തിരുനാവായ നാവാമുകുന്ദ ക്ഷേത്രത്തിന്കരയിലെ ഭാരതപ്പുഴയില് മുങ്ങിക്കുളിക്കാനും വൈകുന്നേരത്തെ നിളാ ആരതി കാണാനും എത്തിയത്.
രഥഘോഷയാത്ര തടഞ്ഞ് സ്റ്റാലിന്
ഭാരതപ്പുഴയുടെ ഉറവിടമായ തമിഴ്നാട്ടിലെ തിരുമൂര്ത്തിക്കുന്നില് നിന്നും ഒരു രഥഘോഷയാത്ര ആസൂത്രണം ചെയ്തിരുന്നു. പക്ഷെ സനാതനധര്മ്മത്തിന് എതിരായി നില്ക്കുന്ന തമിഴ്നാട് മുഖ്യമന്ത്രി സ്റ്റാലിന് അത് അനുവദിക്കാത്തതിനാല് കേരളതമിഴ്നാട് അതിര്ത്തിയായ വാളയാര് ചെക് പോസ്റ്റിനടുത്ത് നിന്നു മാത്രമേ രഥഘോഷയാത്രയ്ക്ക് തിരുനാവായിലേക്ക് പുറപ്പെടാന് കഴിഞ്ഞുള്ളൂ. ഇത് ഒരു തിരിച്ചടിയായി. എങ്കിലും സ്റ്റാലിന് സര്ക്കാരിന്റെ തനിനിറം തുറന്നുകാണിക്കാന് സാധിച്ചു. കോയമ്പത്തൂരിലെ ഇഷ ആശ്രമത്തിലെ സദ്ഗുരുവിന് എതിരായി സ്റ്റാലിന് സര്ക്കാര് ചില മതപരിവര്ത്തനലോബികളുടെ വാക്ക് കേട്ട് നടത്തുന്ന അതിക്രമങ്ങള്ക്ക് തടയിടാന് ഈയിടെ മാത്രമാണ് സാധിച്ചത്.
അമൃതാനന്ദമയിയും ചിദാനന്ദപുരിയും
മറ്റൊന്ന് കേരളത്തിലെ വിവിധ ആത്മീയ കേന്ദ്രങ്ങളുടെ സഹകരണം ഉറപ്പാക്കാന് ഒരു ചെറിയ അളവ് വരെ സംഘാടകര്ക്ക് സാധിച്ചു. മാതാ അമൃതാനന്ദമയിയും കൊളത്തൂരിലെ ചിദാനന്ദപുരി സ്വാമികളും ഈ മാഘമഹോത്സവത്തോട് സഹകരിച്ചിരുന്നു. ഹിന്ദുസമുദായങ്ങളിലെ വിവിധ ആശ്രമങ്ങള്ക്കിടയില് മതില്ക്കെട്ടുകള് അലിഞ്ഞുപോകുന്നതിനാണ് മാഘമഹോത്സവം സാക്ഷ്യം വഹിച്ചത്. ഹിന്ദു എന്ന ഒറ്റ മന്ത്രത്തിലേക്ക് അവരെല്ലാം അലിഞ്ഞുചേരാന് ശ്രമിക്കുന്ന കാഴ്ച അവിസ്മരണീയം തന്നെ.
തികച്ചും പ്രയാഗ് രാജില് നടന്ന കുംഭമേളയുടെ ഒരു മിനിപതിപ്പായിരുന്നു നടന്നത്. ഇത്രയധികം ആളുകള് വന്നിട്ടും കുപ്പയും അഴുക്കുകൂനകളും എങ്ങും കാണാനായില്ല ഭാരതപ്പുഴയുടെ തീരം തികച്ചും പവിത്രമായി നിലനിര്ത്താന് സംഘാടകര്ക്ക് സാധിച്ചു. ജനവരി 16ന് ആരംഭിച്ച് ഫെബ്രുവരി മൂന്നിന് അവസാനിച്ച കുംഭമേളയ്ക്ക് ഒട്ടേറെ പരിപാടികള് സംഘടിപ്പിച്ചിരുന്നു.
വാരണാസിയില് നിന്നും ഋഷികേശില് നിന്നും തീവണ്ടികള്
വാരണാസിയില് നിന്നും ഋഷികേശില് നിന്നും മാഘമഹോത്സവത്തിന് പ്രത്യേകം തീവണ്ടികള് ഏര്പ്പെടുത്താന് കഴിഞ്ഞതും വലിയ വിജയമാണ്. ഇത് ദൂരദിക്കുകളില് നിന്നുള്ള സന്യാസിസമുഹത്തിന് മലപ്പുറത്തെ കുംഭമേളയ്ക്കെത്താന് സാധിച്ചു. നാഗസന്യാസിമാര്ക്ക് വരെ കേരളത്തിലെ കുംഭമേളയില് പങ്കെടുക്കാന് സാധിച്ചു എന്നത് നിസ്സാരമായ കാര്യമല്ല.
അതെല്ലാം മുടക്കം കൂടാതെ നടന്നു. ഒട്ടേറെ പ്രമുഖരും താരങ്ങളും വന്നെത്തി. അക്കൂട്ടത്തില് എടുത്തുപറയേണ്ട പേരാണ് നടിമാരായ ജലജ, സോനാ നായര്, രചന നാരായണന്കുട്ടി തുടങ്ങിയവര്. സനാതനധര്മ്മവുമായി ബന്ധപ്പെട്ട ചടങ്ങുകള്ക്ക് വരാന് പണ്ടൊക്കെ ഭയമായിരുന്നുവെന്നും ഇപ്പോള് ആ ഭയമെല്ലാം നീങ്ങിയെന്ന് രചന നാരായണന് കുട്ടി നടത്തിയ പ്രസ്താവന ശ്രദ്ധേയമാണ്. 270 വര്ഷത്തിന് ശേഷം നടന്ന മാഘമഹോത്സവത്തില് പങ്കെടുക്കാന് കഴിഞ്ഞത് ദൈവാധീനവും മഹാഭാഗ്യവും എന്നാണ് ജലജ പറഞ്ഞത്. മലപ്പുറത്തെ കുംഭമേളയില് പങ്കെടുത്തപ്പോഴുള്ള അനുഭവം വാക്കുകളില് വിവരിക്കാവുന്നതില് അപ്പുറമാണെന്ന് സോനാനായര് പറയുന്നു.
എന്തായാലും പഴയ കമ്മ്യൂണിസ്റ്റ് വേരുകളുള്ളവര് തന്നെ സനാതനത്തിന്റെ കാവല്ക്കാരാകുന്ന അപൂര്വ്വമായ കാഴ്ചയ്ക്കും തിരുനാവായയിലെ മാഘമഹോത്സവം സാക്ഷ്യം വഹിച്ചു.
