തിരുനാവായ: മഹാമാഘ മഹോത്സവത്തിന് ശേഷവും കലങ്ങാതെ നിള ശുദ്ധിയില് ഒഴുകുകയാണ്. മഹാമാഘ മഹോത്സവത്തെ തുടര്ന്ന് ഭാരതപ്പുഴ മാലിന്യക്കൂമ്പാരമാകുമെന്ന് പ്രവചിച്ചവര്ക്കും മേള തടസപ്പെടുത്താന് ശ്രമിച്ചവര്ക്കും മറുപടിയായി നിള തെളിഞ്ഞൊഴുകുകയാണ്.
19 ദിവസമായി ഭാരതപ്പുഴയുടെ ഇരുകരകളിലും നടന്ന മഹോത്സവത്തില് പങ്കെടുക്കാന് ഏകദേശം 25 ലക്ഷത്തോളം പേരാണ് തിരുനാവായയില് എത്തിയത്. താത്കാലികപാലം നിര്മാണത്തിന് അനുമതി നല്കാതെ ജില്ലാ ഭരണകൂടം നിലകൊണ്ടപ്പോള് വ്യാജപ്രചാരണം അഴിച്ചുവിട്ട് മറ്റൊരു വിഭാഗവും രംഗത്തുവന്നു. കേരളത്തിന്റെ മതേതരത്വത്തിന് കോട്ടം ഉണ്ടാകുമെന്നും നദി മലിനമാകുമെന്നും പ്രചരിപ്പിച്ചു. ഇതിന്റെ അടിസ്ഥാനത്തില് തിരുനാവായ പഞ്ചായത്തിലെ ആരോഗ്യവിഭാഗം ദിവസവും നദീജലം പരിശോധിച്ചിരുന്നു. ഉത്തരേന്ത്യന് സംന്യാസിമാരെ അധിക്ഷേപിക്കുന്ന സാമൂഹ്യമാധ്യമ പോസ്റ്റുകളും വന്നു.
കണക്കുകൂട്ടലുകള് തെറ്റിച്ച് മഹാമാഘമഹോത്സവത്തിലേക്ക് ഭക്തര് ഒഴുകി. 16ന് ആരംഭിച്ച മഹോത്സവത്തില് ആയിരങ്ങളും പതിനായിരങ്ങളും പിന്നെ ലക്ഷങ്ങളും എത്തുന്ന കാഴ്ച്ചയ്ക്കാണ് നിളാതീരം സാക്ഷ്യം വഹിച്ചത്. കൂടുതല് ജനങ്ങളില് പരിപാടിയുടെ വിളമ്പരം എത്താതിരിക്കാന് തുടക്കത്തില് ചില മാധ്യമങ്ങളും ശ്രമിച്ചെങ്കിലും ജനപങ്കാളിത്തം വര്ദ്ധിച്ചതോടെ അവര്ക്കും വാര്ത്തകള് പ്രാധാന്യത്തോടെ നല്കേണ്ടി വന്നു. മഹാമാഘ മഹോത്സവം സമാപിക്കുമ്പോഴും സനാതന ധര്മത്തിന്റെ ഉജ്ജ്വലമായ വീണ്ടെടുപ്പിനായി നിള ശുദ്ധിയില് തന്നെ പൂര്ണമായി ഒഴുകുകയാണ്.
