തിരുവനന്തപുരം: ജാപ്പനീസ്-4 ലെവല് ഭാഷ പഠിച്ചു ജപ്പാനിലേക്ക് വരൂ…അവിടെ അവസരങ്ങള് നിറയെയാണെന്ന് 19 വര്ഷമായി ജപ്പാനില് താമസിക്കുന്ന മഞ്ചേരി ഒടോമ്പറ്റ സ്വദേശി നസീ മേലേത്തില്.
ജപ്പാനില് ഐടി മാനേജ്മെന്റ് രംഗത്ത് ജോലി ചെയ്യുന്ന നസീ ലോകകേരള സഭയില് പങ്കെടുക്കാന് എത്തിയതാണ്. ‘ബ്ലൂ കോളര് ജോലികള് ഉള്പ്പെടെ ചെയ്യാവുന്ന പുതിയ തരം വിസ 2018 ല് ജപ്പാന് അനുവദിച്ചിട്ടുണ്ട്. ഈ വിസയില് ഇപ്പോള് ധാരാളം ആളുകളെ വേണം. ഈ അവസരം മലയാളികള്ക്ക് പ്രയോജനപ്പെടുത്താം. വിസ ലഭിക്കാന് ജാപ്പനീസ്-4 ലെവല് ഭാഷ പഠിക്കണം. കെയര് ഗിവിങ്, കാര്ഷികമേഖല, നിര്മാണം, ഫാക്ടറി എന്നീ രംഗങ്ങളിലാണ് ജപ്പാന് തൊഴിലാളികളെ വേണ്ടത്.
അഞ്ചു വര്ഷത്തെ വിസയാണ് ജപ്പാന് നിലവില് നല്കുന്നത്. ഇത് പൂര്ത്തിയാക്കുകയും ആ കാലയളവില് നൈപുണി രംഗത്ത് പുതിയ നേട്ടങ്ങള് കൈവരിക്കുകയും ചെയ്യുന്ന വിദേശികള്ക്ക് പെര്മനന്റ് റെസിഡന്സി വിസ ഉള്പ്പെടെ ലഭിക്കും.
2007 ല് വിവാഹശേഷമാണ് ഭര്ത്താവിന്റെ ജോലിസ്ഥലമായ ജപ്പാനിലെ ടോക്യോയില് നസീ എത്തുന്നത്.നിലവില് ടോക്യോവില് ടൊയോട്ട നിര്മിക്കുന്ന സിറ്റി പ്രോജക്റ്റില് സ്ട്രാറ്റജിക് പ്രോഗ്രാം മാനേജ്മെന്റ് ഹെഡ് ആണ്.
