ന്യൂദല്ഹി :പെണ്കുട്ടികളുടെ മൗലികാവകാശമാണ് ആര്ത്തവ ശുചിത്വം എന്ന് സുപ്രീംകോടതി. സ്വകാര്യ, സര്ക്കാര് സ്കൂളുകളിലെ പെണ്കുട്ടികള്ക്ക് സാനിറ്ററി പാഡ് സൗജന്യമായി നല്കുന്നുണ്ടെന്ന് ഉറപ്പാക്കണമെന്നും കോടതി പറഞ്ഞു.ജയ താക്കൂര് സമര്പ്പിച്ച പൊതുതാല്പര്യ ഹര്ജി പരിഗണിക്കവെയാണ് വിധി. ആവശ്യമായ ആരോഗ്യ സുരക്ഷിതത്വവും ഉല്പ്പന്നങ്ങളും ലഭ്യമാകുക എന്നത് ഓരോ പെണ്കുട്ടിയുടെയും അവകാശമാണെന്ന് സുപ്രീംകോടതി പറഞ്ഞു.
പെണ്കുട്ടികളുടെ ശാരീരികവും മാനസികവുമായ ആരോഗ്യം സംരക്ഷിക്കേണ്ടത് ഭരണകൂടത്തിന്റെ ഉത്തരവാദിത്തമാണന്നും കോടതി പറഞ്ഞു. ജസ്റ്റിസ് ജെ.ബി. പര്ദിവാല, ജസ്റ്റിസ് ആര്. മഹാദേവന് എന്നിവരുള്പ്പെട്ട ബെഞ്ചിന്റേതാണ് വിധി. ആര്ത്തവാരോഗ്യത്തിലെ കേന്ദ്രനയവുമായി ബന്ധപ്പെട്ട ഹര്ജിയിലാണ് കോടതി നിരീക്ഷണം.
ആര്ത്തവ ആരോഗ്യത്തിനുള്ള അവകാശം ജീവിക്കാനുള്ള അവകാശത്തിന്റെയും ആരോഗ്യത്തിനുള്ള അവകാശത്തിന്റെയും ഭാഗമാണെന്നും പെണ്കുട്ടികള്ക്ക് ആരോഗ്യകരമായ ജീവിതത്തിനും ആര്ത്തവ ആരോഗ്യത്തിനും അവകാശമുണ്ടെന്നും സുപ്രീം കോടതി പറഞ്ഞു. ആറാം ക്ലാസിനും പന്ത്രണ്ടാം ക്ലാസിനും മധ്യേയുളള വിദ്യാര്ത്ഥികള്ക്ക് സൗജന്യ സാനിറ്ററി പാഡുകള് നല്കാനും എല്ലാ സര്ക്കാര്, സര്ക്കാര്-എയ്ഡഡ്, റസിഡന്ഷ്യല് സ്കൂളുകളുകള്ക്കും കേന്ദ്ര-സംസ്ഥാന സര്ക്കാരുകള്ക്കും നിര്ദ്ദേശം നല്കണമെന്നായിരുന്നു ഹര്ജിയില് ആവശ്യപ്പെട്േടിരുന്നത്.
