തിരുനാവായ: കേരളത്തിലെ നാലു ശങ്കരമഠങ്ങളിലെ സംന്യാസിമാരുടെ അപൂര്വ സംഗമം ഇന്ന് നിളാതീരത്ത് മഹാമാഘമഹോത്സവത്തിന്റെ യജ്ഞശാലയില്.
തൃശ്ശൂര് തെക്കേമഠം മൂപ്പില്സ്വാമിയാര് വാസുദേവാനന്ദ ബ്രഹ്മാനന്ദഭൂതി, കാസര്കോട് ഇടനീര് സ്വാമിയാര്മഠം മൂപ്പില്സ്വാമിയാര് സച്ചിദാനന്ദ ഭാരതി, തൃശ്ശൂര് നടുവില്മഠം മൂപ്പില്സ്വാമിയാര് അച്യുതാനന്ദ ഭാരതി, താനൂര് തൃക്കൈക്കാട്ടുമഠം മൂപ്പില് സ്വാമിയാര് നാരായണബ്രഹ്മാനന്ദതീര്ഥ, തൃശ്ശൂര് നടുവില്മഠം ഇളമുറ സ്വാമിയാര് പാര്ത്ഥസാരഥി ഭാരതി എന്നിവരാണ് മഹാമാഘമഹോത്സവ വേദിയില് ഒന്നിച്ച് എത്തുക.
പുതിയ സംന്യാസം ഉള്പ്പെടെ ശങ്കരമഠത്തിലെ സ്വാമിമാര്ക്ക് പല സംഗമങ്ങളുമുണ്ട്. തൃച്ചംബരം ക്ഷേത്രോത്സവത്തില് തിടമ്പു നൃത്തം നടക്കുമ്പോള് നാലുമഠങ്ങളിലെയും സംന്യാസിമാര് ഒത്തുകൂടുന്ന ചടങ്ങുണ്ട്. തിടമ്പു നൃത്തത്തിനൊപ്പം വില്വമംഗലം സ്വാമിയാരും നൃത്തം ചെയ്തിരുന്നു എന്നതിന്റെ തുടര്ച്ചയായി മൂപ്പില്സ്വാമിമാരും നൃത്തം ചെയ്തിരുന്നു. എന്നാല് തൃച്ചംബരത്തെ ചടങ്ങ് അടക്കം മൂപ്പില്സ്വാമിയാര്മാര് ഒന്നിച്ചെത്തിയിട്ട് വര്ഷങ്ങളായി.
ഇന്ന് ഉച്ചയ്ക്ക് രണ്ടുമണിയോടെ തിരുനാവായ ബ്രഹ്മസ്വം മഠത്തിലെത്തുന്ന സ്വാമിമാരെ മഹാമാഘ സഭാപതി മഹാമണ്ഡലേശ്വര് സ്വാമി ആനന്ദവനം ഭാരതിയുടെ നേതൃത്വത്തില് സ്വീകരിക്കും. വാദ്യഘോഷങ്ങളുടെ അകമ്പടിയോടെ യജ്ഞശാലയിലേക്ക് ആനയിക്കും. നിളാ സ്നാനത്തിനു ശേഷം അഞ്ചു സ്വാമിമാരും യജ്ഞശാലയില് ഒന്നിച്ച് ഭക്തര്ക്കൊപ്പം വിഷ്ണു സഹസ്രനാമം ജപിക്കും, അനുഗ്രഹ പ്രഭാഷണം നടത്തും.
