രാജ്യം പത്മഭൂഷൺ നൽകി ആദരിച്ചതിൽ സവിനയം നന്ദി അറിയിക്കുന്നതായി എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. ഈ വലിയ അംഗീകാരം ശ്രീനാരായണ ഗുരുദേവന്റെ പാദങ്ങളിൽ സമർപ്പിക്കുന്നതായും അദ്ദേഹം പറഞ്ഞു. മാവേലിക്കരയിൽ ഒരു ചടങ്ങിൽ പങ്കെടുക്കുന്നതിനിടെയാണ് പുരസ്കാര വിവരം അദ്ദേഹം അറിഞ്ഞത്. വാർത്തയറിഞ്ഞ നിമിഷം വികാരാധീനനായ അദ്ദേഹം, ഇത് വ്യക്തിപരമായ വിജയമല്ലെന്നും മറിച്ച് ലക്ഷക്കണക്കിന് സമുദായ പ്രവർത്തകരുടെ പ്രയത്നത്തിനുള്ള അംഗീകാരമാണെന്നും വ്യക്തമാക്കി.
തന്റെ സാമൂഹികവും സാമ്പത്തികവും സമുദായപരവുമായ പ്രവർത്തനങ്ങൾക്കുള്ള അംഗീകാരമായാണ് ഈ പുരസ്കാരത്തെ കാണുന്നതെന്ന് വെള്ളാപ്പള്ളി പറഞ്ഞു. “ഈ വലിയ ബഹുമതി ഞാൻ വലിയ സന്തോഷത്തോടെ സ്വീകരിക്കുന്നു. എനിക്ക് പിന്നിൽ നിൽക്കുന്ന ലക്ഷക്കണക്കിന് സമുദായ പ്രവർത്തകരും അനുയായികളുമാണ് ഇതിന് എന്നെ പ്രാപ്തനാക്കിയത്. അവരുടെ കഠിനാധ്വാനമാണ് ഈ പുരസ്കാരത്തിലേക്ക് നയിച്ചത്. ഇത് സമുദായ അംഗങ്ങളുടെയും അവരുടെ ത്യാഗത്തിന്റെയും വിജയമാണ്,” അദ്ദേഹം എഎൻഐയോട് പറഞ്ഞു. എസ്എൻഡിപി യോഗത്തിന്റെ അമരത്ത് 30 വർഷം പൂർത്തിയാക്കുന്ന വേളയിലാണ് ഈ വലിയ നേട്ടം അദ്ദേഹത്തെ തേടിയെത്തിയത്.
അതേസമയം, പുരസ്കാര വാർത്ത പുറത്തുവന്നതിന് പിന്നാലെ വെള്ളാപ്പള്ളി നടേശന്റെ പഴയൊരു അഭിമുഖം സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. പത്മ പുരസ്കാരങ്ങൾ പണം നൽകി വാങ്ങാവുന്നതാണെന്നും അത്തരമൊരു പുരസ്കാരം തനിക്ക് വാഗ്ദാനം ചെയ്താൽ സ്വീകരിക്കില്ലെന്നുമായിരുന്നു ആ പഴയ വീഡിയോയിൽ അദ്ദേഹം പറഞ്ഞിരുന്നത്. എന്നാൽ ഇപ്പോൾ ആ നിലപാട് തിരുത്തി പുരസ്കാരം സ്വീകരിക്കാൻ അദ്ദേഹം തയ്യാറായിരിക്കുകയാണ്.
