ന്യൂദല്ഹി: വജ്രാംഗ് എന്നത് സംസ്കൃതപദമാണ്. വജ്രാംഗ് എന്നതിന് അര്ത്ഥം വജ്രത്തിന്റെ പോലുള്ള കരുത്ത് കൈവരിക്കുക എന്നതാണ്. 77ാമത് റിപ്പബ്ലിക് ദിനത്തില് ആറ് റഫാല് യുദ്ധവിമാനങ്ങള് ഒരു അസ്ത്രത്തിന്റെ രൂപത്തില് വിന്യസിച്ച്, വജ്രാംഗ് ഫോര്മേഷനില് (Vajraang formation) പറന്നപ്പോള് ഇന്ത്യ ലോകത്തിന് മുന്നില് പ്രദര്ശിപ്പിച്ചത് ഇന്ത്യയുടെ വ്യോമസേനയുടെ വജ്രത്തിന്റേത് പോലുള്ള കരുത്താണ്.
ഓപ്പറേഷന് സിന്ദൂറില് റഫാല് യുദ്ധവിമാനങ്ങള് ഉപയോഗിച്ച് ഇന്ത്യ പാകിസ്ഥാന്റെ നട്ടെല്ലൊടിക്കുന്ന ആക്രമണമാണ് നടത്തിയത്. ഭാരതത്തിന്റെ ഈ വിജയത്തിന്റെ കൂടി ഓര്മ്മപ്പെടുത്തലായിരുന്നു റിപ്പബ്ലിക് ദിനത്തില് നടന്ന ഈ വജ്രാംഗ് ഫോര്മേഷന് . വ്യോമസേനയുടെ കരുത്ത് കാണിക്കാനാണ് സാധാരണ വജ്രാംഗ് ഫോര്മേഷനില് യുദ്ധവിമാനങ്ങള് പറക്കുക.
കര്ത്തവ്യപഥിന് മുകളിലൂടെ റഫാല് യുദ്ധവിമാനങ്ങള് ഗ്രൂപ്പ് ക്യാപ്റ്റന് അരുണ് കുമാറിന്റെ നേതൃത്വത്തിലാണ് പറത്തിയത്. തിരിഞ്ഞും മറിഞ്ഞും ലംബമായും തിരശ്ചീനമായും പറന്ന് റഫാലിന്റെ ശേഷി മുഴുവന് അരുണ് കുമാറിന്റെ നേതൃത്വത്തിലുള്ള സംഘം പുറത്തെടുത്തപ്പോള് പ്രധാനമന്ത്രി നരേന്ദ്രമോദി ഉള്പ്പെടെയുള്ള കര്ത്തവ്യപഥത്തില് കാണികളായി ഇരുന്നവര് അത്ഭുതം കൂറി. റഫാലിന്റെ മിടുക്ക് പ്രദര്ശിപ്പിക്കലും സാങ്കേതിക മികവ് എടുത്തുകാണിക്കലും വജ്രാംഗ് ഫോര്മേഷന്റെ ലക്ഷ്യമാണ്.
ഇന്ത്യയുടെ സൈനികക്കരുത്ത് പ്രകടിപ്പിക്കലും ആക്രമണോത്സുകത എടുത്തുകാണിക്കലും വജ്രാംഗ് ഫോര്മേഷന്റെ ലക്ഷ്യം തന്നെ. ‘അചൂക്, അഭേദ്യ വാ സദീക്’ എന്ന സംസ്കൃത മന്ത്രം പറയുംപോലെ ‘പരാജയപ്പെടുത്താനാവാത്ത, ശത്രുവിന് തുളച്ച് കയറാനാവാത്ത, കിറുകൃത്യതയോടെ ആക്രമണം നടത്തുന്ന’ എന്ന പ്രതീതിജനിപ്പിക്കുന്ന രീതിയില് ഇന്ത്യയുടെ വ്യോമശക്തി പ്രകടിപ്പിച്ചുകൊണ്ടാണ് ആറ് റഫാല് യുദ്ധവിമാനങ്ങള് പറന്നത്.
ഫ്രാന്സിലെ ഡസോള്ട് എവിയേഷന് നിര്മ്മിച്ച 4.5-ാം തലമുറയില് പെട്ട ആധുനിക യുദ്ധജെറ്റായ റഫാല് പറത്താന് ഇന്ത്യയിലെ പൈലറ്റുമാര് എത്രമാത്രം വൈദഗ്ധ്യം നേടിക്കഴിഞ്ഞു എന്നതിന്റെ തെളിവുകൂടിയായി 77ാമത് റിപ്പബ്ലിക് ദിനത്തിലെ വജ്രാംഗ് ഫോര്മേഷന്. ഇത് പാകിസ്ഥാനുള്ള താക്കീത് കൂടിയായി മാറുകയായിരുന്നു.
