കോഴിക്കോട്: മലര്വാടി ബാലസംഘം എന്ന പേരില് പൊതുവിദ്യാലയങ്ങളിലടക്കം ജമാഅത്തെ ഇസ്ലാമിയുടെ നുഴഞ്ഞുകയറ്റം. നഴ്സറി മുതല് ഏഴാംക്ലാസ് വരെയുള്ള വിദ്യാര്ത്ഥികള്ക്കായി ഇന്നലെ മഴവില്ല് എന്ന പേരില് ചിത്രരചനാ മത്സരം സംഘടിപ്പിച്ചത് ജമാഅത്തെ ഇസ്ലാമിയുടെ പോഷകസംഘടനയായ മലര്വാടിയുടെ പേരിലായിരുന്നു.
വിദ്യാലയങ്ങളില് നിന്ന് ഇത്തരം പരിപാടികള്ക്ക് വിദ്യാര്ത്ഥികളെ പങ്കെടുപ്പിക്കണമെങ്കില് പൊതുവിദ്യാഭ്യാസ ഡയറക്ടറുടെയോ വകുപ്പിന്റെയോ അനുമതി വേണം. മലര്വാടി ബാലസംഘം ജമാഅത്തെ ഇസ്ലാമിയുടെ സംഘടനയാണെന്ന് അറിയില്ലെന്നായിരുന്നു പല പ്രധാന അദ്ധ്യാപകരുടെയും പ്രതികരണം.
ജമാഅത്തെ ഇസ്ലാമിയുടെ ആസ്ഥാനമായ ഹിറാ സെന്ററിന്റെ മേല്വിലാസമാണ് പരിപാടിയുടെ നോട്ടീസില് അച്ചടിച്ചിട്ടുള്ളത്. 3000 മുതല് 10,000 രൂപ വരെ സമ്മാനം പ്രഖ്യാപിച്ചാണ് വിവിധ കാറ്റഗറികളിലായി മത്സരം നടത്തുന്നത്. ഇന്നലെ നടന്ന മത്സരത്തിന് ശേഷം സംസ്ഥാനതല മത്സരവും നടക്കും. മതരാഷ്ട്രവാദികളായ ജമാഅത്തെ ഇസ്ലാമിയുടെ പോഷകസംഘടന പൊതുവിദ്യാലയങ്ങളിലടക്കം നുഴഞ്ഞുകയറിയതിനെതിരെ വിദ്യാഭ്യാസ വകുപ്പ് നടപടിയെടുത്തിട്ടില്ല. മത്സരങ്ങളില് പങ്കെടുക്കുന്ന വിദ്യാര്ത്ഥികളുടെ പേരുവിവരങ്ങള് സംഘടന ദുരുപയോഗം ചെയ്യാനും സാദ്ധ്യതയുണ്ട്. ഇതിനെതിരെ യുവമോര്ച്ചയടക്കമുള്ള സംഘടനകള് രംഗത്തെത്തിയിട്ടുണ്ട്.
