പത്തനംതിട്ട: പി.എസ്. പ്രശാന്ത് പ്രസിഡന്റായ ദേവസ്വം ബോര്ഡിന്റെ കാലത്ത് 2025 സപ്തം. 7ന് ശബരിമലയില് നിന്നും ദ്വാരപാലക ശില്പ പാളികള് വീണ്ടും സ്വര്ണം പൂശാനായി ചെന്നൈക്ക് കടത്തിയത് 2019ലെ സ്വര്ണക്കൊള്ള മറയ്ക്കാനാണെന്ന നിഗമനത്തിന് സ്ഥിരീകരണം. പോറ്റിയുടെ പ്രേരണയെ തുടര്ന്ന് സര്ക്കാരില് നിന്നുണ്ടായ സമ്മര്ദ്ദം മൂലമാണിതെന്നാണ് സംശയം.
എസ്ഐടിക്കു മുന്നില് ബോര്ഡിലെ ചില ജീവനക്കാര് ഇതു സംബന്ധിച്ച മൊഴി നല്കി. അതിനാല് സ്വര്ണ കൊള്ളയുടെ തുടര്ച്ചയായി കണ്ട് ഇതിനെതിരെ പ്രത്യേക കേസ് രജിസ്റ്റര് ചെയ്യുമെന്നാണ് അറിയുന്നത്. പ്രസിഡന്റായിരുന്ന പി.എസ്. പ്രശാന്തിനെയും മെമ്പറായിരുന്ന അജികുമാറിനെയും വീണ്ടും ചോദ്യം ചെയ്യും.
ദേവസ്വം മരാമത്ത് അറിയാതെയാണ് കഴിഞ്ഞ വര്ഷം ദ്വാരപാലക പാളികള് കടത്തിയത്. പാളികള് ശബരിമലയില് നിന്ന് കൊണ്ടുപോകാന് തയാറാക്കിയ മഹസര് രേഖയില് മരാമത്തുമായി ബന്ധപ്പെട്ട ആരും ഒപ്പുവച്ചിട്ടില്ല. വിവരം ഒരുകാരണവശാലും മരാമത്ത് ഉദ്യോഗസ്ഥര് അറിയരുതെന്ന് പി.എസ്. പ്രശാന്തിന് നിര്ബന്ധം ഉണ്ടായിരുന്നു. മരാമത്ത് അറിഞ്ഞാല് വിവരം ശബരിമല സ്പെഷല് കമ്മീഷണര് അറിയും. ഇത് ഹൈക്കോടതിയില് എത്തും. അതോടെ 2019ലെ സ്വര്ണക്കൊള്ള പുറത്തുവരുമെന്നതാണ് കാരണം.
2001- 2003 മുതല്ക്കെ ദ്വാരപാലക പാളികളുടെ നിറം മങ്ങി തുടങ്ങിയെന്നാണ് ദേവസ്വം ജീവനക്കാരുടെ മൊഴി. പാളികളില് വീണ്ടും സ്വര്ണം പൂശണമെന്ന നിര്ദേശം അന്നു മുതല്ക്കേ പോറ്റിയും ഉന്നയിച്ചിരുന്നു. എന്നാല് ബോര്ഡ് പ്രസിഡന്റ് അനന്തഗോപന് തയാറായില്ല. 2003 നവംബറില് അധികാരമേറ്റ് വൈകും മുമ്പു തന്നെ ദ്വാരപാലക പാളികളില് സ്വര്ണം പൂശാനുള്ള നീക്കം പ്രശാന്ത് നടത്തി. 2024 മണ്ഡലകാലത്തിന് മുമ്പ് സ്വര്ണം പൊതിഞ്ഞ് പാളികള് പുനഃസ്ഥാപിക്കാനായിരുന്നു നീക്കം. എന്നാല് നടന്നില്ല.
1998ല് വിജയ് മല്യ 195.52 പവന് സ്വര്ണമാണ് ദ്വാരപാലക പാളികളില് പൊതിഞ്ഞതെന്നാണ് യുബി ഗ്രൂപ്പ് ദേവസ്വം ബോര്ഡിന് കൈമാറിയ രേഖകളില് പറഞ്ഞിരുന്നത്. ഈ സ്വര്ണം പൂര്ണമായി വേര്തിരിച്ചു മാറ്റി പകരം 49 പവന് (394.9 ഗ്രാം) സ്വര്ണം പൂശിയതായാണ് പോറ്റി അവകാശപ്പെട്ടത്. എന്നാല് ഇത് കളവാണെന്നും പേരിനു മാത്രം സ്വര്ണമാണ് പൂശിയതെന്നും വ്യക്തമാകുന്നു. ക്ലിയര് കോട്ടു ചെയ്ത പാളികള്ക്ക് 40 വര്ഷ ഗ്യാരന്റി കമ്പനി നല്കിയിട്ടുണ്ടെങ്കില് കേവലം നാല് വര്ഷത്തിനിടെ നിറം മങ്ങില്ലെന്ന മൊഴി ഈ രംഗത്തെ വിദഗ്ധര് എസ്ഐടിക്ക് നല്കിയിട്ടുണ്ട്. ശ്രീകോവില് പാളികളില് നിന്ന് വന് കൊള്ളയാണ് നടന്നതെന്ന് ഇത് വ്യക്തമാക്കുന്നു.
