തിരുവനന്തപുരം: മനുഷ്യരിലെ മുറിവുണക്കാന് പന്നിയുടെ പിത്താശയ സ്തരം ഉപയോഗിച്ചുള്ള കോളിഡേം എന്ന ബാന്ഡേജിന് സമാനമായ വസ്തു വികസിപ്പിച്ചെടുത്ത് ശ്രീചിത്ര തിരുനാള് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സ്. അലികോണ് മെഡിക്കല്സ് എന്ന കമ്പനിയാണ് കോളിഡേം വിപണിയിലെത്തിച്ചത്. അതിവേഗത്തില് മുറവുണക്കാനാവുന്ന മരുന്ന് തൊലിപ്പുറത്ത് ഉപയോഗിക്കാവുന്നതരത്തിലാണ് വിപണിയിലെത്തിച്ചത്. ലോകത്തിലാദ്ധ്യമായാണ് മൃഗത്തിന്റെ പിത്താശയത്തില് നിന്ന് ഇത്തരമൊരു കണ്ടെത്തലെന്ന് സംഘാടകര് വാര്ത്താസമ്മേളനത്തില് പറഞ്ഞു. എക്സ്പെരിമെന്റല് പത്തോളജി വിഭാഗം മേധാവി ഡോ. ടി വി അനില്കുമാറിന്റെ നേതൃത്വത്തിലായിരുന്നു വര്ഷങ്ങള് നീണ്ട ഗവേഷണം.
പന്നിയുടെ പിത്താശയത്തില് നിന്നെടുത്ത പാളികളും കുഴമ്പും മുറിവുകള് ഉണക്കാന് ഫലപ്രദമാണെന്ന് കണ്ടെത്തി. പന്നിയുടെ പിത്താശയത്തിലെ കോശങ്ങളിലെ കുഴമ്പ് തൊലിപ്പുറത്തുള്ള മുറിവുകള്ക്കു മുകളില് വച്ചു പിടിപ്പിച്ചാല് വേഗത്തില് ഉണങ്ങുമെന്ന് ശ്രീചിത്രയിലെ ഗവേഷണത്തില് കണ്ടെത്തിയിരുന്നു. മുറിവിന്റെ പാടുകള് ഏറെ കുറയ്ക്കാനും ഇതു സഹായിക്കും. 7 സെന്റീമീറ്റര് വരെയുള്ള മുറിവുകള്ക്ക് യോജിച്ച തരത്തിലാണ് കോളിഡേം നിലവില് വികസിപ്പിച്ചിരിക്കുന്നത്. വലിപ്പം കൂടുതലുള്ള മുറിവുകളില് ഒന്നിലധികം കോളിഡേം ചേര്ത്ത് വച്ച് തൊലിപ്പുറത്ത് തുന്നിച്ചേര്ക്കണം. 30,000രൂപയാണ് അലികോണ് മെഡിക്കല്സ് ഇപ്പോള് നിശ്ചയിച്ചിരിക്കുന്ന വില. ആവശ്യം വര്ദ്ധിക്കുന്നതിന് അനുസരിച്ച് വന്തോതില് കോളിഡേം നിര്മ്മിക്കുന്നതോടെ വിലകുറയുമെന്നാണ് പ്രതീക്ഷ.
വികസിത ഭാരതം, ആത്മ നിര്ഭര് ഭാരതം , മേക്ക് ഇന് ഇന്ത്യ , ആയുഷ്മാന് ഭാരത് തുടങ്ങി രാഷ്ട്രത്തെ സ്വയം പര്യാപ്തതയിലേക്കു നയിക്കുന്ന വിവിധ പദ്ധതികളിലേക്കു ഉള്ള ശ്രീ ചിത്രയുടെ സംഭാവന ആണ് ഈ ഉത്പന്നം . എഫ്ഡിഎ, സിഇ അടക്കമുള്ള അന്താരാഷ്ട്ര മാനദണ്ഡങ്ങള്ക്ക് അനുസരിച്ച് കോളിഡേം നിര്മ്മിക്കുന്നതിനുള്ള ശ്രമങ്ങള് അലികോണ് മെഡിക്കല് ആരംഭിച്ചിട്ടുണ്ട്.
