തിരുവനന്തപുരം: പ്രധാനമന്ത്രി നരേന്ദ്രമോദിയുടെ സന്ദര്ശനവുമായി ബന്ധപ്പെട്ട് ഇന്ന് നഗരത്തില് ഗതാഗത നിയന്ത്രണം. ശംഖുംമുഖം-എയര്പോര്ട്ട് ഭാഗവും, പുത്തരികണ്ടം-കിഴക്കേകോട്ട ഭാഗവും താല്കാലിക റെഡ് സോണായി പ്രഖ്യാപിച്ചു. ഈ ഭാഗങ്ങളില് രണ്ടു കിലോമീറ്റര് ചുറ്റളവില് ഡ്രോണ്/ ഡ്രോണ് ക്യാമറകള് ഉപയോഗിക്കുന്നതും, പട്ടം, ബലൂണുകള് എന്നിവ പറത്തുന്നതും, ലേസര് ബീം ലൈറ്റുകള് എന്നിവ ഉപയോഗിക്കുന്നതും കര്ശനമായി നിരോധിച്ചു. നഗരത്തിലേക്ക് കടന്നുവരുന്ന എല്ലാ വാഹനങ്ങളും നഗരാതിര്ത്തിയില് കര്ശന സുരക്ഷ പരിശോധനക്ക് വിധേയമാക്കും.
ഇന്ന് രാവിലെ 7 മണി മുതല് ഉച്ചയ്ക്ക് 2 മണി വരെ ഡൊമസ്റ്റിക് എയര്പോര്ട്ട്, ശംഖുമുഖം, ആള്സെയിന്റ്സ്, ചാക്ക, പേട്ട, പള്ളിമുക്ക്, പാറ്റൂര്, ജനറല് ആശുപത്രി, ആശാന് സ്ക്വയര്, രക്തസാക്ഷി മണ്ഡപം, വിജെറ്റി മെയിന്ഗേറ്റ്, സ്റ്റാച്യുപുളിമൂട്, ആയൂര്വേദ കോളജ്, ഓവര് ബ്രിഡ്ജ്, മേലെപഴവങ്ങാടി, പവര്ഹൗസ് ജംഗ്ഷന്, ചൂരക്കാട്ട്പാളയം വരെ റോഡിന്റെ ഇരുവശത്തും വാഹനങ്ങള് പാര്ക്ക് ചെയ്യാന് പാടില്ല.
വലിയതുറ, പൊന്നറപ്പാലം, കല്ലുംമ്മൂട്, അനന്തപുരി ഹോസ്പിറ്റല്, ഈഞ്ചയ്ക്കല്, മിത്രാനന്ദപുരം, എസ്പി ഫോര്ട്ട്, ശ്രീകണ്ഠേശ്വരം പാര്ക്ക്, തകരപ്പറമ്പ് മേല്പ്പാലം, പവര്ഹൗസ് ജംഗ്ക്ഷന് വരെയുളള റോഡിലും, ചാക്ക അനന്തപുരി ഹോസ്പിറ്റല് റോഡിന്റെയും ഇരുവശങ്ങളിലും വാഹനങ്ങള് പാര്ക്ക് ചെയ്യാന് അനുവദിക്കില്ല.
കൂടാതെ വിവിഐപി റൂട്ട് സമയത്ത് പ്രധാന റോഡില് വന്നു ചേരുന്ന ഇടറോഡുകളിലെ വാഹന ഗതാഗതത്തിന് നിയന്ത്രണമേര്പ്പെടുത്തുന്നതും രാവിലെ 10 മണി മുതല് 11 മണി വരെയും ഉച്ചയ്ക്ക് 12 മണി മുതല് 1 മണി വരെയും ഗതാഗതം വഴിതിരിച്ചു വിടും.
ഡൊമസ്റ്റിക് എയര്പോര്ട്ട് ഭാഗത്ത് നിന്നും ശംഖുമുഖം വഴി പോകുന്ന വാഹനങ്ങള് വലിയതുറ പൊന്നറ പാലം കല്ല് മൂട് ഭാഗം വഴിയും വെട്ടുകാട്, വേളി ഭാഗങ്ങളില് നിന്നും ആള്സെയിന്സ് വഴി പോകുന്ന വാഹനങ്ങള് മാധവപുരം, വെണ് പാലവട്ടം വഴിയും പോകണം. കഴക്കൂട്ടം ഭാഗത്ത് നിന്നും ചാക്ക വഴി തിരുവനന്തപുരം സിറ്റിയിലേക്ക് പോകുന്ന വാഹനങ്ങള് വെണ്പാലവട്ടം കുമാരപുരം പട്ടം കവടിയാര് വഴി പോകേണ്ടതാണ്. പിഎംജി ഭാഗത്ത് നിന്നും പാളയം വഴി പോകുന്ന വാഹനങ്ങള് എല്എംഎസ്, പംബ്ലിക് ലൈബ്രറി, പഞ്ചാപുര വഴിയും വെള്ളയമ്പലം ഭഗത്ത് നിന്നും പാളയം വഴി പോകുന്ന വാഹനങ്ങള് വഴുതയ്ക്കാട്, വിമന്സ് കോളജ്, തൈക്കാട് വഴിയും പോകേണ്ടതാണ്. തമ്പാനൂര് ഭാഗത്ത് നിന്നും ഓവര്ബ്രിഡ്ജ് വഴി കിഴക്കേക്കോട്ട പോകേണ്ട വാഹനങ്ങല് ചൂരയ്ക്കാട്ട് പാളയം കിള്ളിപാലം, അട്ടക്കുളങ്ങര വഴി പോകണം. അട്ടക്കുളങ്ങര ഭാഗത്ത് നിന്നും കിഴക്കേകോട്ട വഴി പോകുന്ന വാഹനങ്ങള് കിള്ളിപ്പാലം വഴിയോ ഈഞ്ചയ്ക്കല് വഴിയോ പോകേണ്ടതാണ്.
