കൊച്ചി: കണ്ണിലെ റെറ്റിന പരിശോധിച്ച് ഹൃദയാഘാതവും പക്ഷാഘാതവും വൃക്ക രോഗങ്ങളും മുന്കൂട്ടി പ്രവചിക്കാന് കഴിയുന്ന എഐ സാങ്കേതികവിദ്യ വികസിപ്പിച്ചെടുത്തതിലൂടെ കൊച്ചി അമൃത ആശുപത്രിയിലെ ഓഫ്താല്മോളജി വിഭാഗം മേധാവി ഡോ. ഗോപാല് എസ്. പിള്ള രാജ്യത്തിന്റെ ശ്രദ്ധാകേന്ദ്രമായി. ആരോഗ്യമേഖലയിലെ മികവിനുള്ള പ്രശസ്തമായ ‘എല്സെവിയര് റൈസ്’ പുരസ്കാരം ഇദ്ദേഹത്തെ തേടിയെത്തിയത് ഈ വിപ്ലവകരമായ നേട്ടത്തിനുള്ള അംഗീകാരമായാണ്.
മനുഷ്യശരീരത്തിലെ രക്തക്കുഴലുകളും നാഡികളും യാതൊരു ശസ്ത്രക്രിയയും കൂടാതെ നേരിട്ട് കാണാന് കഴിയുന്ന ഏക ഭാഗമാണ് റെറ്റിന. ഈ സവിശേഷതയെ എഐയുമായി ബന്ധിപ്പിച്ചാണ് ‘റെറ്റി എഐ’ എന്ന സാങ്കേതികവിദ്യ ഡോ. ഗോപാല് എസ.് പിള്ളയും സംഘവും രൂപപ്പെടുത്തിയത്. റെറ്റിനയുടെ ഫോട്ടോകള് സൂക്ഷ്മമായി വിശകലനം ചെയ്യുന്നതിലൂടെ ഒരാള്ക്ക് ഹൃദ്രോഗം, വൃക്കരോഗം അല്ലെങ്കില് സ്ട്രോക്ക് ഉണ്ടാകാനുള്ള സാധ്യത എത്രത്തോളമുണ്ടെന്ന് കൃത്യമായി ഇതിലൂടെ പ്രവചിക്കുന്നു.
രാജ്യമെമ്പാടുമുള്ള നിരവധി എന്ട്രികളില് നിന്ന് ‘എത്തിക്കല് ക്ലിനിക്കല് എഐ’ വിഭാഗത്തിലാണ് ഈ പ്രോജക്ട് ഒന്നാമതെത്തിയത്. കൊച്ചി അമൃത ആശുപത്രിയിലെ ഡോക്ടര്മാരായ ഡോ. രാജേഷ്. ടി, ഡോ. വിവേക് നമ്പ്യാര്, ഡോ. മെറിന് ഡിക്സണ്, ഡോ. നാഗേഷ് സുബ്ബണ്ണ, ഡോ. ഐശ്വര്യ എ., രാഹുല്, അഞ്ജന എന്നിവര് പ്രോജക്ടില് അംഗങ്ങളായി. പൂര്ണമായും ഭാരതത്തില് തന്നെ വികസിപ്പിച്ചെടുത്തതാണ് ഈ സാങ്കേതികവിദ്യ. നിര്മിത ബുദ്ധി ആരോഗ്യമേഖലയില് മനുഷ്യനന്മയ്ക്കായി എങ്ങനെ സുരക്ഷിതമായി ഉപയോഗിക്കാം എന്നതിന്റെ ഉത്തമ മാതൃകയാണ് ഈ കണ്ടുപിടിത്തം.
