ധാക്ക: ബംഗ്ലാദേശില് ഉന്നത അര്ദ്ധസൈനിക വിഭാഗമായ റാപ്പിഡ് ആക്ഷന് ബറ്റാലിയന് (ആര്എബി) നേരെ ഇസ്ലാമിക ഭീകരര് നടത്തിയ സംഘടിത ആക്രമണത്തില് ഒരു ഉദ്യോഗസ്ഥന് ദാരുണാന്ത്യം. മൂന്ന് ഉദ്യോഗസ്ഥര്ക്ക് ഗുരുതര പരിക്ക്. കഴിഞ്ഞ ദിവസം വൈകിട്ട് ചാറ്റോഗ്രാമിലെ സീതാകുണ്ടയിലെ ജംഗിള് സലിംപൂര് പ്രദേശത്ത് വച്ച് നടന്ന ആക്രമണത്തില് ആര്എബിയുടെ ഡെപ്യൂട്ടി അസിസ്റ്റന്റ് ഡയറക്ടര് അബ്ദുള് മൊട്ടാലെബയാണ് കൊല്ലപ്പെട്ടത്.
സ്ഥലത്ത് ആര്എബി ഉദ്യോഗസ്ഥര് പതിവ് പരിശോധന നടത്താനെത്തിയപ്പോഴാണ് ഇസ്ലാമിക ഭീകരര് ഇവരെ ആക്രമിച്ചത്. മഴുവും വാളും മറ്റ് മാരകായുധങ്ങളുമായി സംഘം ചേര്ന്നെത്തിയ ഭീകരര് ഉദ്യോഗസ്ഥര്ക്ക് നേരെ ആക്രമണം അഴിച്ചു വിടുകയായിരുന്നു. ആക്രമണത്തില് കൊല്ലപ്പെട്ട അബ്ദുള് മൊട്ടാലെബായുടെ മൃതദേഹം ഭീകരര് വലിച്ചിഴയ്ക്കുകയും കൂടുതല് വികൃതമാക്കുകയും ചെയ്തുവെന്നാണ് പുറത്ത് വരുന്ന റിപ്പോര്ട്ടുകള്. ആക്രമണത്തില് ഗുരുതരമായി പരിക്കേറ്റ മൂന്ന് ഉദ്യോഗസ്ഥരും വിവിധ ആശുപത്രിയില് ചികിത്സയിലാണ്.
ഇതോടൊപ്പം നിരവധി ഉദ്യോഗസ്ഥരെ ഭീകരര് ബന്ദികളാക്കിയിട്ടുണ്ടെന്നും റിപ്പോര്ട്ടുണ്ട്. ഡിസംബര് പകുതി മുതല് ബംഗ്ലാദേശിലുടനീളം രേഖപ്പെടുത്തിയിട്ടുള്ള വര്ദ്ധിച്ചുവരുന്ന ഇസ്ലാമിക ഭീകരാക്രമണങ്ങളുടെ പട്ടികയില് ഏറ്റവും പുതിയതാണ് ഈ സംഭവം.
