ടെഹ്റാന്: ഭരണകൂടത്തിനെതിരായ പ്രതിഷേധങ്ങളില് പങ്കെടുത്തവര്ക്ക് ഇറാന്റെ അന്ത്യശാസനം. മൂന്ന് ദിവസത്തിനുള്ളില് കീഴടങ്ങണമെന്നാണ് അന്ത്യശാസനം. നിര്ദേശിച്ച സമയത്തിനുള്ളില് കീഴടങ്ങിയില്ലെങ്കില് കടുത്ത ശിക്ഷാ നടപടികള് നേരിടേണ്ടിവരുമെന്ന് ഇറാന് പോലീസ് മേധാവി അഹ്മദ്-റേസ റദ്ദാന് മുന്നറിയിപ്പ് നല്കി. ഇറാന് നേതൃത്വത്തിനെതിരെയുള്ള ഏറ്റവും വലിയ വെല്ലുവിളിയാണ് കഴിഞ്ഞ കുറച്ച് ദിവസങ്ങളായി നേരിട്ടുകൊണ്ടിരിക്കുന്നത്. അട്ടിമറി ശ്രമമായിട്ടാണ് പ്രതിഷേധങ്ങളെ ഇറാന് ഭരണകൂടം കാണുന്നത്.
പ്രതിഷേധത്തില് പങ്കെടുത്തവരെയെല്ലാം കുറ്റവാളികളായി കാണാന് കഴിയില്ലെന്നും തെറ്റിദ്ധരിക്കപ്പെട്ട് പ്രതിഷേധത്തിന്റെ ഭാഗമായവര് നിര്ദേശിച്ചിരിക്കുന്ന സമയത്തിനുള്ളില് കീഴടങ്ങിയാല് അവരോട് ദയ കാണിക്കാമെന്നും അഹ്മദ്-റേസ റദ്ദാന് വ്യക്തമാക്കി. കഴിഞ്ഞ 11 ദിവസത്തോളമായി ഇറാനില് ഇന്റര്നെറ്റ് വിച്ഛേദിക്കപ്പെട്ടിരിക്കുകയാണ്. അതുകൊണ്ടുതന്നെ സംഭവത്തിന്റെ വ്യാപ്തി ഇപ്പോഴും പുറംലോകമറിഞ്ഞിട്ടില്ല. ആഭ്യന്തര കലാപത്തില് കൊല്ലപ്പെട്ടവരുടെ എണ്ണം 5000 കവിഞ്ഞു.
പ്രതിഷേധങ്ങള്ക്ക് ഉത്തരവാദികളായവര്ക്ക് കഠിന ശിക്ഷ നല്കുമെന്ന് പ്രസിഡന്റ് മസൂദ് പെസെഷ്കിയാന് ഉള്പ്പെടെ ഒപ്പിട്ട പ്രസ്താവനയില് പറഞ്ഞു. പ്രതിഷേധക്കാരെ വധശിക്ഷക്ക് വിധേയരാക്കാനുള്ള നടപടികള് ഇറാന് ആരംഭിച്ചതായിട്ടാണ് സൂചന. ഇതേസമയം, അധികാരികള് രാജ്യദ്രോഹികളുടെ നട്ടെല്ല് ഒടിക്കണമെന്ന് പരമോന്നത നേതാവ് ആയത്തുള്ള അലി ഖമേനി പറഞ്ഞതായി മാധ്യമങ്ങള് റിപ്പോര്ട്ട് ചെയ്തിരുന്നു.
